حماتي ادعت إنها فقدت بصرها، وعشت 3 سنين خدامة تحت رجليها، لحد ما اكتشفت إن جوزي كان شريكها في الكذبة، وإنهم مش بس عايزين يطردوني من البيت دول كانوا بيخططوا ياخدوا مني كل حاجة!
فضلت واقفة قدام حماتي، والموبايل في إيديها بيرن، وعيني مش بتتحرك من على الاسم اللي ظاهر على الشاشة.
أحمد!
جوزي!
الراجل اللي طول 3 سنين كان بيشكرني على خدمتي لأمه، وبيبوس إيدي ويقولي إنه عمره ما هينسى تعبي.
حماتي بصت للشاشة، وبعدها رفعت عينيها ناحيتي، وردت على المكالمة وهي بتبتسم.
أيوه يا أحمد.
سمعت صوت أحمد من الناحية التانية، لكنه كان واطي ومش واضح.
ردت عليه
أيوه، منى عرفت إني بشوف، بس متقلقش، أنا هتصرف معاها.
حسيت إن نفسي اتسحب من صدري.
يعني هو عارف!
يعني كل مرة كنت برجع فيها من عند الدكتور وأقوله إن ماما محتاجة متابعة، كان بيضحك عليا؟
كل مرة كنت بساعدها تدخل الحمام، وأغير لها هدومها، وأقعد جنبها بالساعات، كان عارف إنها مش محتاجة أي مساعدة؟
حماتي قفلت المكالمة وحطت الموبايل على السرير.
مالك يا منى؟ وشك اتغير ليه؟
بصيتلها وقلت
مفيش يا ماما، بس أنا سمعت اسم أحمد.
ضحكت وقالت
وإيه يعني؟ ده ابني، وبيكلمني يطمن عليا.
ربنا يخليهولك.
خرجت من الأوضة وأنا حاسة إني لو فضلت دقيقة واحدة هنهار قدامها.
دخلت أوضتي وقفلت الباب، وفضلت قاعدة على السرير لحد ما سمعت صوت مفتاح الباب الخارجي.
أحمد رجع.
دخل وهو شايل يوسف، وقعد يلعب معاه، وبعدها دخل المطبخ ولقاني بجهز الأكل.
إزيك يا حبيبتي؟
رديت من غير ما أبصله
الحمد لله.
قرب مني وباس راسي.
ماما كانت عاملة إيه النهارده؟
وقفت تقليب الأكل وبصيتله.
كويسة.
طب أكلت؟
أيوه.
خدتي بالك من دواها؟
أيوه يا أحمد.
فضل باصصلي شوية، وبعدها قال
مالك؟ إنتِ متغيرة ليه؟
كنت عايزة أقوله إن أمه بتشوف، وإنه هو كمان بيشوف كويس، وإن الاتنين دول كانوا بيضحكوا عليا وأنا مش واخدة بالي.
لكن قررت أستنى.
قلتله
تعبانة شوية، وعايزة أنام.
ابتسم وقال
معلش، استحملي، كلها فترة وربنا يشفيها.
الكلمة دي خلتني أضحك من جوايا من شدة الۏجع.
بعد ما ناموا، دخلت أوضة أحمد وفتحت الدولاب اللي بيحط فيه أوراقه.
كان فيه درج صغير دايمًا بيقفله بالمفتاح.
افتكرت كلام حماتي في المكالمة عارفة هي بتفتح درج أحمد إمتى.
حاولت أفتحه، لكن كان مقفول.
دورت في الأدراج التانية، لحد ما لقيت ظرف بني كبير مكتوب عليه اسمي.
فتحته، ولقيت صور بطاقتي، وصورة من عقد جوازي، وصور أوراق خاصة بالشقة.
وفي آخر الظرف لقيت ورقة عليها توقيعي.
قريتها مرة واتنين، ومقدرتش أصدق اللي مكتوب.
كانت إقرارًا بتنازلي عن أي مطالبة مالية تخص الشقة، وموافقتي على إخلائها في حالة انتهاء العلاقة الزوجية.
والأغرب إن التاريخ المكتوب عليها كان من شهرين.
أنا فاكرة اليوم ده كويس.
أحمد كان جايبلي ورق وقاللي أمضي عليه عشان يضيفني في ملف التأمين الطبي الخاص بالشركة.
كنت
