الجزء التاني
فضلت واقفة مكاني، مش قادرة أستوعب اللي أنا شايفاه، وعيني بتتنقل بين مصطفى والست اللي على السرير. كانت ضعيفة جدًا، ووشها شاحب، وشعرها منكوش، وإيديها مربوطين في طرف السرير.
قربت منها خطوة، ولما النور وقع على وشها كويس، صرخت من الصدمة:
سعاااد؟! إنتِ سعاد؟!
دي كانت سعاد أخت مصطفى الكبيرة! الست اللي أعرفها من سنين، واللي عمرها ما أذت حد، وكانت دايمًا هادية وفي حالها. إزاي تبقى هي اللي محبوسة في البيت المهجور ده؟ وإزاي مصطفى يعمل فيها كده؟!
بصيت له وأنا مش مصدقة وقلت:
إنت إزاي تعمل كده في أختك يا مصطفى؟! إنت رابطها ليه؟ وإيه اللي حصل لها؟!
مصطفى قرب مني وقال بعصبية:
إنتِ مش فاهمة حاجة، وأنا مش هفضل أشرحلك! اللي شوفتيه هنا تنسيه، وترجعي بيتك كأنك ما جيتيش المكان ده أبدًا.
سعاد بدأت تعيط، ومدت إيدها ناحيتي على قد ما القيود سامحة لها، وقالت بصوت ضعيف:
ما تسمعيش كلامه يا بنتي.. والنبي ساعديني، أنا بقالي كتير هنا ومش قادرة أستحمل أكتر من كده.
بصيت لمصطفى وقلت:
طب فكها الأول! إنت سايبها بالشكل ده ليه؟ دي أختك، دي من لحمك ودمك!
رد عليا ببرود:
وأنا حر معاها، دي مشكلة عائلية ومحدش له دعوة بيها.
ساعتها فهمت إن الموضوع أكبر من مجرد خلاف بين أخ وأخته. بصيت لسعاد وسألتها:
هو عمل فيكي إيه؟ وإنتِ إزاي وصلتي للحالة دي؟
سعاد بصت لمصطفى بخوف، لكنه زعق فيها:
إياكي تنطقي بكلمة!
لكنها ماقدرتش تسكت أكتر من كده، وبدأت تحكي وهي بتعيط:
مصطفى طمعان في ورثي يا بنتي.. أنا ورثت من أبويا وأمي أرض وفلوس، وكنت عايشة من خيرهم، وعمري ما فكرت أظلم حد أو أحرم حد من حقه. ولما زميل ليا في الشغل اتقدملي، وكنت موافقة عليه، مصطفى وقف في طريقي ورفض الجوازة من غير سبب مقنع.
وقفت لحظة تاخد نفسها، وكملت:
كان عايزني أفضل من غير جواز، وتحت إيده، ويتصرف في ورثي زي ما هو عايز. ولما رفضت أسمع كلامه وقلت له إن ده حقي وأنا حرة فيه، اتغير معايا تمامًا.روايات صابرين محمد
كنت بسمعها وأنا مش قادرة أصدق. سعاد كملت وقالت إن مصطفى استغل ثقتها فيه، وخلاها تيجي معاه للمكان ده بحجة إن عنده موضوع مهم عايز يتكلم معاها فيه، وأول ما وصلت حبسها وربطها في السرير، ومن ساعتها وهي مش قادرة تخرج.
قالت وهي بتبكي:
كان بيجيبلي أكل قليل جدًا، وفي أيام كان بيسيبني من غير أكل، وكل ما أطلب منه يخرجني أو يرحمني، يقولي إن محدش هيعرف مكاني، وإنه مش هيسيبني غير لما ياخد اللي هو عايزه من ورثي.
بصيت لمصطفى وقلت له بصدمة:
يعني إنت كنت بتخرج كل ليلة وتكدب عليا وتقول رايح تصلي الفجر، وفي الحقيقة كنت جاي تحبس أختك وتجوعها؟! إنت إزاي قلبك طاوعك تعمل فيها كده؟!
