قصص

طلبت من جوزي ج١

حكاوي شيمو

جوزي رفض يديني مبلغ بسيط عشان أسددهم لجارتي بعد ما استلفتهم عشان أعالج ابنه، لكن في نفس اللحظة بعت لصاحبه مبلغ وقاله: «من عيني يا حبيبي، إنت تأمر»… ولما واجهته وسألته أنا وابنك مش أولى بجدعنتك؟ حصل نقاش حاد بينا، لكن اللي حصل بعد كده خلّى كل اللي في البيت يتصدموا!

 

أنا عمري ما كنت من الستات اللي بتطلب من جوزها فوق طاقته، ولا عمري كنت بحب أضغط عليه في المصاريف، بالعكس، طول عمرى بحاول أدبّر أمور البيت على قد الفلوس اللي بتدخل، وأشيل من هنا على هنا، وأستغنى عن حاجات كتير تخصني عشان العيال ما يحسوش إنهم أقل من غيرهم.

بس عمري ما تخيلت إن اليوم اللي هطلب فيه مبلغ بسيط عشان أرجعهم لجارتي، بعد ما استلفتهم عشان ألحق ابني المريض، هيتحول لخلاف كبير بالشكل ده!

جوزي من النوع اللي لما أطلب منه أي حاجة للبيت يقولي الدنيا غالية، والظروف صعبة، وإنتِ مش حاسة باللي أنا فيه، ولو قلتله إن العيال محتاجين هدوم شتوي أو إن في حاجة ناقصة، يقولي استني شوية، لما ربنا يفرجها.

وأنا كنت بسكت وأقول معلش، أكيد هو تعبان وبيهتم على قد ما يقدر، لكن اللي وجعني إني اكتشفت إن الظروف الصعبة دي بتظهر معايا أنا والعيال بس!

آخر مرة ابني تعب وسخن جامد، وكان باين عليه الإرهاق ومش قادر يتحرك، وأنا ما كانش معايا جنيه واحد في إيدي.
وقفت محتارة، أبص لابني وأفكر أعمل إيه، لحد ما اضطريت أخبط على جارتي وأستلف منها مبلغ بسيط.
خدت ابني وروحت بيه التأمين الصحي، وكشفت عليه وجبتله العلاج من هناك، وحاولت أوفر في كل حاجة، لدرجة إن الفلوس بالعافية كفت المواصلات ليا أنا والولد رايح جاي.

رجعت البيت وأنا قلبي مقبوض، مش عشان الفلوس، لكن عشان ابني كان تعبان، وعشان عارفة إني هضطر أطلب من جوزي يرجعلي الفلوس اللي استلفتها.
لما رجع من الشغل حكيتله اللي حصل، وقلتله: ـ ابني كان تعبان، وأنا ما كانش معايا فلوس، فاستلفت من جارتنا ومحتاجة تديني الفلوس عشان أرجعهالها، الست مش مقصرة معايا.

لقيته اتعصب وقال: ـ وإنتِ ليه تتصرفي من دماغك؟ ما كنتِ تستنيني!
بصيتله باستغراب وقلت: ـ أستناك إيه؟ الولد كان سخن ومش على بعضه، أسيبه لحد ما حضرتك ترجع من الشغل؟
قال: ـ خلاص، إنتِ اللي استلفتي، وإنتِ اللي تتصرفي وتسدي.

حاولت أهدّي الدنيا، لكن في اللحظة دي سمعت صوت واحد صاحبه بينادي عليه من تحت البيت.
نزل يكلمه، وسمعته بيقوله: ـ معلش يا صاحبي، إنت عارف اليومين دول الدنيا ملخبطة معايا، ابعتلي مبلغ ضروري، أنا حتى مش معايا رصيد أكلمك بيه.
واللي حصل بعدها خلاني مش مصدقة وداني!
جوزي رد عليه بمنتهى الود: ـ من عيني يا حبيبي، إنت تأمر.
وبالفعل بعتله المبلغ في ساعتها!

طلعتله على طول وقلتله: ـ إزاي يا فلان؟ إنت لسه من شوية بتقولي مش معاك، ودلوقتي بعت فلوس لصاحبك من غير حتى ما تفكر؟!
رد بكل برود: ـ أيوه، أنا حر في فلوسي، والراجل الجدع هو اللي يقف جنب صاحبه وقت الشدة.
ساعتها حسيت إن في حاجة اتكسرت جوايا، وقلتله: ـ طب وإحنا؟ أنا وابنك مش أولى بجدعنتك؟ ابنك كان محتاج دكتور وعلاج، وأنا نزلت بيه وأنا مش معايا حتى تمن المواصلات، واستلفت من الناس عشان ألحقه، وإنت بدل ما تقدر ده، بتقولي أنا اللي أسدد!

