قصص

مراتي والعصابه

حكايات انجي الخطيب

ـ بترقصي للعصابة وإنتِي مخطوفة؟! ده إنتِي عمرك ما رقصتيلي!بصتله راندا ببراءة، ورفعت حواجبها باستغراب وهي بترد:ـ وإنت يعني كنت طلبت وأنا قولتلك لأ؟! ما هما طلبوا وأنا مقدرتش أرفض… خفت يأذوني!أحمد فتح عينيه بصدمة، وبصلها من فوق لتحت كأنه مش قادر يستوعب اللي بيسمعه.

ـ نعم يا أختي؟! يعني أنا لما طلبت منك ترقصيلي قولتيلي عيب وحرام وميصحش، والكلام الكبير ده كله… ولما العصابة طلبت منك رقصتي من غير حتى ما تفكري؟!رفعت كتفها ببرود وقالت:ـ أصل دول شكلهم ناس متفاهمة وبيقدروا المواهب!

قرب منها خطوة، وعينيه ضاقت بغيظ:ـ مواهب إيه يا حبيبتي؟! هو أنا كنت متجوز رقاصة وأنا مش واخد بالي؟!ضحكت وهي بتحاول تكتم ضحكتها، وقالت:ـ لا يا حبيبي، إنت كنت متجوز واحدة محترمة، بس الظروف هي اللي اكتشفت موهبتها!

كان لسه هيرد عليها، لكن صوت زعيم العصابة جه من وراهم وهو بيزعق:ـ إنتوا الاتنين! هو إحنا في فرح هنا؟! ولا إنتوا فاكرين نفسكم في رحلة ترفيهية؟!أحمد لف له ببطء، وبصله بنظرة باردة وقال:ـ معلش، أصل المدام بتحب تلفت الأنظار في أي مكان نروحه، حتى لو كان وكر عصابة!

راندا شهقت وضربته في كتفه:ـ إنت بتقول إيه يا قليل الأدب؟!رد عليها بغيظ:ـ بس يا ماما! نطلع من هنا وهوريكي هعمل فيكي إيه يا موهوبة… خلينا نخلص من الناس اللي مقدّرة فنك الأول!زعيم العصابة فقد أعصابه، ورفع سلاحه في وشهم وهو بيزعق:ـ بس إنت وهي!

فين فلوس الفدية اللي اتفقنا عليها؟!أحمد رد بهدوء مصطنع:ـ معايا يا باشا، في العربية بره. اديني ثانية واحدة أخرج أجيبهالك. الزعيم ضحك بسخرية وهز راسه:ـ لا يا ناصح، هو أنا أهبل؟! هنادي على واحد من رجالة يخرج معاك ويجيب الفلوس.

كان لسه بيرفع صوته وبينادي على رجاله، لكن أحمد ما ادالوش فرصة يكمل. اندفع ناحيته فجأة وزقه بكل قوته، فالسلاح طار من إيده ووقع على الأرض. أحمد انحنى بسرعة، وخطف السلاح قبل ما الزعيم يستوعب اللي حصل، ووجهه ناحية باقي الرجالة وهو بيصيح بصوت حاسم:ـ محدش يتحرك!

اللي هيفكر يقرب منها هيندم على اليوم اللي اتولد فيه! خاطفين مرات ظابط ومفكرين نفسكم ناصحين؟!لكن واحد من رجالة العصابة كان أسرع منه، وطلع سلاحه ووجهه ناحية راندا اللي كانت بتجري ناحية الباب وبتحاول تفتحه. ـ ارمي السلاح يا بطل، وإلا مراتك هتكون أول واحدة تتأذى!

أحمد اتجمد مكانه للحظة، وعينيه راحت ناحية مراته اللي وقفت مكانها من الرعب. ـ إياك تمد إيدك عليها!الراجل ضحك بسخرية، وقرب من راندا وهو بيقول:ـ واضح إنك بتحبها أوي… ودي نقطة ضعفك يا باشا!

راندا بصت لأحمد، وبعدين بصت للراجل اللي واقف وراها، وبلعت ريقها بصعوبة قبل ما تقول:ـ هو أنا ينفع أقول حاجة؟الراجل زعق فيها:ـ اخرسي!أحمد بصله بغضب وقال:ـ متقولهاش اخرسي تاني يا خفيف، بدل ما أسكتك للأبد!راندا بصت لأحمد بابتسامة وقالت:ـ تعيش يا أحمد، ما هو ده برضه العشم!

أحمد بصلها بنفاذ صبر:ـ شكرًا يا موهوبة!هزت راسها وقالت للراجل اللي ماسكها:ـ ميبقاش خلقك ضيق كده! إنت شخص من عصابة معروفة وليها اسمها، المفروض تسمعوا آراء المخطوفين!الراجل بص لها باستغراب وقال:ـ نعم يا أختي؟! هو إحنا في برنامج ما يطلبه المستمعون؟!

راندا ابتسمت وقالت:ـ والله دمك خفيف يا مضروب! أنا بس كنت عايزة أقول إن لو كنت أعرف إنكوا عايزين تأذوني، مكنتش خرجت الخروجة دي أصلًا، وكنت قعدت في البيت وعملت محشي بدل البهدلة دي!أحمد بصلها بغيظ وقال:ـ والله ما إنتِ سايبة فرصة لحد يتنفس من كتر رغيك ده!

