قالت: عايزة الحقيقة عايزة اسمي يتتمسح من أي عقد أو ضمانة ما وقّعتش عليها برغبتي. عايزة حقوق قانونية كاملة ومحترمة للطفل اللي في بطني. وعايزاك تبطل تتكلم عني كأني عقبة في طريق مستقبلك.
بلع قاسم ريقه: أنا عمر ما هحرمك من ابننا ولا هقف في طريقك.
أنا ما قولتش إنك هتعمل كده.
بس إنتي شايفاني راجل خطر وخاين!
أنا شايفه إنك راجل تقادر تاخد قرارات أنانية من غير ما تفكر هي بتهد اللي قدامك إزاي وده سبب كافي إني أحط حدود حمراء بيني وبينك.
بص لـ نيرة : وهتاخدوا الوقف؟
ردت نيرة قبل ما ريتال تتكلم: الوقف ده عمره ما كان حقك ولا حق أبوك عشان تديه أو تاخده!
وش قاسم جمد ريتال عرفت النظرة دي كويس، دي النظرة اللي بتجيله لما السيطرة تروح من إيده!
بس المرة دي، تحت الغضب، كان فيه حزن وانكسار حقيقي. يمكن ظهور نيرة فتح جرح قديم جوه منه كان شايف إن الناس في حياته كبروا واتحركوا وهو لسه محبوس في كدب أبوه والبيزنس!
قال بصوت مكسور: أنا ما بقيتش عارف أعمل إيه
صدقته ريتال
فردت: تقدر تبدأ بأنك تقول الحقيقة وتتوقف عن التزوير.
بص لها قاسم لفترة طويلة وبعدين هز رأسه: هخلي رفعت راضي يسلم كل الأوراق والمستندات للمحامية فريدة.
تمام.
ويا ريتال
نعم؟
بلاش تقفلي الباب في وشي لما أجي أطمن على الولد
ردت بصلابة: ما تجيش هنا من غير ما تتصل الأول وتستأذن.
الطلب جرح غروره، بس ما حافش يجادل.
هز رأسه ومشيت خطوتين ناحية العربية وركب، والعربية مشيت واختفت في طريق رأس البر.
—
في الأسابيع القليلة اللي بعد كده الحقيقة اتكشفت كلها.
خبير البصمات والتزوير أثبت إن توقيع ريتال متنسخ من عقود قديمة، وعقود التنازل اتلغت رسمياً. الأستاذة فريدة قدمت الطعون القانونية، والممتلكات اتحطت تحت الحراسة والمراجعة المستقلة.
توفيق حسني (أبو قاسم ) استقال من مجلس إدارة الجروب قبل ما التحقيقات تبدأ، والمحامي رفعت راضي اتمنع من ممارسة العمل في القضايا دي. وقاسم اضطر يتعاون مع المحاسبين القانونيين عشان يلحق الشركة من الإفلاس.
الشركة ما انهارتش بين يوم وليلة بس اتعاد هيكلتها تحت إشراف قضاء ومراجعين مستقلين. عقارات كتير اتباعت، والديون اتسددت، والموظفين عرفوا حقوقهم بدل الشائعات.
قاسم فضل شغال في الشركة بس ما بقاش هو الكل في الكل ولا صاحب القرار الأوحد.
ريتال نقلت لشقة هادية وراقية في الإسكندرية قريبة من البحر اتجهزت من الوقف، وأهلها قعدوا قرايب منها في طنطا وإسكندرية.
ونيرة أأجرت شقة صغيرة تحت شقة ريتال بدورين.
ما بقوش مجرد سلفات بنوا مع بعض صلة وثيقة وقوية:
قهوة يوم الأحد الصبح
حكايات طويلة بتنتهي بضحك وسكون
وأفكار للمؤسسة اللي الحاجة إلهام حلمت بيها.
وسموها: بيت البوصلة.
المؤسسة بدأت حركتها في دعم الستات اللي بيعيدوا بناء حياتهم المستقلة بعد الاستغلال المالي. نيرة مسكت الإدارة والشركات، و ريتال مسكت الاستشارات وحقوق الستات.
وفي أواخر شهر أغسطس وبعد ليلة طويلة وصباح دافي، اتولدت البنوتة في مستشفى راقي في إسكندرية!
ريتال شالتها على صدرها بينما أمها ماجدة بتبكي من الفرحة وأبوها واقف بيوزع شربات.
وصلت نيرة الصبح ومعاها دلاية فضية صغيرة على شكل بوصلة.
وقالت: دي عشان السلسلة بتاعتها.
لمست ريتال الدلاية بحب: نسميها إيه يا نيرة ؟
ردت نيرة وهي بتبص لوش المولودة: إنتي اللي تقرري.
ابتسمت ريتال : إلهام.
نيرة اتأثرت وقالت: لو إنتي متأكدة
أنا متأكدة جداً.
سموها إلهام ريتال حسني مش عشان اسم العيلة، بس عشان ريتال كانت عايزه بنتها تورث الشجاعة والكرامة من اسم الجدة.
—
وبعد شهور في يوم ربيعي جميل، رجعت ريتال لبيت رأس البر مع بنتها إلهام الصغيره في الحمالة، ونيرة ماشية جنبها.
المكتب الداكن كان عليه إطار بسيط فيه صورة الجدة إلهام، وجنبه فازة ورد أبيض ريحتها مالية المكان.
قالت نيرة : كانت هتحب الأوضة بالمنظر ده أوي.
ابتسمت ريتال : كانت هتقولنا الورد كتير شوية بس جميلة!
البنت تحركت في الحمالة، فشالتها ريتال وقربتها من الشباك الباصص على البحر والشمس المشرقة.
قالت ريتال : أنا كنت فاكرة إن الخروج من الجوازة دي معناه إني خسرت كل حاجة يا نيرة
نيرة اتسندت على المكتب: ودلوقتي؟
دلوقتي بعرف إن الخروج كان معناه إني أعرف قيمتي ونفسي قبل ما حد يقنعني إني ولا حاجة.
بصت نيرة للصورة: بتفتكريه؟
دت ريتال بصراحة: ساعات.
ندمانة إنك سبتيه؟
لأ أبداً.
الإجابة طلعت بسهولة ويقين مش لأن الماضي كان بسيط، بس لأن ريتال ما بقتش محتاجة الماضي عشان تتحرك للمستقبل.
هي حبت قاسم
واتخانت منه
ونجت من نهاية الجوازة دي.
والحقايق التلاتة عاشوا جواها بسلام.
بنتها فتحت عينيها واسعة وبتبص حولها بشغف.
باست ريتال قورتها وهمست: جدتك إلهام سابتلنا المفتاح يا حبيبتي بس هي ما فتحتلناش الباب.
بصت لها نيرة : لأ؟
لأ هي بس شاوراتلنا على مكان الباب، وإحنا اللي فتحناه بكرامتنا.
ووقفوا الاتنين سوا في الأوضة الهادية بينما الموج بيخبط برة البيت بصوت هادي وجميل
المستقبل كان مفتوح قضايا ومحاكم وحكايات، بس ريتال ما بقتش واقفة على هامش حياة حد مستنية حد يختارها
هي اختارت نفسها خلاص.
الكاتبة نرمين عادل همام
تمت
