جوازكم انتهى ويا ريت ينتهي طالما ما بقيتيش حاسة بأمان في بيته. إوعي تفضلي معاه عشان صعبان عليكي، ولا تمشي عشان حد قالك امشي اختاري إنتي عشان افتكرتي كرامتك وقيمتك.
ريتال وقفت القراية ثواني الدموع زغللت عينها.
وبالنسبة للبيزنس إوعي توقعي على أي ورقة يحطها قاسم أو أبوه قدامك! اسمك يمكن يكون اتستخدم في عقود وضمانات إنتي ما شفتيهاش أصلاً! هاتي محامي مستقل يراجع كل حساب وكل أصل وكل أرض تابعة لـ حسني الجروب.
ولو نيرة اتصلت بيكي افتكري إنها مش لغز ولا عقدة، دي إنسانة فضلت سنين خايفة تقرر هي تنتمي لفين.
والجواب انتهى بسطر أخير:
إنتي مش مديونة للعيلة دي بسكوتك يا ريتال .
طبقت ريتال الورقة بحرص.
صوت تككت الساعة في الصالة كان هو الصوت الوحيد.
أبوها قال بصرامة: احنا لازم نجيبلك أكبر محامي في مصر فوراً.
أنا موافقة يا بابا.
وميكونش له أي علاقة بـ حسني الجروب ولا بيزنس قاسم !
أكيد.
أمها بصت ناحية الشباك: تفتكري قاسم يعرف موضوع نيرة ده؟
افتكرت ريتال وش قاسم في الحفلة القرف، عدم الندم، والطريقة اللي بص لها بيها كأنها ضيفة ثقيلة!
ردت: أنا ما أعرفش هو يعرف إيه وميعرفش إيه بس أعرف إنه عمره ما كان راجل معايا ولا حكالي حاجة.
فجأة الموبايل رن!
على الشاشة ظهر اسم: قاسم .
ريتال بصت للتليفون وسابته يرن لحد ما فصل.
بعديها بثانية رن رقم تاني غريب!
فكرت ثواني وبعدين فتحت الخط: ألو؟
فضلت السكة ساكتة لعدة ثواني مفيش غير صوت نفس هادي.
وبعدين صوت ست اتكلمت:
أنا بكلم ريتال ؟
أيوه أنا ريتال .
أنا نيرة .
ريتال اتسمرت مكانها!
أمها ماجدة حطت إيدها على كتفها بلهفة.
سألتها ريتال بصوت بيرتعش: إنتي فين؟
أنا مش بعيد عنك قريب من البيت.
بصت ريتال من الشباك على طريق رأس البر والورد اللي جنب الشاطئ الشارع كان فاضي تحت شمس بعد الظهر.
إنتي برة البيت؟!
لأ أنا في لوكاندا صغيرة هنا في رأس البر.
إيد ريتال اتشدت على الموبايل: جبتي نمرتي منين؟
الحاجة إلهام هي اللي ادتهالي قبل ما وقالتلي ما أستخدماش إلا لما أكون مستعدة.
وليه دلوقتي بالذات؟
لأن أنا عرفت إنك سبتي قاسم ورميتي ورقة الطلاق في وشه الليلة اللي فاتت.
لمعرفة دي خلت ريتال تقلق: أنا آسفة
ردت نيرة : آسفة على إيه؟ كأنني كنت مستنية جوازكم يفشل عشان أكلمك!
لأ مش قصد كده.
ولا أنا بس أنا عارفة يعني إيه الانتظار، وعارفة المرار اللي إنتي حاساه دلوقتي.
قعدت ريتال على الكرسي بالراحة. صوت نيرة كان أهدى وأدفى مما اتوقعت، فيه حذر بس فيه حنية غريبة.
قالت نيرة : أنا قابلت الحاجة إلهام 3 مرات بعد ما لقيتني أول مرة كنت هربانة ومنزوية، فاكراها جاية ترجعني للعيلة عشان ترضي ضميرها.
وكانت جاية لده؟
لأ كانت جاية تتطمن عليّ، وجابتلي صندوق فيه صوري وأنا صغيرة، واعتذرتلي من غير ما تدافع عن البلاوي اللي أبوي وعيلتي عملوها.
بصت ريتال للصورة اللي على المكتب: وهي حكتلك عن قاسم ؟
قالتلي إنه كان عيل لما أنا مشيت وقالتلي كمان إنه كبر وبقى راجل فاكر إنه يقدر يهرب من الكوارث عن طريق إنه يضحك على الناس ويغيبهم.
تنهدت ريتال بتعب: كلامها صح 100%.
نيرة ضحكت ضحكة صغيرة مفيهاش فرحة: أنا آسفة إن بكلمك في الظروف دي.
مش لازم تعتذري عن تصرفاته.
عارفة وبدأت أتعلم ده.
الكلام بين السلفات كان فيه قرابة وتفاهم غريب!
بصت ريتال للملفات وسألتها: الحاجة إلهام قالت إنك كنتي بتدوري عليّ؟
كنت بحاول اعرف هل اتصالي بيكي هيساعدك ولا هيضرّك.
يزودني بإيه؟
بالحقيقة.
بصت ريتال لأبوها وأمها أبوها هز رأسه كأنه بيشجعها تتكلم.
حقيقة إيه يا نيرة ؟
سكتت نيرة فترة طويلة جداً لدرجة إن ريتال افتكرت الخط اتقطع!
وبعدين قالت: اسمك مكتوب على عقود وضمانات قروض لشركة حسني الجروب واسمي أنا كمان مكتوب! الحاجة إلهام اكتشفت إن قاسم وأبوه كانوا بيجهزوا ينقلوا ديون الشركة القذرة كلها على شركة وهمية باسمك واسمي، قبل ما مجلس إدارة الجروب يعرف حجم الخسائر والبلاوي!
صدر ريتال اتعصر: واسمي أنا يدخل ليه في قروض وديون البيزنس؟!
لأنك مراته! وحسب العقود اللي الحاجة إلهام شفتها، قاسم مضى على ضمانات بمليارات باستخدام أصل ممتلكاتك وممتلكات الجواز!
بصت ريتال لأبوها مسك أبوها ورقة من على المكتب وقرأها وقال بصوت واطي: اسأليها هل التوقيعات دي موثقة في الشهر العقاري؟
كررت ريتال السؤال.
