الت الجدة: هي مش بتلومك يا ريتال إوعي تفتكري إن سكوتها ده قسوة، هي كانت بتحاول تقرر هل لو اتصلت بيكي هتكتف حريتك وتزيد همك، ولا هتفوقك وتديكي حريتك.
التسجيل سكت ثواني والجدة كملت بصوت أهدى: لو اتصلت بيكي اسمعيها قبل ما تحكمي عليها. نيرة عاشت عمرها كله تدفع تمن قرارات ناس فاكرين إنهم بيحموا العيلة وأنا نفسي أخدت قرارات غلط في حقها. لو اتصلت اسمعيها.
الريكوردر فصل وطفى.
محدش في الأوضة كان ينطق. صوت موج البحر كان يخبط في شط رأس البر بصوت منتظم.
ريتال حست بالطفل بيرفس رفسة خفيفة تحت ضلوعها. حطت إيدها على بطنها وبتحاول تترجم اللغز: نيرة موجودة وعايشة الحاجة إلهام لقيتا وفيه حد بيمشي ورا خطاي وبيراقب حياتي من بعيد وجوة الملفات اللي على المكتب دي الحقيقة اللي هتفهم كل حاجة.
أبوها فتح الملف الثاني وقال: دي سجلات الشركة وحساباتها لازم نفهم الحاجة إلهام كان قصدها إيه بخصوص البيزنس.
هزت ريتال رأسها وهي لسه باصة للصورة.
الورق كان مترتب بالتواريخ؛ شركة حسني الجروب بدأت كشركة مقاولات صغيرة عملها جد قاسم بعد الحرب، وعلى مدار 30 سنة اتوسعت في العقارات، والقروض الخاصة، والبورصة.
في الأول، الأرقام كانت عادية ومترتبة وبعد كده، الأرقام بدأت تتلغبط وتبقى مش مفهومة!
شركات كتير تابعة للجروب كانت واخدة قروض بضمان عقارات قيمتها متبالغ فيها جداً! وفلوس بتمشي بين الحسابات السرية، وقروض بتطلع لشركات وهمية تابعة لـ حسني أبو قاسم من غير أوراق رسمية!
قرت ريتال صفحة والتانية والتالتة وسألت أباها: هو الشغل ده قانوني يا بابا؟
أبوها قرب من الورق: فيه منه قانوني وفيه حاجات تانية غسيل أموال وقضايا تودي في داهية!
داهية إزاي؟
قروض لأشخاص قرايب، ديون مش مكتوبة في الميزانية لو الكشوفات دي صحيحة ومضبوطة، الشركة دي مديونة بأرقام تخليها تفلس وتتحبس في أي لحظة!
ذكريات قديمة فرقعت في دماغ ريتال ؛ قاسم على طرابيزة الفطار في الشقة الدوبلكس، حاطط الموبايل على ودنه وبيزعق: الأرقام هتتظبط أول ما نقفل الميزانية!
ولما كانت بتسأله فيه حاجة؟ كان يبتسم ببرود ويقولها: مفيش حاجة تهمك يا حبيبتي، خلكي في فساتينك.
ساعتها كانت بتصدقه!
الملف الثالث فضل مقفول زي ما هو ومكتوب عليه بالأسود العريض:
لـ ريتال فقط.
أبوها مد إيده للملف وبعدين وقف: ده ليكي إنتي يا بنتي افتحيه بنفسك.
ماجدة أمها قربت ووقفت جنبها.
فكّت ريتال الشريط الأحمر
جوة كان فيه جوابات، قصاقيص جرايد، وملف أزرق رفيع.
أول جواب كان من الحاجة إلهام لمحامي اسمه الأستاذ كمال خليل:
أنا تأكدت إن نيرة عايشة مش هطالب بحضانتها رسمياً، بس ناويه أأمن ميراثها ووقفها في مكان محدش من العيلة دي يقدر يحط إيده عليه.
الورقة اللي بعديها كانت عقد وقف وتأسيس صندوق.
قرت ريتال أول بند مرتين ومش مصدقة عينها!
الوقف ما كانش لـ نيرة لوحدها كان فيه اسم تاني مكتوب كـ مستفيد رئيسي!
ريتال عبد الفتاح الألفي.
اسمها مكتوب تحت اسم نيرة بالخط الأسود العريض!
قلب ريتال بدأ يدق كأنه طبلة: يعني إيه الكلام ده يا بابا?!
أبوها قرأ الصفحة بسرعة وقال: معناه إن الحاجة إلهام قسمت الوقف والشركات الخاصة بينك وبين نيرة بالنص!
طب ليه أنا؟!
الإجابة كانت جوة الجواب اللي بعده بخط الجدة:
ريتال عندها قوة هادية ومستخبية، عيلتي العبيطة دي هتستهون بيها ونيرة عندها شخصية وقوة هما عمرهم ما فهموها. لو الاتنين اتقابلوا، أنا عايزاهم هما الاتنين يبقوا أحرار، وعندهم استقلال مالي وما يحتاجوش لقرش واحد من عيلة حسني.
نزلت ريتال الورقة وإيدها بتهتز. إحساس غريب أوي إن ست كبيرة تشوف فيكي حاجات جوزك نفسه ما شافهاش! الحاجة إلهام شافت الأسئلة اللي ريتال كانت بتكتُمهَا، والسكوت اللي كانت بتسكتُه عشان البيت يمشي، حتى لو على حساب كرامتها.
أمها مسكت دراعها: الحاجة إلهام كانت مآمنة بيكي يا بنتي.
أنا ما لحقتش أعرفها كفاية يا أمي!
ساعات الناس بتعرف جوهر بعض من غير ما يقعدوا مع بعض سنين.
افتكرت ريتال السلسلة الفضة اللي في رقبتها
وفجأة، في قاع الملف الأزرق، كان فيه ظرف أبيض مكتوب عليه بخط الجدة:
يتفتح بعد ما ريتال تسمع التسجيل.
فكت ريتال الختم وجوة كانت ورقة واحدة:
عزيزتي ريتال
دلوقتي إنتي عرفتي سر نيرة . وعرفتي إن قاسم وأبوه نفس الطينة ونفس الأسلوب. أنا مش بطلب منك تسامحي قاسم ؛ الخيانة طبع وقذارة، والغرور مرض، وقلة الاحترام لست واقفة جنبك ملهاش مبرر. بس بطلب منك تفصلي بين قلة أدبه وخيانته، وبين الأسرار اللي اتربى إنه يشيلها.
