طول عمري بحب حاجتي، ومبحبش حد ياخد حاجة مني، ومش من النوع اللي يسكت على حقه أو يسيب حاجة تخصه لغيره، فما بالك بقى بجوزي! أنا ممكن أتنازل عن حاجات كتير في الدنيا، إلا الحاجة اللي تخصني، خصوصًا لو واحدة تانية فاكرة إنها أذكى مني وهتعرف تاخدها من تحت إيدي.
وعشان كده، لما اكتشفت إن جوزي على علاقة بصاحبتي الوحيدة اللي كنت بعتبرها أختي، مقعدتش أعيط ولا أواجهه ولا حتى أعمل مشكلة، بالعكس، أنا ابتسمت وقررت أسيبهم يكملوا لعبتهم للآخر، بس بشرط واحد… إن أنا اللي أكون كسبانة في النهاية.
أنا اسمي نادين، عندي تلاتين سنة، متجوزة من سبع سنين من حسام، وعندي بنت عندها خمس سنين. حسام كان بالنسبالي الزوج اللي كل واحدة تتمناه، شغله كويس، وبيصرف على بيته، ومش بيحرمني من حاجة، وعلى الرغم من إنه مش رومانسي أوي، كنت بقول لنفسي إن دي طبيعته وإن المهم إنه راجل مسؤول.
أما بقى صاحبتي ريهام، فدي حكاية تانية خالص.
ريهام صاحبتي من أيام الجامعة، عارفة عني كل حاجة، وعارفة إني بحب حسام قد إيه، وعارفة إني ممكن أعمل إيه لو حسيت إن واحدة بتقرب منه. كانت دايمًا تضحك وتقول لي إني ست غيورة وكيادة، وإن الراجل مهما كان بيحب مراته، لازم تسيب له مساحة يتحرك فيها.
وأنا كنت بضحك معاها، من غير ما أتخيل إن المساحة اللي بتتكلم عنها دي هي نفسها اللي هتدخل منها على جوزي!
الحكاية بدأت من شهرين، لما ريهام بقت تزورني كتير بحجة إنها مخنوقة من مشاكلها، وتقعد معايا بالساعات، وفي كل مرة كانت تسألني عن مواعيد حسام، بيرجع من الشغل إمتى، وبيسافر إمتى، وهل بيقعد لوحده في المكتب ولا معاه موظفين.
في الأول كنت فاكرة إنها بتسأل عادي، لحد ما جه يوم كنت فيه عند أمي، ورجعت البيت بدري من غير ما أقول لحسام.
دخلت الشقة، لقيت تليفونه على السفرة، وكان بيرن.
مش من عادتي أفتش في تليفونه، لكن لما لقيت اسم ريهام ظاهر على الشاشة، استغربت؛ لأنها كانت قايلالي إنها عند أختها في إسكندرية.
مسكت التليفون، وفي اللحظة دي وصلت رسالة.
ـ “أنا استنيتك كتير عشان اشوفك وانت ماجتش انا عارفه انك مشغول عشان كده روخت ازور نادين قولت يمكن أشوفك ”
رجعت حطيت الموبايل مكانه بالضبط، ومسحت إيدي في هدومي كأني كنت بعمل حاجة عادية، وبعدها دخلت المطبخ وفتحت التلاجة أدور على أي حاجة أعملها للغدا، رغم إني كنت حاسة إن نفسي اتسدت من كل حاجة.
كنت سامعة صوت الميه في الحمام، وعقلي شغال بسرعة. ريهام مش بس خانت صداقتنا، دي دخلت بيتي وهي عارفة كويس إن الراجل اللي بتحاول تقرب منه هو جوزي، وعارفة إني بحبه، وعارفة إني عمري ما قصرت معاه. ومع ذلك، قررت تمد إيدها على حاجة تخصني، وكأنها بتتحدى قدرتي على اكتشافها.
لكن أنا مش هديها الفرصة دي.
أنا نادين، ولو في حاجة اتعلمتها في حياتي، فهي إن اللي بيحاول ياخد حاجة من إيدي لازم يكون مستعد يدفع تمنها، خصوصًا لو فاكر إن طيبتي ضعف وإن ثقتي فيه غباء.
خرج حسام من الحمام وهو بينشف شعره بالفوطة، وبص لي وأنا واقفة قدام البوتاجاز.
ـ إنتِ رجعتي إمتى؟ أنا افتكرتك لسه عند مامتك!
لفيت له بابتسامة عادية.