زعيم العصابة، اللي كان بيحاول يقوم من على الأرض، صرخ في رجالته:ـ خلصوا عليهم! أنا مش عايز أشوف وشهم تاني!في اللحظة دي، الراجل اللي ورا راندا قرب منها أكتر ومد إيده يمسكها من كتفها، لكنها فجأة داست على رجله بكعب جزمتها بكل قوتها، ولما صرخ من الوجع، لفت بسرعة وضربته بكوعها في بطنه.

ـ خد يا حبيبي! دي هدية من الموهوبة!الراجل انحنى من الألم، وراندا جريت ناحية أحمد واستخبت وراه وهي بتقول:ـ خد بالك بقى، أنا خلصت دوري!أحمد بص لها بتهكم وقال:ـ لا تعبتي، كتر خيرك!

لكن قبل ما تلحق ترد، صوت إطلاق النار بقي عالي في المكان، وإزاز الشباك اللي وراهم اتكسر وانتشر في كل اتجاه. أحمد شدها من إيدها، ووقعوا هما الاتنين ورا الكنبة الكبيرة. بص لها بسرعة وهو بيحاول يحميها بجسمه:ـ إنتِي كويسة؟!هزت راسها وهي بتترعش:ـ أيوه…

بس أنا عندي سؤال مهم جدًا. بصلها باستغراب، رغم إن الطلقات كانت لسه بتتضرب حواليهم:ـ سؤال إيه دلوقتي؟!قربت منه وهمست:ـ الفلوس اللي قولت لزعيم العصابة إنها في العربية… موجودة فعلًا ولا كنت بتشتري وقت؟!أحمد بص لها للحظة باستغراب، وبعدين قال:ـ هو ده وقت السؤال ده؟

!راندا هزت راسها بجدية:ـ أيوه طبعًا! أصل لو الفلوس موجودة، يبقى إنت بتحبني بجد واتصرفت عشان تنقذنيأحمد كان لسه هيرد، لكنها فجأة ابتسمت بطفولية وحاوطت رقبته بإيديها وحضنته بقوة. أحمد اتفاجئ من تصرفها، وحاول يبعدها عنه وهو بيهمس بغيظ:ـ بس يا مجنونة!

ده مش وقته!راندا رفعت وشها وبصتله بعيون مليانة حب وقالت:ـ طب ما ترد عليا الأول!أحمد أخد نفس عميق، وبص في عينيها رغم الفوضى اللي حواليهم:ـ الفلوس موجودة يا راندا…بس مش في العربية. ابتسامتها اختفت تدريجيًا، وبصتله باستغراب:ـ أومال فين؟

!قبل ما يجاوب، سمعوا صوت خبطة قوية عند الباب الرئيسي، وبعدها صوت رجالة بتصرخ بأوامر واضحة:ـ محدش يطلع سلاحه! المكان متحاصر!أحمد ابتسم لأول مرة من بداية المواجهة، ومد إيده يتحسس جهاز الاتصال الصغير المثبت في ياقة قميصه. راندا بصتله بصدمة:ـ إنت كنت مبلغ الشرطة؟

!هز راسه وقال:ـ مش الشرطة بس… أنا كنت مجهز لكل الاحتمالات من قبل ما ندخل المكان. راندا قربت منه وهمست:ـ يعني إنت كنت عارف إنهم هيخطفوني؟!أحمد بصلها وقال:ـ كنت شاكك إن العصابة دي بتراقب تحركاتي، وعشان كده كنت متابعهم من فترة.

ولما عرفت إنهم استهدفوكي، كان لازم أدخل بنفسي قبل ما ينفذوا اللي كانوا مخططين له. راندا بلعت ريقها، واختفت خفة دمها للحظة:ـ كانوا مخططين يعملوا فيا إيه؟أحمد سكت ثانية، وبعدين قال بصوت منخفض:ـ كانوا عايزين يستخدموكي عشان يوصلوا لملف قضية كبيرة شغال عليها.

كانوا فاكرين إن الضغط عليكي هيخليني أسلمهم الأدلة اللي معايا. راندا بصتله بقلق:ـ طب والفلوس؟أحمد ابتسم وقال:ـ الفلوس اللي طلبوها كانت مجرد حجة منهم عشان كنت عارف انهم هياخدوها ومش هيسلموكي ليا وهيفضلوا يضغطوا عليا لحد ما اسلمهم الملف ، لكن المبلغ الحقيقي كان مع القوة اللي بره.

كنت محتاج أخليهم يصدقوا إني مستعد أدفع، لحد ما نحدد مكانهم ونتأكد إن مفيش حد تاني مستني بره. في اللحظة دي، الباب اتفتح بعنف، ودخلت مجموعة من قوات الشرطة، وانتشرت في المكان بسرعة، وبدأت تسيطر على المسلحين واحد ورا التاني.

صوت الضابط المسؤول غطي علي المكان:ـ الكل يرمي سلاحه على الأرض! اللي يتحرك هيتوقف فورًا!أحمد رفع إيده اللي ماسك فيها السلاح، وبمجرد ما شاف زميله دخل، نادى عليه:ـ أنا هنا يا فندم!واحد من الضباط قرب منه، وبعد ما اتأكد من هويته، ساعده يقوم من ورا الكنبة.

السابق1 من 4
تابع المقال

Leave a Reply

Your email address will not be published. Required fields are marked *

Back to top button