
في اللحظة دي، مكنش فاضل عندي ذرة شك واحدة.
بصيت في عين جوزي، وسألته بصوت واضح ومسموع للكل: أحمد… إنت فعلاً اتفقت مع مامتك إمبارح إنها تاخد الأكل اللي أنا هطبخه النهارده وتديه لمنى؟
أحمد اتردد ثانية، وبص لأمه، وبعدها بصلي بتوتر: يا ستي منى كان عندها ضيوف ومزنوقة، وأنا قلت لماما لما تطبخي تبقى تبعتلها شوية، فيها إيه يعني؟
فيها إنك مقلتليش! فيها إنك خليتني أنزل أشتري بفلوسي وأقف خمس ساعات على رجلي، وإنت عارف إن الأكل ده رايح لبيت تاني!
ما هو أنا كنت ناوي أقولك بالليل وأعوضك، بس إنتِ دايمًا بتاخدي الأمور بحساسية!
قربت منه خطوة، وقلت بصوت واطي لكن حاد زي الموس: وقولتلها كمان إني هتقمص وأعمل مشكلة، وفي الآخر مش هقدر أفتح بُقي قدام بنتي؟!
وش أحمد اتخطف!
بص لأمه بصدمة كأنه بيقولها إنتِ قولتلها الكلام ده إزاي؟!.
سعاد ارتبكت وقالت: أنا مقولتش حاجة، هي اللي بتألف كلام من دماغها!
أحمد حاول يلم الموقف بسرعة، فمد إيده ناحية المطبخ وقال بعصبية: خلاص يا نادية! الموضوع خلص! ادخلي هاتي العلب خلينا نخلص من الليلة دي!
وقفت قدامه، وقلت بثبات: لو دخلت المطبخ وجبت العلب دي بإيدك واديتها لمنى، اعتبرني من اللحظة دي بره حياتك يا أحمد.
الصالة كلها سكتت.
حتى منى اللي كانت بتبرطم بصوت واطي، وقفت مكانها وبصت لأخوها تشوف هيعمل إيه.
أحمد بصلي بذهول، مكنش متخيل إني ممكن أوصل للدرجة دي علشان شوية أكل، ومكنش فاهم إن الموضوع بالنسبالي مبقاش أكل خالص… ده بقى كرامة وبيت اتسرق من صاحبته.
منى مقدرتش تمسك لسانها، فانفجرت في وشي: إنتِ بتهددي أخويا في بيته؟! على فكرة بقى، لولا أحمد مكنتيش عرفتي تعيشي العيشة دي أصلاً! ده أخويا عمره ما استخسر فينا حاجة، حتى الجمعية اللي قبضها الشهر ده وقرض الشغل كله…
وفجأة، سعاد خبطت منى بكوعها في جنبها بقوة، وزعقت فيها: اسكتي يا منى! يلا امشي دلوقتي!
أنا اتجمدت مكاني!
عيني اتنقلت بين منى اللي حطت إيدها على بُقها فجأة، وبين سعاد اللي وشها اصفرّ، وبين أحمد اللي حسيت إن الحيوية هربت من وشه كله!
سألت بصوت مبحوح من الصدمة: جمعية إيه؟! وقرض شغل إيه يا أحمد؟!
أحمد بلع ريقه بصعوبة، وحاول يضحك ضحكة صفرا بايظة: مفيش حاجة، منى بتخرف، هي متعرفش حاجة عن شغلي أصلاً!
لف لمنى وقالها بحدة غريبة: يلا يا منى امشي دلوقتي، وأنا هطلبلك أكل دليفري من أحسن مطعم يوصلك قبل ضيوفك ما يوصلوا، يلا!
منى خدت شنطتها وخرجت وهي بتبص وراها بتوتر، وسعاد دخلت أوضتها وقفلت الباب وراها بسرعة من غير ما تنطق بكلمة تانية.
فضلت أنا وأحمد لوحدنا في الصالة.
قرب مني وحاول يمسك إيدي: حبيبتي اهدي، أنا داخل آخد دوش علشان أعصابي تعبت، ولما أخرج هنتكلم ونتفاهم في كل حاجة، متزعليش نفسك.
سحب إيده بسرعة قبل ما أرد، ودخل الحمام وقفل الباب بالمفتاح.
فضلت واقفة في نص الصالة، قلبي بيدق بسرعة مش طبيعية.
الجملة بتاعة منى كانت بتلف في دماغي: الجمعية اللي قبضها الشهر ده وقرض الشغل….
أحمد قايلي إنه ممعهوش فلوس!
وقايلي إنه بقاله تلات أسابيع بيتأخر في الشغل علشان ضغط المشاريع!
بصيت على الكرسي اللي جنب الباب، كان رامي عليه جاكيت البدلة وشنطة اللابتوب.
مشيت ناحية الجاكيت وإيدي بتترعش، ومديت إيدي في الجيب الداخلي.
ملقتش غير محفظته، وورقة مطوية بعناية جوه ظرف أبيض صغير.
طلعت الورقة، وفتحتها تحت نور الصالة…
كان إيصال تحويل بنكي مختوم بتاريخ امبارح، بمبلغ مية وعشرين ألف جنيه، رايح لحساب باسم شريف محمود عبد الرحمن جوز منى!
وتحت الإيصال، كان فيه ورقة تانية صغيرة… عقد إيجار شقة جديدة في منطقة راقية، باسم سعاد ومنى، ومدفوع مقدمها بالكامل!
إيدي ارتعشت والورقة وقعت مني على الأرض، وأنا ببص لباب الحمام المقفول، وبفتكر كل مرة جوزي قالي فيها: معلش يا حبيبتي، الظروف صعبة اليومين دول… استحمليني!




