
تاني يوم الصبح، الشمس كانت لسه بتشقشق.. الساعة كانت حوالي ستة الصبح. خرجت من الأوضة بهدوء، لابسة البيجامة الباهتة وشعري منكوش، ودخلت المطبخ وبدأت أعمل الشاي زي ما هما متعودين. شوية وسمعت صوت خطوات نازلة من فوق.. كانت دينا، لابسة طقم خروج شيك، وحاطة ميك أب كامل كأنها رايحة فرح.
بصتلي باحتقار وقالت هشام نازل دلوقتي، جهزي الفطار بسرعة، وركزي المرة دي مش ناقصين تكسير أطباق من الصبح!
هزيت راسي بخنوع وقولت بصوت واطي حاضر يا ست دينا.. حاضر.
ست دينا.. الكلمة طلعت مني عادية، بس كانت مسمومة، ودينا بلعت الطُعم وابتسمت بغرور وهي بتعدل غوايشها الدهب غوايش
أمي اللي كانت سرقاهم من درج تسريحتي!
نزل هشام وراها، لابس بدلته الكاملة، وشكله كان رايق وواثق من نفسه زيادة عن اللزوم. قعد على السفرة، وقربت منه حطيت قدامه طبق البيض وعصير البرتقال. مسك كوباية العصير، وقبل ما يشرب، بصلي بنظرة متفحصة وقال عاملة إيه النهاردة يا ياسمين؟ راسك لسه بتوجعك؟
عملت نفسي بفتكر بالعافية وقولت شوية.. بس أحسن من امبارح.. هو.. هو أنا وقعت امبارح فين يا هشام؟
ضحك بهزوة وبص لدينا وقال شوفتي؟ الهبلة نسيت أصلاً إنها اتخبطت! وبعدين لف ليا وقال بتمثيل رخيص ما تشغليش بالك يا حبيبتي، النهاردة الدكتورة ميرفت هتيجي تكشف عليكي بعد الضهر وتطمنا على راسك.. خليكي هادية وطيوبة، واليوم هيعدي على خير.
حاضر يا حبيبي.. ربنا يخليك ليا وميحرمنيش منك أبداً.
الجملة دي خرجت من شفايفي بابتسامة بلهاء، وهشام ودينا تبادلوا نظرات النصر المقرفة. هشام خلص فطاره وقام، وباس دينا من خدها قدامي من غير ذرة حياء، وخرجوا هما الاتنين مع بعض وركبوا العربية عشان يروحوا ميعاد المحامي.
أول ما صوت موتور العربية بعد عن بوابة الفيلا، واتأكدت إن الشغالة اللي بتيجي باليوميات لسه ميعادها
كمان ساعتين، اتحولت لشخص تاني تماماً!
جريت على باب الفيلا وقفلت الترباس من جوة. طلعت على أوضة المكتب، وقفت قدام اللوحة الزيتية.. مكنتش عايزة أفتح الخزنة تاني عشان مسبش أي أثر، بس كنت محتاجة وسيلة اتصال. دورت في أدراج المكتب المقفولة، وكسرت قفل الدرج اللي تحت بمفك صغير كنت جايباه من المطبخ. لقيت خط تليفون قديم، ولقيت شاحن.. ركبت الشاحن في تليفون هشام القديم اللي كان راميه في الدرج وفتحته.. البطارية نورت!
طلعت الرقم اللي جدي كان مديهوني وأنا في الجامعة ومستحيل أنساه في حياتي، رقم المكتب الخاص بالمستشار فريد التهامي. إيديا كانت بتترعش وأنا بضرب الأرقام.. التليفون رن.. رنة.. اتنين.. تلاتة.. وفجأة، جه صوت راجل وقور وهادي ألو؟ مكتب المستشار فريد التهامي، مين معايا؟
كتمت شهقتي، وقربت السماعة من بقي وهمست بصوت مبحوح ومليان لهفة عمو فريد.. أنا ياسمين.. ياسمين الجوهري!
