قصص

طبق الكرنب وحساب السنين ج1

الكاتبه نرمين عادل همام

والنتيجة إيه؟

التضحيات اتدست تحت الجزم، والتنازلات اتفهمت إنها خيبة وضعف ورخص!

لكن خلاص.. الست سمر مقتش بتلزق مكسور. أنا تعبت!

إبراهيم مال عليا في الصالة ووشوشني بصوت مخنوق: — “سمر، وحياة أغلى حاجة عندك، بلاش تفضحينا على الأكل بعد شوية.. عشان خاطري وخاطر أمي وأبويا! العيد وعيد ميلادها النهاردة، وبعد العيد هعملك كل اللي أنتِ عايزاه…”

سألته بهدوء قاتل: — “وعد إيه ده يا إبراهيم؟ هل توعدني مثلاً إنك مش هتروح تدي مكافأتك كلها لأمك السنة الجاية برضه؟”

خرس، ووشه احمر، وما عرفش يرد.

وعوده بقت بلا قيمة.

اي اللحظة دي.. تليفوني رن. كانت أمي بتتصل فيديو.

فتحت الخط، وظهر وش أمي المشرق المنور على الشاشة، ووراه البحر الأزرق والمباني العالية الفخمة!

— “سمر يا حبيبتي! كل سنة وأنتِ طيبة يا قلب أمك!” .. صوتها كان مبهج وفيه راحة بال ما شفتهاش من زمان، ولابسة فستان مشجر جديد وطرحة شيك.

ابتسمت من قلبي وقلتلها: — “وأنتِ طيبة يا أمي يا حبيبتي! إيه الحلاوة دي؟ أنتِ وبابا وصلتوا البحر خلاص؟”

— “أيوة يا بنتي! الساحل هنا يجنن يا سمر! أبوكي طاير من الفرحة وبيقولي دي أول مرة في حياته يشوف بحر بنقاء ونظافة كده!” وراحت لفت التليفون ورتني المنظر: “ولسه طالعين من مطعم سمك، أكلنا جمبري واستاكوزا روعة! صحيح غالية شوية، بس ربنا مرزقنا والقرشين اللي بعتيهم روقوا علينا، يلا نعش حياتنا!”

صوت أمي ما كانش واطي خالص.. الصالة كانت سكتت فجأة، وكل كلمة كانت طالعة واضحة وزي الجرس!

عمي حمايا قفل التلفزيون، وحسين عدل قعدته وبص على شاشة التليفون، أما حماتي فكانت واقفة على باب المطبخ ماسكة ربطة كزبرة في إيدها ووشها اتقلب ألوان!

وإبراهيم؟ تعابير وشه كانت تدرس من كتر الخيبة والكسرة!

قلت لأمي بصوت عالي ومسموع للكل: — “أهم حاجة تتهنوا يا أمي أنتِ وبابا، وما تشيليش هم الفلوس خالص.. اتفسحوا وانبسطوا!”

— “ربنا يخليكي ليا يا بنتي يا بارة! أبوكي بيقول لازم نكرر السفرية دي تاني السنة الجاية.. الفلوس راحت في مكانها الصح يا سمر!”

قفلت الخط مع أمي، وبصيت للوشوش الصفرا اللي قدامي.. الصمت كان قاتل في الصالة!

حسين سلفي قال بسخرية وغل: — “ما شاء الله! مرتك يا إبراهيم طلعت بارة بأهلها أوي! مطيرة الفلوس على سفر فسح ودلع.. والله بختك حلو بمرتك الكريمة دي!”

الكلمة كانت طالعة سم، يقصد بيها إنني بطير فلوسي على أهلي ومستخسرة فيهم!

رديت عليه بابتسامة قاطعة: — “أكيد يا حسين.. الأهل شقيوا وتعبوا طول عمرهم عشان يربونا، ولما ربنا يوسع علينا لازم نروق عليهم ونفسحهم.. ده أقل واجب نعمله لأهالينا اللي ربونا، والفلوس تروح وتيجي، بس بر الأبوين مابيتعوضش!”

الكلمة دي كانت الشرارة اللي ولعت الفتيل!

حماتي رقعت ربطة الكزبرة على الترابيزة بصوت عالي: — “بتتكلمي بقلب جامد أوي يا ست سمر! هو أنتِ فاكرة إبراهيم بيكسب الفلوس بالساهل؟ مش وراه إيجار ومصاريف وبيت؟ ولا الفلوس طالعة من الشجرة عشان تطيريها كده على أهلك وتسيبي بيتك؟!”

