
الساعة 815.. لقطة وأنا بقفل الباب وبمشي.
820.. الدادة دخلت الشقة.
900.. الدادة أخدت ياسين ونزلوا يشتروا حاجات ويفكوا عن نفسهم.
وبعدها الصالون ظهر فاضي تماماً، والوقت بيعدي دقيقة ورا دقيقة في هدوء يرعب.
الساعة 943 دقيقة.
إصبعي وقف مكانه واتجمدت اللي ظهر في الفديو نشف الدم في عروقي!
!!!! ……..
إصبعي وقف مكانه واتجمدت.
في الزاوية اللي فوق على اليمين في الشاشة.. ناحية السلم.. ظهر خيال بني آدم مهزوز.
أقل من ثانيتين بالظبط.
كأن فيه حد طلع راسه يبص على الصالون، وأول ما لقى الدنيا أمان أو سمع حاجة.. رجع استخبى تاني في ثانية.
رجعت اللقطة دي وعيدتها يجي مية مرة.
الكاميرا جودتها مش عالية، والإضاءة كانت خافتة، بس باين وواضح جداً إنه بني آدم!
جسمه رفيع.
شعره طويل شوية.
لابس هدوم غامقة.
حركته سريعة وخفيفة زي الحرامية، كأنه بيتأكد الشقة تحت فاضية ولا لأ.
إيدي بدأت تترعش لدرجة الموبايل كان هيقع منها.
الساعة 1007.. الدادة رجعت ومعاها ياسين.
وبعدها الدنيا مشيت طبيعي ومفيش أي حركة غريبة ظهرت تاني.
يعني…
الخيال ده ظهر بالظبط في الشوية اللي الدادة وياسين مكانوش فيهم في الشقة!
الحد ده عارف مواعيد البيت بالدقيقة..
الحد ده مستني وقاعد بيراقب وبيميز الأصوات.
الليلة دي، م رضيتش أكلم شريف فيديو، بعتله رسالة عادية على الواتساب
أخبار الشغل والمشروع إيه؟ مضغوط؟
رد عليا في ثانية
الحمد لله ماشي الحال، بكرة عندي عرض مهم أوي للمرحلة الأساسية.
وبعدين كتب
في حاجة ولا إيه يا حبيبتي؟
بصيت
لشاشة الموبايل وكتبت
مفيش.. بس وحشتني أوي.
وأنتم كمان وحشتوني أوي.. هانت كلها شهر وشوية وأكون عندكم.
شهر وشوية..
فتحت الفيديو تاني.
شفت اللقطة دي أكتر من عشر مرات.
الخيال مغبش والملامح مش باينة خالص.
بس الطول والجسم.. شبه شريف بالملي.
شريف طوله 182 سم، وجسمه رفيع، ومربي شعره نازل مغطي ودنه شوية.
هنا.. أنا أخدت قراري.
تاني يوم الصبح، نزلت على مول بتاع إلكترونيات في وسط البلد، واشتريت كاميرا مراقبة صغننة خالص كاميرا spy بتشتغل بخاصية الرؤية الليلية.
حجمها أصغر من غطا القزازة.
رجعت البيت، زرعتها في زاوية السلم في الدور التاني، باصة وموجهة دايركت على باب الرووف، وداريتها ورا ورق شجر صناعي محطوط في فازة كبيرة على جنب.
ربطتها بال WiFi بتاع البيت، وبقيت أقدر أتابع اللي بتصوره لايف من على تليفوني وأنا برا.
خلصت ونزلت رحت شغلي عادي.
طول السكة وطول فترة الصبح، عيني منزلتش من على شاشة الموبايل بتابع الكاميرا.
الساعة 900 الصبح.. الدادة أخدت ياسين ونزلوا الجنينة.
الساعة 938 دقيقة بالظبط.
باب الرووف… بدأ يتزق ويتفتح بالراحة من جوه!
انفاس كتمت تماماً وأنا باصة لشاشة الموبايل.
الباب الخشب بتاع الرووف انفتح حتة صغيرة، حتة بحتة في هدوء مرعب، وظهرت منه إيد. الإيد دي مكانتش بتفتح القفل.. لأ، دي كانت بتزق الباب اللي المفروض إنه مقفول ومزجوج!
وفجأة، طلع منه نفس الجسم النحيف اللي شفته في الفيديو الأولاني.
كان لابس ترنج أسود، وشعره منكوش وطويل، وأول ما نزل على السلم وبان وشه كامل في الكاميرا… الصدمة لجمتني.
دا مش شريف!
الملامح كانت قريبة منه لدرجة تخض، نفس الطول والنحافة، بس دا كان واحد تاني خالص.