مصطفى ما حاولش حتى ينكر، بالعكس، قرب مني وقال:
أنا قلتلك اللي شوفتيه هنا يفضل سر، وإنتِ مالكيش دعوة بورثها ولا بجوازها. أنا عارف مصلحتها أكتر منها.
رديت عليه وأنا مرعوبة وغضبانة:
مصلحتها؟! دي ممكن تموت من الجوع والتعب، وإنت بتقول مصلحتها؟!
اتعصب أكتر، وقرب مني وقال:
إنتِ شكلك نسيتي أنا قلتلك إيه من شوية. لو خرجتي من هنا وفتحتي بقك بكلمة، مش هسيبك تندمي لوحدك.
وقتها فهمت إن لازم أتصرف بحذر، لأن أي كلمة غلط ممكن تخليه يشك فيا. حاولت أغير طريقتي في الكلام، وقلت له بهدوء:
خلاص يا مصطفى، اهدى.. أنا مش هقول لحد حاجة. أنا عارفة إنك أخوها وإنك أدرى بمصلحتها، ويمكن إنت شايف إن ليك حق في اللي عملته، وإنك بتحاول تحافظ على ورثها من إنها تضيعه. أنا مش هتدخل بينكم، ولا هفتح الموضوع ده مع أي حد.
مصطفى بص لي شوية وكأنه بيحاول يتأكد إني بتكلم بجد، وبعدها قال:
يعني مش هتبلغي عني؟
رديت بسرعة:
طبعًا لأ، أنا مش عايزة مشاكل، ولا عايزة أهد بيتي بإيدي. كل اللي عايزاه إني أرجع البيت وخلاص.
فضل ساكت لحظات، وبعدها بدأ يهدى، وطلب مني أوعده إني مش هجيب سيرة اللي شوفته لأي حد. أكدت له إني هسكت، ولما حس إني مش هعمل له مشكلة، سمح لي أمشي.
خرجت من البيت وأنا بحاول أبان طبيعية، وما بصتش ورايا، لكن أول ما بعدت عن المكان واتأكدت إنه مش شايفني، جريت بكل قوتي ناحية البلد. كنت عارفة إن الوقت مش في صالح سعاد، وإنها ممكن تموت لو فضلت هناك أكتر من كده.
وصلت لأقرب مكان فيه ناس، وطلبت منهم يتصلوا بالشرطة، وحكيت لهم كل اللي شوفته، ووصفت لهم البيت المهجور والطريق اللي يوصل له.
وصلت الشرطة للمكان، ودخلوا البيت، ولقوا مصطفى لسه موجود، وسعاد مربوطة على السرير في حالة صحية صعبة. فكوا قيودها وطلبوا الإسعاف فورًا، واتقبض على مصطفى، واتنقلت سعاد للمستشفى عشان تتلقى العلاج بعد الفترة الطويلة اللي قضتها من غير أكل كفاية وفي ظروف قاسية.
ولما رحت أطمن عليها في المستشفى، مسكت إيدي وفضلت تعيط، وقالت لي:
أنا كنت فاكرة إن محدش هيوصل لي، وإنه هيسيبني أموت هنا من غير ما حد يعرف. ربنا بعتك ليا في الوقت المناسب.
ما قدرتش أمسك دموعي، وفضلت أطبطب عليها وأقول لها إن اللي حصل مش ذنبها، وإن حقها مش هيضيع.
أما مصطفى، فبقى يواجه عواقب اللي عمله، واتفتح تحقيق في حبسه لأخته ومحاولته الاستيلاء على ورثها.
وأنا رجعت بيتي مع ولادي، لكن صورة مصطفى وهو واقف قدام أختُه المحبوسة، وصوت سعاد وهي بتستنجد بيا، فضلوا يطاردوني.
عمري ما كنت أتخيل إن جوزي اللي كنت فاكرة إنه نازل كل ليلة يقرب من ربنا، كان بيستغل نفس الوقت عشان يعذب أخته ويستنى موتها طمعًا في ورثها!
ومن يومها عرفت إن أخطر حاجة إنك تكتشفي إنك عايشة مع إنسان ممكن يضحي بأقرب الناس ليه عشان الفلوس!تمت
صابرين محمد