بصيتلها في عينها بثبات وقلت: — “يا طنط، إحنا مش مديونين لحد، وبيتنا مستور والحمد لله. أما بالنسبة للبر.. فإبراهيم يبر أهله من جيبه، وأنا أبر أهلي من جيب الشقا بتاعي. كل واحد بيشيل شيلته ويهتم بأهله من غير ما ييجي على التاني.. مش ده كلام العقل والأصول برضه؟”

حماتي إيدها كانت بترتعش من الغضب: — “أنتِ بتتكلمي إزاي يا بت أنتِ؟! أنتِ اتجوزتي إبراهيم يعني بقيتي مننا وعيلتنا! وفلوسك هي فلوس بيتنا ده! مفيش حاجة اسمها كل واحد مع نفسه دي!”

— “أهااا!” .. هزيت رأسي بتمثيل الإدراك .. “يعني هي الحسبة عندكم كده؟ لما يكون الموضوع جايبيين فلوسي أنا، تبقى فلوس البيت والعيلة! ولما إبراهيم يأخد فلوسه يديها لحضرتك ولحسين، تبقى دي فلوسه وحره فيها؟ لا يا طنط، الزمن اتغير، والعدل بيقول إن اللي يسري عليا يسري عليه!”

حماتي كانت هتتخنق من الغيظ، ومكنتش متوقعة إن سمر المطيعة الهادية تطلع لسانها وترد بالمنطق القاتل ده!

حمايا زعق بصوته الجهور: — “بس خلاص! اتطينوا اسكتوا! إحنا في عيد ميلاد ورأس سنة، ايه قلة الأدب دي! يلا حطوا الأكل!”

حماتي بلعت غيظها بالعافية، وبصتلي بصة غل ودخلت المطبخ.

سفرة الأكل نزل عليها البط والفراخ المحمرة والمكرونة البشاميل والرقاق.. الأكل يفتح النفس، بس النفوس كانت سودا.

حماتي حطت مناب البط الكبير والدبوسة في طبق إبراهيم وقالتله: “كل يا حبيبي اتغذى، أنت بتتعب في شغلك.” وجات عندي وقامت حطالي جناح فراخ في طبقي بقلة ذوق!

إبراهيم نزل رأسه وبقى ياكل وساكت، وأبوه بيشرب، وحسين بينقي حتت اللحمة الحلوة.

في نص الأكل.. حماتي حطت المعلقة وقالت بصوت اصطناعي فيه خبث: — “يا إبراهيم.. يا سمر.. بما إننا ملمومين، في موضوع لازم نتكلم فيه.”

قلبي انقبض.. اللعبة الحقيقية بدأت.

— “حسين أخوك يا إبراهيم، كبر خلاص، وشايفله مشروع محل جديد مع صاحبه.. وأنا وأبوك كبرنا ومش معانا نساعده.. فقلنا أنتم كإخواته الكبار تقفوا جنبه وتدوله تمانين ألف جنيه يفتح بيهم المحل.”

الجو اتجمد تاني.

بصيت لإبراهيم.. كان دفن وشه في الطبق، وصوته طالع زي البعوضة: — “والله يا أمي إحنا الظروف اليومين دول…”

حماتي قطعت كلامه بقسوة: — “اسكت أنت يا إبراهيم! أنا عايزة أسمع رأي الست سمر بنفسها.. أصل سمر ما شاء الله معاها تطير وتفسح أهلها، فأكيد معاها تفك ضيقة أخو جوزها!”

الكل بصلي.. إبراهيم بنظرة رجاء وتوسل، وحماتي بنظرة سلطة، وحسين بمنتهى الطمع.

سيبت المعلقة بالراحة، ومسحت بؤي بالمنديل، وابتسمت ابتسامة خفيفة وقالت: — “والله يا طنط.. أنا معنديش مانع أدفع الثمانين ألف جنيه دول من معايا.”

وش حماتي وحسين أنور فجأة وزاطوا!

كملت كلامي بمنتهى الهدوء: — “بس بشرط واحد.”

وشوشهم اتجمت تاني، وحماتي سألت بلهفة: — “شرط إيه يا اختي؟!”

— “الفلوس دي هتدفع من تحويشتي الخاصة بتاعة زمان.. وعشان كده، المحل هيتكتب باسمي أنا، والعقد باسمي، وحسين سلفي يشتغل فيه مدير وياخد مرتب شهرى ونسبة من الأرباح لو المحل كسب. وأنا اللي هيكون ليا الكلمة الأولى والأخيرة في الإدارة والفلوس.”

يعني بالعربي كده: دي مش مجدية ولا جدعنة.. ده استثمار، وأنا المشغلة وهو شغال عندي!

حسين نط من على الكرسي وشاور في وشي وزعق: — “سمر! أنتِ بتستعبطي؟! عايزة تاخدي محلي ع الجاهز وتبقي وليّة نِعمتي ورئيستي في العمل؟!”

تابع المقال

Leave a Reply

Your email address will not be published. Required fields are marked *

Check Also
Close
Back to top button