الخط سكت تماماً لثواني.. ثواني حسيتها سنين ضوئية، وبعدين سمعت صوت الأستاذ فريد وهو بيتكلم بلهفة وصدمة مش قادر يداريها ياسمين؟! يا بنتي.. إنتِ عايشة؟! إنتِ بتتكلمي بوعيك؟! هشام الشناوي قايل للكل إنك في شبه
غيبوبة ومبتعرفيش حد
وجدك..
قاطعته بسرعة وبنبرة قاطعة عمو فريد، اسمعني ومتقاطعنيش أرجوك، الوقت مش في صالحنا! أنا ذاكرتي رجعت كاملة.. هشام حاول يخلص مني في الفيوم من تلات سنين، وبيدسلي منوم في الأكل، وبيغدر بيا مع دينا في بيتي! وقريت رسالة جدي اللي في الخزنة.. وعرفت كل حاجة عن رحيل بابا وعن أصل هشام! قولي يا عمو فريد.. جدي فين؟! هشام عمل في جدي إيه؟!
الأستاذ فريد اتنفس بعمق وقال بصوت واطي ومشدود جدك في مستشفى دار الفؤاد في أكتوبر يا ياسمين، تحت حراسة مشددة عاملها هشام بحجة إنه بيحميه من التوتر! جدك اتعرض لجلطة خفيفة من شهرين لما عرف إن هشام بيحاول يزور توكيل رسمي عام باسمك لنقل أسهم الصندوق، وهشام منع أي حد من العيلة يدخل يشوفه.. والنهاردة، هشام محدد معايا ميعاد الساعة ١٢ الضهر في مكتبي عشان يقدملي تقرير طبي جديد من الدكتورة ميرفت يثبت عجزك التام، عشان يعزلني قانونياً بصفتي الوصي القانوني التاني على الصندوق!
مسكت حرف المكتب بقوة، وضوافري غرزت في الخشب الدكتورة ميرفت جاية هنا الفيلا الساعة اتنين بعد الضهر عشان تكتب التقرير ده.. يعني هو رايحلك من غير التقرير؟
لأ
يا ياسمين، هو ميعاده معايا مش عشان يستلم، هو قايلي إن التقرير هيوصله على المكتب بمندوب من المستشفى، وهو رايح يضغط عليا أوقع على إخلاء مسؤوليتي وفتح الصندوق بناءً على التقرير ده.. هشام معاه شبكة من المرتشين في الشهر العقاري يا بنتي، لو الورقة دي اتختمت، إنتِ وجدك هتكونوا في الشارع، وأخاف أقولك إنه ممكن يخلص عليكم جسدياً بعدها بساعات!
ابتسمت ابتسامة باردة، ابتسامة ياسمين الجوهري اللي كان هشام بيترعب من ذكائها في الشغل مش هيحصل يا عمو فريد.. اسمعني كويس أوي ونفذ اللي هقولك عليه بالحرف الواحد.. إنت هتقابل هشام عادي، وهتمثل إنك موافق ومستسلم للأمر الواقع، بس هتأجل التوقيع النهائي بحجة إن السيستم بتاع الشهر العقاري واقع لحد الساعة تلاتة.. وفي نفس الوقت، عايزة منك عربية خاصة وسواق تثق فيه، يكون واقف قدام سور الفيلا الخلفي الساعة واحدة ونص بالظبط.. ومعاه لبس خروج مقفول، ونضارة شمس.. ومعاك أمر من النيابة أو تسجيل يثبت تواطؤ دكتورة ميرفت! تقدر تجيب ده؟
الأستاذ فريد سكت ثانية، وبعدين ضحك ضحكة قصيرة مليانة فخر بنت الحاج محمود رجعت بجد! دكتورة
ميرفت دي أصلاً عليها بلاغات سابقة في نقابة الأطباء بس كانت بتطلع بكفالات.. أنا معايا تسجيل لمساعدها وهو بيتفاوض على رشوة سابقة.. متقلقيش، نص ساعة والورق هيكون في إيدي. بس إنتِ ناوية تعملي إيه يا ياسمين؟ هتهربي؟




