ضيقت عينيا وسألته:
وإنت خايف إني أفقده السيطرة؟ ولا خايف إني أبوظلك خطتك؟
سيف بص في عيني مباشرة، والمسافة بينا في العربية خلتني أحس بأنفاسه الهادية:
أنا مش بخاف يا ريتا… بس مش عايزك تتهاني. فؤاد لسانه لاذع، ومبيعرفش يلعب بطرق نظيفة، وأنا الليلة عندي صفقات محتاجة أخلصها مع وفد استثماري جاي من دبي، فمش عايز دماغي تتشتت.
رديت بثقة مكنتش عارفاها في نفسي منين جابتها:
متقلقش عليا. أنا شغالة مستشارة التزام ورقابة مالية بقالي ست سنين، يعني بتعامل مع أشخاص حادين مفيش في قلوبهم رحمة أكتر من عمك ده. متقلقش على الواجهة الاجتماعية بتاعتك.
سيف ملامحه لانت فجأة، وضحكة مكتومة خرجت من صدره:
واجهة؟ إنتِ لسه فاكرة إني واخدك واجهة؟
مش ده كان كلامك ليلة الفرح؟ إنتِ بالنسبالي ولا حاجة يا ريتا؟ ولا نسيت كلامك الجميل اللي سمعته وأنا لسه بفستاني؟
سكت، والمرة دي ملقاش رد فوري. عنيه تاهت لثانية في إيدي اللي كانت محطوطة على حجري، وبعدين رجع بص للطريق قدامه وقال بهمس واطي:
ليلة الفرح كان لازم يتقال فيها كلام محدد عشان الحدود تفضل واضحة.
والحدود لسه واضحة يا سيف… متقلقش، أنا حافظة دوري كويس.
وصلنا المتحف المصري الكبير، والمشهد كان مبهر ومرعب في نفس الوقت. السجادة الحمراء مفروشة، كاميرات الصحافة والقنوات الاقتصادية والاجتماعية على الجنبين، الفلاشات بتضرب في كل اتجاه كأنها عاصفة برق، ورجال الأعمال وسيدات المجتمع بكل المجوهرات والأناقة بيتوافدوا على المدخل العملاق قدام تمثال رمسيس الثاني.
العربية وقفت، السواق نزل فتح باب سيف. سيف نزل، قفل زرار بدلته، ولف ناحية الباب بتاعي ومد إيده ليا. بصيت لإيده الممدودة، كانت صوابعه قوية ودافية لما لمست كفي. نزلت ووقفت جنبه، وفجأة، حط إيده التانية ورا ضهري بلطف، بس بحزم كافي إنه يقربني منه بحيث ميبقاش في أي مسافة بينا.
همس في ودني وشفايفه قريبة جدًا من خصلات شعري:
ابتسمي… الكاميرات بتسجل أول صورة لمدام العزايزي.
ابتسمت، مش عشان أطاوعه، بس عشان أثبتله إني قده. الفلاشات نورت وشوشنا، والصحفيين بدأوا يرموا أسئلة سريعة: “بشمهندس سيف، مبروك الجواز! أستاذة ريتا، هل شراكة عيلة النابلسي والعزايزي هتأثر على قطاع المواني السنة دي؟”
سيف اكتفى بإيماءة راس هادية وثابتة، وسحبني معاه لجوه من غير ما يرد بحرف، ودخلنا القاعة الرئيسية اللي كانت مبهرة بكل المقاييس؛ أعمدة الإضاءة الحديثة متقاطعة مع عظمة التماثيل والآثار الفرعونية، والموسيقى الكلاسيكية هادية ومالية المكان.
أول ما دخلنا، عيون الحضور كلها اتعلقت بينا. الهمسات بدأت تلف القاعة، وكنت حاسة بنظرات الناس اللي بتفحصني، عايزة تشوف مين دي اللي قدرت تاخد سيف العزايزي بعد كل سنين العزوبية والانعزال اللي كان فارضهم على نفسه.
