
حماتي وأخوات جوزي كانوا بيقسموا مرتبي بينهم كل شهر كأنه ميراث أبوهم! واحدة تاخد مصاريف بيتها والتانية تاخد تمن علاجها، ولما اعترضت قالولي بكل بجاحة إنتِ فلوسك هي فلوس أخونا، ومكنتش أعرف إن يوم ما جوزي هيعرف هما بيعملوا إيه بفلوسه هو كمان، هيقلب عليهم الترابيزة!
من أول يوم اتجوزت فيه وأنا بشتغل وبتعب في شغلي من الصبح لليل عشان أساعد جوزي ونبني مستقبلنا سوا.
لكن للأسف، حماتي وبناتها كانوا شايفين إن مرتبي ده حق مكتسب ليهم هما، مش ليا أنا وجوزي!
كل أول شهر، وقبل حتى ما أقبض الفلوس في إيدي، ألاقي حماتي داخلة عليا شقتي ومعاها بناتها، وبيقسموا المرتب بالورقة والقلم.
واحدة تقولي هاتي ألفين جنيه عشان دروس العيال، والتانية تمد إيدها وتقول وأنا عايزة تمن العلاج والكشف بتاع الشهر ده.
وحماتي تاخد الباقي بحجة إنها بتشيله للزمن أو بتجيب بيه طلبات للبيت الكبير!
كنت برجع بيتي آخر الشهر ومفيش في شنطتي ولا مليم، لدرجة إني كنت بستلف عشان أجيب لنفسي حاجة شخصية أو أشتري لبس.
ولما فاض بيا الكيل وقررت أتكلم وأعترض، لقيتهم كلهم اعترضوا عليا،
وحماتي بصتلي من فوق لتحت وقالتلي ببرود
إنتِ بتتكلمي في إيه يا بنتي؟ إنتِ وفلوسك ملك لأخونا، وإحنا أهله وأولى بخيره من الغريب!
كنت بسكت وببلع القهرة في قلبي عشان خاطر جوزي، وعشان معملوش مشاكل مع أهله وهو راجع تعبان من شغله.
والغريب إن جوزي طول الوقت كان بيشتكي من ضيق الحال، وبيستغرب الفلوس بتروح فين، وأنا كنت فاكرة إنه عارف باللي أمه وأخواته بيعملوه معايا وساكت بمزاجه!
لكن في يوم من الأيام، حصل موقف مكنش على بال حد فينا…
موقف كشف المستور، وخلّى الحقيقة كلها تبان على أصلها.
كنت قاعدة في أوضتي، وسمعت صوت جوزي بيتكلم في التليفون في الصالة بصوت واطي، وكان باين عليه الدهشة والاستغراب.
خرجت أشوف في إيه، لقيته ماسك كشف حساب بنكي في إيده، ووشه متغير من شدة الغضب!
بصلي بنظرة كلها ذهول وقالي
إنتِ كنتي عارفة إن أمي وأخواتي بيسحبوا من الفيزا بتاعتي كل شهر بحجة إنهم بيدفعوا أقساط الشقة؟!
اتصدمت من كلامه، وقلتله والدموع في عيني
أقساط إيه؟ ده هما بياخدوا مرتبي أنا كمان كل شهر وبيقولولي إنتِ فلوسك فلوس أخونا!
جوزي في اللحظة دي متكلمش ولا كلمة، نزل على شقة أمه بسرعة كبيرة…
واللي عمله فيهم في اليوم ده، خلاهم يصرخوا في الشارع كله وهو بيقلب عليهم الترابيزة!
حكايات بسمه
نزل طارق السلم وهو بيقفز تلات درجات مع بعض، وصوت خطواته الغاضبة كان بيرن في بير السلم كأنه رعد بيعلن عن عاصفة هتغير كل حاجة في طريقها. أنا جريت وراه وأنا لسه بلبس الإسدال بتاعي بالعافية، قلبي كان بيخبط في ضلوعي بقوة، مش بس من التوتر، لكن من إحساس غريب بالانتصار والرهبة في نفس الوقت.. أخيرًا الحقيقة اللي فضلت سنين أبلع مرارتها لوحدي، ظهرت قدامهم!
وصلنا قدام باب شقة حماتي، الحاجة فوزية، في الدور الأول. طارق ما ضربش الجرس، ولا حتى خبط بالراحة زي عادته؛ ده خبط على الباب بإيده بقوة خلت الجيران يفتحوا أبوابهم يبصوا من ورا الشيش.
ثواني والباب اتفتح، وظهرت أخت جوزي الكبيرة منال، وهي ماسكة في إيدها طبق فاكهة غالي وبتضحك، لكن ابتسامتها اختفت من على شفايفها في لحظة أول ما شافت وش طارق اللي كان متغير من شدة الغضب وعينيه مليانة انفعال.
إيه يا طارق، مالك بتخبط كده ليه؟ خضيتنا!
طارق ما ردش عليها، فتح الباب برجله ودخل الصالة بسرعة، وأنا دخلت وراه وقفلت الباب عشان الموضوع ميبقاش على المشاع، رغم إن صوت طارق بعدها بثواني كان كفيل يسمّع الشارع كله.
المشهد اللي شوفناه في الصالة كان كفيل يضايقني أنا شخصيًا، فما بالك بطارق اللي لسه جاياله مكالمة من البنك بتبلغه بإجراءات الحجز!
حماتي الحاجة فوزية كانت قاعدة على الكنبة الكبيرة، وجنبها بنتها التانية هبة، وقدامهم على الترابيزة شنط محلات ملابس مشهورة، وعلبة حلويات شرقي من أغلى محل في البلد، وعلبة قطيفة حمرا مفتوحة فيها غويشتين دهب جداد بيلمعوا تحت نور النجفة! كانوا قاعدين بيتبادلوا الضحك والهزار، وبيقسموا المشتريات كالعادة، في الوقت اللي أنا فوق في شقتي كنت بحسبها بالقرش عشان أجيب لبن وجبنة للفطار!
أول ما الحاجة فوزية شافت طارق داخل بالمنظر ده، وورا منه أنا، غيرت ملامحها بسرعة، وحاولت تخبي علبة الدهب تحت خدادية الكنبة، وقالت بنبرة فيها دهشة مصطنعة
خير يا ابني؟ إيه اللي منزلك من فوق بالشكل ده؟ هي مراتك اتكلمت معاك علينا تاني ولا إيه؟
طارق وقف في نص الصالة، صدره بيطلع وينزل من كتر العصبية، ورفع كشف الحساب البنكي اللي في إيده ورماه بقوة على الترابيزة، فطار طبق الحلويات ووقعت كوبايات العصير على السجادة الجديدة.
إيه ده يا أمي؟! قال طارق بصوت مليان قهر إيه الفلوس اللي بتتسحب من حسابي كل شهر بقالها سنتين ونص دي؟! البنك لسه مكلمني دلوقتي، بيقولي إن عليا متأخرات تمان شهور في أقساط الشقة الجديدة، وإنهم هيفسخوا العقد ويصادروا المقدم اللي شقيت فيه عمري كله! فين الفلوس اللي كنتِ بتسحبيها بالفيزا بتاعتي كل أول شهر عشان تدفعيها للبنك يا أمي؟!
الصالة كلها سكتت فجأة. منال وقفت متجمدة مكانها وطبق الفاكهة في إيدها، وهبة وشها اصفر زي الليمونة، أما الحاجة فوزية فبلعت ريقها بصعوبة، وحاولت تلعب لعبتها القديمة.. لعبة الأم المظلومة اللي ابنها بيعلي صوته عليها.
حطت إيدها على صدرها وقالت بصوت فيه عياط مصطنع
بقى بتعلي صوتك على أمك يا طارق عشان شوية ورق وفلوس؟! أنا اللي ربيتك وكبرتك، جاي النهاردة تحاسبني وتقولي فين الفلوس؟! ما أنا قولتلك إن الدنيا غليت، وإننا بنصرف على البيت الكبير، وإن أخواتك ظروفهم صعبة!
طارق ضحك ضحكة هستيرية، ضحكة واحد مش قادر يستوعب اللي بيحصل، وقرب من الترابيزة وشال الخدادية اللي حماتي خبت تحتها علبة الدهب، ورفع الغويشتين قدام عينيهم كلهم
أخواتي ظروفهم صعبة يا أمي؟! اللي ظروفهم صعبة بيشتروا دهب بـ60 ألف جنيه، وشنط وهدوم من مولات، وحلويات بالشيء الفلاني؟! إنتي بتستغفليني يا أمي؟! ده أنا كنت بديكي الفيزا بتاعتي وأنا مغمض عيني، بقول أمي هي أأمن واحدة في الدنيا على شقايا، وتعب غربتي وشغلي ليل نهار عشان أأمن مستقبل بيتي، تقومي تاخدي الفلوس اللي المفروض تروح للبنك، وتوزعيها على بناتك؟!