ـ من شوية، قولت أرجع أريح دماغي في البيت بدل ما أفضل عند ماما طول اليوم.
هز راسه، واتجه ناحية السفرة عشان ياخد موبايله، وأنا كنت متابعاه بطرف عيني من غير ما أبين له أي اهتمام. مسك التليفون، وبص للشاشة، وبعدها كتب رسالة سريعة قبل ما يحطه في جيبه.
قلبي اتقبض، لكن ملامحي فضلت ثابتة.
كنت عايزة أعرف كتب لمين، لكني منعت نفسي من السؤال. مش هسمح لفضولي يخليني أتصرف بغباء، ولا هخليه يحس إن في حاجة اتغيرت.
ـ حسام، تحب تتغدى إيه النهارده؟
بص لي بابتسامة.
ـ أي حاجة من إيدك حلوة.
ضحكت بخفة، وكملت تحضير الأكل، وأنا بقول لنفسي إن الراجل اللي واقف قدامي ده لسه فاكر إن حياته ماشية زي ما هي، وإن مراته مش عارفة حاجة، وإنه يقدر يكمل علاقته بريهام في السر من غير ما يدفع تمن خيانته.
خليه فاكر كده شوية، مش مشكلة.
أنا مش مستعجلة.
عدى يومين وأنا بتعامل مع حسام بشكل طبيعي، لا اتغيرت عليه ولا سألت عن مواعيده، ولا حاولت أراقبه بطريقة تلفت نظره. بالعكس، كنت حريصة إن كل حاجة تفضل زي ما هي، لحد ما بدأت أرتب أول خطوة في خطتي.
اتصلت بريهام، ولما ردت عليَّ، اتكلمت معاها بحماس مصطنع
ـ إيه يا بنتي، إنتِ فين؟ وحشتيني! إيه رأيك تيجي عندي بكرة نقعد مع بعض ونتغدى سوا؟
ردت بسرعة وكأنها كانت مستنية المكالمة.
ـ بجد يا نادين؟ طب ماشي، هاجيلك.
ـ طب تعالي بدري، عشان عايزاكي في موضوع كده.
سألتني بفضول:
ـ موضوع إيه؟
ضحكت وقلت:
ـ لما تيجي هتعرفي، مش كل حاجة بالتليفون يا ستي.
قفلت معاها وأنا مبتسمة، لأن عندي إحساس إنها فهمت إن في حاجة تخص حسام، وإنها بدأت تتخيل إني هحكيلها عن مشكلة بيني وبينه، أو إني هطلب منها تساعدني في حاجة تخص جوازنا.
وده بالضبط اللي كنت عايزاها تفكر فيه.
تاني يوم، وصلت ريهام قبل معاد الغدا، وكانت لابسة فستان جديد، وشعرها معمول بطريقة مختلفة، وحاطة مكياج أوضح من المعتاد. استقبلتها بحضن طويل، وبعدها دخلنا الصالة.
ـ إيه الجمال ده كله؟ هو أنا عندي مناسبة وأنا مش عارفة؟
ضحكت وهي بتقعد جنبي.
ـ يا بنتي بطلي رغي، هو لازم أبقى وحشة عشان أجيلك؟
ـ لا يا حبيبتي، بس واضح إنك مهتمة بنفسك اليومين دول.
بصت لي بسرعة، وكأنها بتحاول تعرف إذا كنت أقصد حاجة معينة، لكني غيرت الموضوع على طول وبدأت أحكي لها عن بنتي ومشاكل الحضانة، وبعدها دخلت أجيب العصير.
كنت متعمدة أخليها ترتاح، وتحس إن مفيش أي حاجة اتغيرت، وإن نادين اللي قدامها لسه هي صاحبتها اللي بتحكيلها أسرار بيتها من غير تفكير.
بعد شوية، خرج حسام من الأوضة وهو لابس قميصه ومستعد ينزل.
ـ السلام عليكم.
ريهام ردت بسرعة، وصوتها اتغير من غير ما تحس.
ـ وعليكم السلام.
رفعت عيني له وابتسمت.
ـ رايح الشغل يا حبيبي؟
ـ آه، عندي شوية حاجات لازم أخلصها.
قمت أظبط له ياقة القميص، وقلت قدامها:
ـ طب استنى، هجيب لك الساعة بتاعتك، إنت نسيتها امبارح.
دخلت الأوضة ورجعت بالساعة، ولبستهاله بنفسي، وبعدها بصيت له بحب.