وقفنا في وسط القاعة، وناهد العزايزي، حماتي، كانت واقفة مع مجموعة سيدات مجتمع. أول ما شافتنا، قربت بخطوات هادية، لابسة فستان زمردي حرير، وملامحها الأرستقراطية الصارمة عليها ابتسامة محسوبة جدًا:
مساء الخير يا سيف… نورتي يا ريتا.
سلمت عليا وبوستني على خدي، وقالت بصوت واطي عشان محدش يسمع:
شكلك كويس، الفستان ذوقه راقي… سيف، السفير مستنيك في الصالون التاني مع المستثمرين الإماراتييين، ميعادك جه.
سيف بصلي، وكان متردد يسيبني لوحدي. لاحظت نظرته دي، وابتسمت له بهدوء وقلت:
روح شوف شغلك يا سيف، أنا هقف هنا مع طنط ناهد شوية.
قرب مني خطوة، ولمس دراعي بخفة:
ربع ساعة ومش هتأخر. لو احتاجتي أي حاجة تيم الحراسة واقف عند الباب الشرقي، وشادي السكرتير موجود هنا.
هزيت راسي، ومشي. بمجرد ما سيف بعد خطوتين تلاتة، والدته لفت ليا وقالت بنبرة مفهاش أي عاطفة:
خطوتك الأولى في العيلة دي كانت مظبوطة الليلة. متخليش حد يلاحظ أي توتر… عيون فؤاد وأولاده عليكي من ساعة ما دخلتي من الباب.
لسه هرد عليها، لقيت صوت خشن ومزعج بيقطع كلامنا:
أهلاً أهلاً… مرات الغالي! عروسة الموسم اللي ملحقتش تقعد في بيتها أسبوع.
لفيت، ولقيت راجل في أواخر الخمسينات، شعره رمادي مسحوب لورا، لابس بدلة مبالغ في تفاصيلها، وفي عينيه نظرة مكر مكشوفة… فؤاد العزايزي.
حماتي وقفت بجمود وقالت برباطة جأش:
أهلاً يا فؤاد. افتكرتك مشغول في دبي مش هتلحق الحفلة.
فؤاد ابتسم بسماجة وهو باصصلي:
ومين يفوت الليلة دي يا ناهد؟ لازم أبارك لابن أخويا، وأتعرف على بنت كمال النابلسي شخصيًا… ما شاء الله، كمال كان عليه ديون في السوق ومكانش عارف يسدهم، بس طلع عنده بضاعة أغلى بكتير عرف يسد بيها حسابه مع عيلة العزايزي وزيادة.
الكلمة كانت مستفزة. حماتي وشها شد وبدأت تفتح بقها عشان ترد بحدة، بس أنا سبقتها. خطوت خطوة لقدام، رفعت كاسي بهدوء، وبصيت لفؤاد في عينيه مباشرة بابتسامة باردة مفيهاش أي خوف:
بضاعة؟ واضح يا أستاذ فؤاد إن حضرتك خبرتك في السوق اتحصرت في المفاهيم الضيقة لدرجة إنك مبقتش بتعرف تفرق بين الأصول والالتزامات القانونية.
فؤاد اتفاجئ، وشه احمر للحظة وقال باستهزاء:
والله وبتردي كمان؟ فاكرة نفسك بقيتي واحدة مننا؟ إنتِ هنا لغرض معين يا شاطرة، وسيف أول ما ياخد اللي هو عايزه من الأسهم في الجمعية العمومية الشهر الجاي، هيرميكي برة القصر زي ما جابك. إنتِ ناسية مين أبوكي؟ ناسية إن شركته حصلت فيها مشاكل زمان؟ سيف مش بيحبك يا ريتا… سيف بيبصلك ومش بيشوف غير الماضي.
الكلمات كان هدفها الاستفزاز، بس مستحيل كنت هسمح له يكسرني. قربت منه أكتر، ووطيت صوتي بحيث يبقى تقيل وواضح:
