
ويقولي بحنية قدام الدادة اشربي يا حبيبتي عشان تتغذي والدوخة تروح.. كان بيضعفني بيه بالبطيء! كان بيأذي خلايا مخي ويدمر أعصابي عشان أفضل عامية، عشان مقومش، عشان أفضل البنت الهبلة المكسورة اللي بتلم وراهم القمامة!
سمعت خطوات دينا داخلة الحمام، وهنا أدركت إني لو فضلت نايمة وفتحت عيني فجأة لما ترش المطهر، هيحسوا بتغير في نظرتي.. نظرة الست اللي فاقت مش هتكون أبداً زي نظرة الست التايهة اللي مش عارفة هي فين.
استجمعت كل ذرة قوة في روحي، وبدأت أتحرك ببطء شديد، وأطلع صوت أنين واهي، كأني بصحى من كابوس تقيل.
غمضت عيني نص غمضة، وحركت راسي يمين وشمال كأني بتألم من الخبطة.
هشام رما الدخان بسرعة في الطفاية وقرب من الكنبة، حط إيده على كتفي وهزني
ياسمين؟ ياسمين.. إنتِ سامعاني؟ فتحي عينك يا بت!
فتحت عيني براحة خالص، وخليت نظرتي مشوشة، باصة في السقف في الفراغ، ومفيهاش أي تركيز. بصيت له ورجعت رمشت كذا مرة، وقولت بصوت بيترعش وضعيف جداً
أ.. أنا فين؟ راسي.. راسي وجعاني أوي.. هو إيه اللي حصل؟
دينا خرجت من الحمام ماسكة قزازة المطهر، وبصت
لهشام بترقب وخوف. هشام بصلها بإشارة من عينه إنها تقف مكانها وماتنطقش، وقعد على ركبه قدام الكنبة، ورسم على وشه فوراً قناع الزوج الطيب الحنين اللي بيخاف على نملة تدوس على مراته!
مسك إيدي، واللمسة دي كانت كفيلة تخليني أرجع من كتر الاشمئزاز، بس ضغطت على ضوافري في كفي التاني ومبينتش أي حاجة.
ألف سلامة عليكي يا روحي.. وقعتي وإنتِ بتلمي الكوباية وخبطتي راسك في الرخام. خوفتيني عليكي يا ياسمين! قولتلك ميت مرة متتعبيش نفسك في شغل البيت، إحنا عندنا خدم، بس إنتِ اللي بتصممي تتحركي.
الكلام نزل عليا زي الأذى، هو اللي كان لسه زاققني وشاتمني وقايلي يا فاشلة! ودلوقتي بيتكلم وكأنه ملاك نزل من السما!
بصيت لدينا اللي كانت واقفة بعيد، وابتسمت ابتسامة باهتة وقولت بتوهان مقصود
دينا.. إنتِ هنا من بدري؟ هو.. هو بابا فين؟ هي ماما مروحتش لسه؟
دينا وهشام بصوا لبعض بنظرة ارتياح وسخرية في نفس الوقت! النظرة دي قالتلي كل حاجة.. هما اطمنوا تماماً، وافتكروا إن الخبطة دي رجعتني أسوأ من الأول، وخلتني أخلط بين الحاضر والماضي أكتر وأكتر، لدرجة إني بسأل
عن بابا اللي رحل من
سنين، وبسأل عن أمي الله يرحمها!
دينا ضحكت ضحكة صفرا وقربت مني، حطت إيدها الباردة على شعري وقالت بتمثيل يقرف
حبيبتي يا ياسمين، شكلك لسه دايخة خالص. بابا زمانه جاي، وماما كمان هتيجي.. المهم إنتِ قومي بس خدي الدوا بتاعك وادخلي أوضتك التانية عشان ترتاحي وتنامي، إحنا مش عايزينك تتعبي خالص يا روحي.
أوضتك التانية.. الكلمة خبطت في قلبي زي الألم.
الأوضة التانية دي كانت أوضة الخزين الصغيرة اللي تحت السلم، الأوضة اللي نقلوني فيها من سنة بحجة إن صوتي بالليل وأنا بهلوس بيقلق نوم هشام، بينما أوضة نومي الرئيسية، سريري وعفشي ودولابي وكل ذكرياتي، بقت أوضة دينا وهشام!
اتسندت على الكنبة وقومت ببطء شديد، وكنت بتمايل كأني مش قادرة أشيل نفسي.. مسكت راسي بإيدي وقولت
حاضر.. أنا هدخل أنام.. بس.. بس هو جدي الحاج محمود مش هيجي النهاردة؟ كنت حاسة إني عايزة أشوفه..
ملامح هشام اتغيرت للحظة، وعينيه لمعت بغضب مكتوم، لكنه كتمه بسرعة وقال بصوت ناعم زي الحية
جدك مسافر يا ياسمين، عنده شغل في الإسكندرية ومش هيرجع غير بعد أسبوعين.. قولتلك الكلام ده الصبح ونسيتيه تاني. متفكريش في
حاجة بقى، وخليكي في سريرك.
مسافر الإسكندرية؟!
هنا ضرب جرس إنذار جوا عقلي.. جدي عنده عملية قسطرة في القلب وممنوع من السفر نهائياً بأمر الدكاترة من ست شهور! جدي مستحيل يسافر إسكندرية!
هشام بيكدب عليا ليه؟ وبيمنعني أشوف جدي ليه؟
هزيت راسي زي البلهاء وقولت
أه.. صح، أنا نسيت.. معلش يا هشام، راسي تقيلة أوي.
خرجت من الأوضة بخطوات بطيئة، ساندة على الحيطة كأني برحل، ونزلت السلم الصغير اللي بيودي على أوضتي الضيقة اللي تحت.
أول ما دخلت وقفلت الباب الخشب ورايا، سندت ضهري عليه وانهارت قواي تماماً.. قعدت على الأرض، وكتمت بوقي بكفي الاتنين عشان صوت شهقاتي وصراخي ميطلعش برة.
كنت بتنفس بصعوبة كأن الأكسجين اتسحب من الأوضة كلها.
الصور كانت عمالة تنهال على راسي ورا بعضها
صورتي وأنا في قاعة الاجتماعات الكبيرة في برج الجوهري، والمهندسين الكبار واقفين بيسمعوا ملاحظاتي على مشروع الساحل الشمالي.. صورتي وأنا بضحك في حضن بابا قبل ما يرحل.. وصورتي لما شوفت دينا أول مرة وهي داخلة بيتنا مع أمها، البنت الغلبانة المسكينة اللي كانت بتبص على لعبي وهدومي بحسرة، فقربتها مني وشاركتها
في كل حاجة بملكها، لحد ما كبرت وشاركتني في جوزي وعمري وحياتي!
والأبشع من ده كله.. يوم بحيرة قارون!
اليوم ده رجع بكل تفصيلة، كأنه بيحصل قدامي دلوقتي حالا.
كنت رايحة الشاليه بتاعنا في الفيوم عشان أعمل مفاجأة لهشام بمناسبة عيد جوازنا التاني.. دخلت ملقيتوش في البيت، وسمعت صوت ضحك جاي من ورا الشجر القريب من البحيرة.. مشيت على طراطيف صوابعي عشان أفاجئه، بس المفاجأة كانت عليا أنا!
كان واقف على حافة المية، حاضن دينا من ضهرها، ودينا بتضحك وبتقوله هتطلقها إمتى بقى يا هشام؟ أنا زهقت من دور الأخت الكيوت اللي جاية تقعد معاكوا أسبوع!.. وهو بيرد عليها أطلقها إيه يا مجنونة؟! ياسمين لو اطلقت مش هاخد من جدها مليم أحمر، ياسمين دي الفرخة اللي بتبيض دهب، لازم نفضل ماسكين في رقبتها لحد ما ننقل كل الأصول باسمي!
وقتها خرجت من بين الشجر وأنا بصرخ وبقوله يا غدار! يا غدار!..
افتكرت وشه وهو بيتحول لذئب.. مكنش خايف، مكنش مكسوف.. عينيه كانت مليانة غدر وشر مقرف.
جري عليا ومسكني من رقبتي، ودينا كانت واقفة وراه وبتقوله برعب هشام لا! متفضحناش!.. لكن هشام زقني بكل قوته ناحية الحافة،
ونزلت على صخرة كبيرة
في المية، راسي اتفتحت، والمية دخلت في ريتي، وآخر حاجة شوفتها قبل ما أغيب عن الوعي كانت عيونه وهو بيبصلي ببرود، واقف حاطط إيديه في جيوبه ومستني المية تبلعني!