هنا، هبة أخته الصغيرة، اللي عمرها ما كانت بتسكت، نطت في الكلام بوقاحة وهي بتبصلي بنظرة كلها غل
وإنت زعلان أوي كده ليه يا طارق؟ ما إحنا أخواتك ولحمك ودمك! ولا هي الست هانم مراتك هي اللي ملت دماغك علينا عشان تاخد خيرك لوحدها؟ ما إنت لو كنت بتسأل علينا وتشوف طلباتنا، مكنش زمان أمك اضطرت تاخد من وراك!
في اللحظة دي، أنا ما قدرتش أسكت أكتر من كده. السنين اللي فاتت كلها، والدموع اللي بلعتها، والإهانات اللي استحملتها، كل ده طلع مرة واحدة. اتقدمت خطوة ووقفت جنب طارق، وبصيت لهبة ولأمها ومنال بقوة عمري ما حسيتها قبل كده، وقلت بصوت عالي وواضح
أنا اللي باخد خيره لوحدي يا هبة؟! إنتوا بجد عندكم عين تتكلموا بعد اللي عملتوه فيا؟! قولي لأخوكي يا منال.. قولي له مين اللي كان بيدفعلك ألفين جنيه كل شهر لدروس عيالك من مرتبي أنا؟! قولي له يا هبة مين اللي كان بيدفعلك تمن كشوفاتك وعلاجك اللي طلع كله كدب في كدب؟! قولي له يا حاجة فوزية إنتي كنتي بتطلعيلي شقتي كل أول شهر قبل ما أقبض عشان تاخدي بقية مرتبي وتقوليلي بالحرف الواحد إنتِ وفلوسك ملك لأخونا، وإحنا أولى بخيره من الغريب!
طارق لف راسه وبصلي بذهول، وكأنه لسه بيستوعب حجم اللي كان بيحصل تحت سقف بيته وهو مش واخد باله.
إنتوا.. إنتوا كنتوا بتاخدوا مرتب سلمى كمان؟! قالها طارق بصوت واطي بس مليان غضب، كأنه هدوء ما قبل الانفعال يعني لا سايبين شقايا ولا سايبين شقى مراتي؟! دي البنت كانت بتيجي تقولي آخر الشهر مش عايزة أجيب لبس للعيد عشان نوفر للقسط، وبتستلف من صاحبتها في الشغل عشان تجيب حاجة لنفسها، وأنا فاكر إننا بنبني مستقبلنا، وفي الآخر بتاخدوا فلوسنا إحنا الاتنين؟!
منال اتوترت وحاولت تبرر بكلام فاضي
يا طارق افهمنا بس، إحنا مكنش قصدنا ناخد الفلوس من غير حق! أمك قالتلنا إن سلمى بتشتغل وبتقبض كويس، وإنها موافقة تساعدنا، وقالتلنا إنك إنت كمان قولت لها اصرفي من الفيزا زي ما إنتي عايزة!
كدابة! قالت الحاجة فوزية وهي بتبص لبنتها بانفعال أنا مقولتش كده! إنتِ اللي جيتي عيطتيلي وقولتيلي جوزي مزنوق في قسط التوك توك ومحتاج 30 ألف جنيه، وأختك هبة اللي فضلت تطلب مني عشان نجدد لها مطبخها قبل ما أهل جوزها يجولها! أنا معملتش حاجة لنفسي، كله كان عشانكم!
بصيت لطارق وأنا مش مصدقة اللي بسمعه. الكلام بدأ يقع لوحده، وكل واحدة فيهم بتكشف كلام التانية عشان تطلع نفسها بريئة!
قسط توك توك وتجديد مطبخ؟! طارق عيونه وسعت من الدهشة، ومسك دماغه بإيديه الاتنين يعني الـ240 ألف جنيه اللي اتسحبوا من حسابي في سنتين، ومرتب مراتي اللي معدي الـ150 ألف جنيه في نفس الفترة.. يعني حوالي 400 ألف جنيه، راحوا في مطبخ هبة وتوك توك جوز منال والدهب اللي مخبيينه تحت المخدات؟!
وفجأة، طارق ما قدرش يمسك أعصابه أكتر من كده.
بص للترابيزة اللي في نص الصالة، اللي عليها الشنط والعلب والأكل اللي جاي من شقانا وتعبنا، ومسكها من طرفها بإيديه الاتنين، وبكل قوة وانفعال وقهر السنين، قلب الترابيزة باللي عليها!