ـ خلي بالك من نفسك، ومتتأخرش علينا. وح
ضنته قدامها وهو بادلنى الح..ضن
باسني على راسي، وقال:
ـ حاضر يا ستي.
خرج حسام، وأول ما الباب اتقفل، بصيت لريهام، لقيتها ساكتة وبتحرك المعلقة في كوباية العصير من غير ما تشرب.
ابتسمت وسألتها:
ـ مالك يا ريهام؟ سرحانة في إيه؟
رفعت عينيها بسرعة.
كنت شمتانه من حوايا على شكلها واللى عملته معاها بعد كده طفى ال.نار اللى جوايا
رفعت عينيها بسرعة، وابتسمت ابتسامة متكلفة وهي بتقول:
\- مفيش يا بنتي، سرحت بس.
ضحكت وأنا بسحب رجلي على الكنبة وبريح ضهري، وبعدين بصيت لها بحب مصطنع.
\- طب كويس إنك جيتي النهارده، أنا كنت محتاجة أقعد معاكي وأرغي شوية. إنتِ عارفة بقى، حسام بقاله فترة مشغول في الشغل، وأنا ساعات بحس إني عايزة أفضل أحكي له طول اليوم، بس الراجل مسكين بيرجع تعبان، فبحاول أراعيه.
ريهام هزت راسها وهي بتحاول تبان طبيعية.
\- طبعًا يا حبيبتي، لازم تراعي ظروفه.
بصيت لها وابتسمت.
\- ده أنا مراعيـاه أوي، بس هو كمان ربنا يخليهولي مش مقصر معايا. ساعات بحس إنه بيحبني أكتر ما أنا بحبه، وده بيخليني أستغرب من نفسي إزاي ممكن أكون محظوظة كده.
شوفت ملامحها اتغيرت للحظة، لكنها سرعان ما رسمت ابتسامة على وشها.
\- ربنا يخليكم لبعض يا نادين.
\- يارب يا حبيبتي، ده أنا من غير حسام معرفش أعمل حاجة أصلًا.
قلت جملتي وأنا بقوم من مكاني، واتجهت ناحية المكتبة الصغيرة اللي جنب التلفزيون، وبدأت أفتح درجًا فيها وأطلع منه علبة مخملية.
رجعت قعدت جنبها، وفتحت العلبة قدامها، فظهر طقم دهب رقيق، سلسلة وحلق وخاتم.
شهقت ريهام بإعجاب وهي بتقرب وشها من العلبة.
\- إيه ده يا بنتي! إيه الجمال ده كله؟!
ابتسمت وأنا بطلع السلسلة من مكانها وأرفعها قدام عيني.
\- حسام جابهولي في عيد جوازنا. كان قايلي إنه مش هيعرف يخرجني اليوم ده عشان عنده شغل كتير، وأنا اتضايقت وقتها، بس لما رجع بالليل لقيته محضرلي المفاجأة دي. ده حتى كان فاكر إني هزعل منه، فكان مخبيها في عربيته طول اليوم.
ريهام فضلت باصة للطقم، وابتسامتها بدأت تبقى تقيلة على وشها.
\- بجد؟ ده ذوقه حلو أوي.
\- أوي؟ ده إنتِ لسه ما شفتيش حاجة!
ضحكت، ورجعت العلبة مكانها، وبعدها فتحت درجًا تاني وطلعت منه علبة ساعة أنيقة.
\- بصي دي كمان، الساعة دي جابهالي لما كنت تعبانة شوية. قال لي إنه مش عارف يعمل إيه عشان يفرحني، وإنه نفسه يشوفني مبسوطة على طول. أنا وقتها عيطت من الفرحة، أصل أنا مش بتأثر بالهدايا نفسها قد ما بتأثر إنه فاكرني وبيفكر إزاي يفرحني.
مدت ريهام إيدها تمسك الساعة، وفضلت تتأملها قبل ما ترجعها لي.
\- ربنا يسعدك يا نادين، إنتِ تستاهلي كل خير.
ابتسمت وأنا بحط الساعة في العلبة.
\- عارفة يا ريهام، أنا ساعات بحس إن حسام بيغير عليَّ حتى من الهوا. لو اتأخرت في الرد عليه يتصل بيا يسألني أنا فين، ولو خرجت مع ماما يفضل يبعت لي يطمن إني وصلت، ولو حس إني ساكتة شوية يقعد يسألني مالك وإيه اللي مضايقك.