قال: ـ أنا موفرلكم الأكل والشرب، عايزة مني إيه تاني؟
قلتله: ـ علاج ابنك بقى رفاهية؟ هو أنا المفروض أعمل إيه لما ابني يتعب وما يكونش في إيدي فلوس؟ أروح أستلف من الناس كل مرة؟ وبعدين أسدد منين؟ أنا مش بشتغل، وإنت المسؤول عن البيت والعيال.

رد عليا بكلمة عمري ما هنساهاله: ـ روحي خدي من أبوكي وسددي، هو أنا ناقصك إنتِ كمان؟
وقتها زعلت جداً وقلتله: ـ هو أبويا هييجي يشيل بيتك كمان؟ إنت مش راجل مسؤول عن بيتك؟ ولا الرجولة عندك إنك تبعت فلوس لصاحبك وتعمل فيها جدع، لكن لما ابنك يحتاجك تقوله روحي لأبوكي؟!

ساعتها حصل نقاش وشد وجذب، وقلتله: ـ خلاص، أنا مش هسكت تاني، أنا هقعد في شقتي مع عيالي، وهجيب أهلي، ومش هفضل كل يوم أتحايل عليك عشان حق عيالك.
اتصلت بأبويا وأخواتي، وجم البيت، وأول ما شافوا حالتي عرفوا إن الموضوع أكبر من مجرد خلاف على فلوس.
ومن ساعتها والأهل داخلين خارجين، وكل واحد بيحاول يصلح، وسمعت نفس الجمل المعتادة: «عشان العيال يا بنتي». «البيوت ما بتتهدش بسهولة». «معلش، أكيد مش مقصود». «ارجعي بيتك، وكل مشكلة وليها حل».

لكن محدش فيهم كان عارف أنا جوايا إيه!
أنا مش زعلانة على الفلوس، ولا على إني استلفت من جارتي، ولا حتى على إني اضطريت أروح التأمين عشان أوفر في الكشف والعلاج.
أنا زعلانة إني بقيت أحس إن أبسط حقوق عيالي محتاجة مفاوضات، وإن مرض ابني مش كفاية يخلي أبوه يطلع فلوس من جيبه، لكن طلب صاحب جوزي كان كفاية يخليه يفتح محفظته من غير سؤال!

والأصعب من كل ده إنه لحد دلوقتي شايف نفسه ما غلطش، وبيقول إني كبرت الموضوع وإن الفلوس فلوسه وهو حر فيها!
لكن المفاجأة اللي حصلت النهارده كانت أكبر من كل اللي فات…
أبويا كان قاعد معانا، وجوزي دخل قعد قدامه، وبدأ يتكلم بثقة ويقول إنه مستعد يرجعني البيت، بس بشرط إني أعتذرله قدام أهلي، وأوعده إني ما أستلفش من حد تاني من غير إذنه، وإن أي مصاريف أحتاجها أطلبها منه وأستنى لحد ما يقرر يقدر يدفع إمتى!

أنا كنت بسمع ومش مصدقة، يعني حتى بعد اللي حصل، هو شايف إن المشكلة في تصرفي أنا!
لكن أبويا اللي كان ساكت طول القعدة، رفع عينه وبصله وقاله: ـ قبل ما تطلب منها تعتذر، أنا عايز أسألك سؤال واحد… إنت فاكر إن بنتي لما جتلي النهارده كانت بتحكيلي عن مبلغ بسيط؟!
جوزي اتلخبط وقاله: ـ أمال عن إيه؟
أبويا مد إيده في جيبه وطلع حاجة حطها قدامه على الترابيزة، ولما جوزي شافها، وشه اتغير تمامًا، وأخواتي بصوا لبعض في صدمة!
وساعتها أبويا قاله جملة محدش كان متوقع يسمعها: ـ أنا جاي النهارده مش عشان أرجّع بنتي لبيتك… أنا جاي علشان نتكلم في موضوع تاني خالص، وإنت لازم تسمعني للآخر!

يا ترى أبوها طلع إيه من جيبه؟ وإيه الموضوع اللي كان مخبيه عن جوزها؟ وهل الست دي هتقدر تحافظ على بيتها من غير ما تفرّط في كرامتها وحق عيالها؟

السابق1 من 2
تابع المقال

Leave a Reply

Your email address will not be published. Required fields are marked *

Check Also
Close
Back to top button