وبعدين قربت منها وهمست كأني بحكي لها سرًا خطيرًا:
\- بس متقوليش له إني بقولك الكلام ده، عشان بيتكسف لما أتكلم عن حنيته قدام حد.
ريهام ضحكت ضحكة قصيرة، لكنها كانت بتحاول تخبي بيها الضيق اللي بدأ يظهر في عينيها.
\- هو فعلًا باين عليه إنه بيحبك.
بصيت لها باستغراب مصطنع.
\- باين بس؟ ده إنتِ لو شفتيه لما ببقى تعبانة، بتستغربي إزاي راجل مشغول طول اليوم يسيب كل حاجة ويقعد جنبي!
وقبل ما ترد، مسكت تليفوني من غير ماتاخد بالها ، وكتبت له رسالة قصيرة:
«حبيبي، أنا حاسة إني تعبانة شوية وصداعي زاد، بس متقلقش عليَّ.»
بعت الرسالة، وحطيت التليفون على الترابيزة قدامي، ورجعت أكمل كلامي مع ريهام كأن الموضوع عادي جدًا.
لكن في الحقيقة، كنت مستنية اللحظة اللي هتبدأ فيها ريهام تحاسبه على كل كلمة وعدها بيها.
وبالفعل، في نفس اليوم، اتقابلوا في مكان بعيد عن شغله وبيتنا.
ريهام كانت قاعدة قدامه، ملامحها متوترة، وأول ما شافته قالت بحدة:
\- إنت بتتهرب مني ليه يا حسام؟ بقالك فترة كل ما أطلب أشوفك تقول لي عندك مشاكل في البيت، طب وأنا ذنبي إيه؟!
حسام زفر بضيق.
\- يا ريهام، أنا مش بتهرب منك، بس الظروف مش مناسبة.
ضحكت بسخرية.
\- ظروف إيه؟ نادين؟ إنت رجعت لها خلاص ولا إيه؟!
بصلها بضيق، وقال:
\- نادين مراتي، وأنا مش هسيب بيتي عشان إنتِ متضايقة إني مش فاضي لك.
اتغيرت ملامحها، وقالت بصدمة:
\- يعني إيه؟! إنت مش كنت بتقول لي إنك مش مرتاح معاها، وإنك مكمل عشان بنتك؟ مش إنت اللي قلت لي إنك بتحبني وإنك نفسك نكون مع بعض؟
حسام سكت لحظات، وبعدها قال:
\- أنا فعلًا كنت مرتاح معاكي، بس الموضوع كبر أكتر من اللازم.
ريهام ضربت بإيدها على الترابيزة.
\- كبر إزاي؟! هو أنا كنت بلعب معاك؟ أنا صاحبتها، وخسرت علاقتي بيها عشانك، وإنت دلوقتي هترجع لها وتسيبني أنا؟!
حسام رد بعصبية:
\- محدش طلب منك تخسري علاقتك بيها، وإنتِ كنتِ عارفة إني متجوز من البداية.
بصت له بذهول، وبعدها قالت بصوت مرتعش:
\- يعني أنا كنت نزوة في حياتك يا حسام؟! كنت بتتسلى بيا لحد ما زهقت ورجعت لمراتك؟!
حسام اتنهد، وحاول ينهي الكلام:
\- أنا ما قلتش كده، بس أنا مش هقدر أكمل بالشكل ده. أنا عندي بيت وبنت، ومش هفضل عايش بين نارين.
قامت من مكانها، وعينيها مليانة دموع.
\- لأ يا حسام، إنت لازم تختار. يا أنا يا هي. مش هقبل أفضل واحدة على الهامش في حياتك!
رفع عينيه لها، وقال بحسم:
\- وأنا اخترت بيتي. مش هسيب نادين وبنتي.
ريهام فضلت باصة له كأنها مش مصدقة إنه قالها بكل سهولة، وبعدها شالت شنطتها وقالت بوجع:
\- إنت كداب، وعمرك ما حبيتني. إنت كنت عايز واحدة تتسلى بيها، ولما خفت على بيتك رجعت تلعب دور الزوج المخلص!
حسام ما ردش، وهي خرجت من المكان وهي بتعيط، بينما هو فضل قاعد مكانه، حاسس إن العلاقة اللي دخلها هربًا من مشاكل بيته بقت هي نفسها مشكلة أكبر من قدرته على تحملها.
لكن الخلاف بينهم ما انتهيش عند كده.
ريهام فضلت تحاول تكلمه، تبعت له رسائل وتطلب منه يقابلها، وهو كان بيتجاهلها أغلب الوقت. ولما رد عليها أخيرًا، حصلت بينهم خناقة جديدة، انتهت بأنه قال لها بوضوح إنه مش عايز يكمل معاها، وإن كل واحد فيهم لازم يرجع لحياته.
أما أنا، فكنت في البيت بستقبله بابتسامة، وأسأله عن يومه، وأقرب منه كل ما يحاول يقرب مني، لحد ما بدأ يصدق إن علاقتنا ممكن ترجع زي الأول.
وفي يوم، دخل عليَّ الأوضة وأنا بجهز هدوم بنتنا، وقعد جنبي وقال:
\- نادين، أنا عايز أقول لك حاجة.
بصيت له بابتسامة.
\- خير يا حبيبي؟
مسك إيدي وقال:
\- أنا عارف إني قصرت معاكي الفترة اللي فاتت، وعارف إنك اتضايقتي مني، بس أنا مش عايز أخسرك. إنتِ مراتي، وإنتِ أهم واحدة في حياتي.
بصيت له طويلًا، وبعدها حطيت راسي على كتفه وقلت:
\- ربنا يخليك لينا يا حسام.
ابتسم وضمني لحضنه، وأنا فضلت ساكتة.
كان فاكر إن قربه مني معناه إني سامحته، وإن حضنه كفاية يمسح أي حاجة حصلت.
لكنه ما كانش يعرف إني كنت شايفة كل خطوة من البداية، وإن اللي عملته معاه ومع ريهام ما كانش مجرد غيرة ست على جوزها، بل كان درسًا قاسيًا لاثنين افتكروا إنهم يقدروا يخونوا ثقتي ويكملوا حياتهم عادي.
أما ريهام، فبعد ما خسرت حسام، بدأت تدرك إنها خسرتني أنا كمان، وإنها ما بقتش تملك لا الصداقة اللي فرطت فيها، ولا العلاقة اللي ضحت عشانها.
وأنا؟ كنت لسه ببتسم، ومستنية اللحظة اللي أقرر فيها إذا كنت هكمل مع حسام فعلًا، ولا إن رجوعه ليا مجرد خطوة في لعبة أنا اللي بدأتُها، وأنا الوحيدة اللي عارفة نهايتها.
كنت فاكرة إن الحكاية خلصت عند كده، وإن ريهام بعد ما خسرت حسام هتبعد عن حياتي، لكن واضح إن صاحبة عمري ما كانتش ناوية تخرج من الحكاية من غير ما تحاول توجعني زي ما وجعتها.
بعد ما حسام أنهى علاقته بيها، بدأت تبعت له رسايل من أرقام مختلفة، ولما اكتشفت إنه مش بيرد، قررت تلعب آخر كارت عندها، خصوصًا إنها كانت عارفة إن أكتر حاجة ممكن تكسرني هي إني أكتشف إن جوزي خانني فعلًا، مش مجرد شكوك في دماغي.
وفي يوم، كنت قاعدة في البيت براجع شوية حاجات تخص بنتي، لقيت رسالة من رقم غريب.
«مساء الخير يا نادين، أنا عارفة إنك مش هتحبي تسمعي مني، بس لازم تعرفي الحقيقة كاملة عن جوزك وصاحبتك.»
فضلت باصة للرسالة شوية، وبعدها كتبت:
«مين معايا؟»
الرد جه بسرعة.
«ريهام.»
ضحكت بسخرية، وكنت لسه هقفل المحادثة، لكن رسالة تانية وصلت.
«أنا وحسام كنا مرتبطين، ومش مجرد كلام عابر زي ما ممكن يكون قال لك. كان بيقابلني وبيكلمني، وكان بيقول لي إنه مش سعيد في جوازه، وإنه مكمل عشان بنته. أنا بس حبيت تعرفي إنك مش عايشة مع الراجل اللي إنتِ فاكراه.»
فضلت أقرا الرسالة أكتر من مرة، رغم إني كنت عارفة جزءًا كبيرًا من الحقيقة، لكن إن ريهام تبعت لي بنفسها وتعترف بعلاقتها بجوزي كان كفيل إنه يشعل الغضب جوايا من جديد.
ما رديتش عليها، لكني احتفظت بالرسائل، واستنيت حسام يرجع من الشغل.
ولما دخل البيت، استقبلته بشكل طبيعي، وحطيت له الأكل، واستنيت لحد ما خلص، وبعدها طلبت منه يقعد معايا.
بص لي بابتسامة وهو بيمسح إيده بالمنديل.
