بصت ريتال لإيديها: هو أنا ممكن أتسأل عن ديونه وتزويره؟
لأ طبعاً مش بأوتوماتيكية كده إحنا هنحمي اسمك وأملاكك.
قربت نيرة وقالت: وموضوع الوقف؟
فريدة ابتسمت: الوقف مآمن ومحمي بأعلى درجة، والحاجة إلهام اتخذت احتياطات قانونية معقدة جداً.
كملت الأستاذة فريدة: وفيه حاجة تانية الحاجة إلهام عدلت في عقود الوقف قبل وفاتها بشوية.
سألت ريتال : تعديل إيه؟
أسست مؤسسة خيرية وتنموية مشتركة باسم نيرة و ريتال بس بشرط موافقتكم أنتم الاتنين.
بصت ريتال لـ نيرة ، ونيرة استغربت: مؤسسة لإيه؟
ردت فريدة: لدعم وتمكين الستات اللي بيعيدوا بناء حياتهم بعد الاستغلال المالي أو القهر والإساءة المباشرة الحاجة إلهام كتبت في العقد: عشان نساعد الستات اللي انمسح وجودهم وشخصيتهم من ناس كانوا بيثقوا فيهم.
الأوضة سكتت خالص.
افتكرت ريتال نفسها زمان لما كانت بتسكت وبتلغي رأيها عشان قاسم يرضى وفكرت في ستات تانية معندهمش فلوس ولا أهالي مستنيينهم في المحطة!
سألت نيرة : ولو إحنا مش عايزين نعمل المؤسسة دي؟
مش هتم القرار ليكم.
بصت ريتال لـ نيرة : إنتي إيه رأيك يا نيرة ؟
نيرة فكرت وقالت: أنا حابة إنها سابت لنا الاختيار والحرية.
وأنا كمان.
المكالمة استمرت ساعة كمان؛ الأستاذة فريدة شرحت الخطوات الجاية، وحددت معاد مع خبير تزوير وبصمات، وعملت مراجعة أمنية لحسابات الجروب.
لما المكالمة خلصت، كانت الساعة دخلت في منتصف الليل.
قامت نيرة واقفة: أنا لازم أرجع اللوكاندا.
قامت ريتال : خليكي بايته معانا هنا الأوض كتير.
بصت نيرة حواليها في البيت واستغربت الدعوة: مش عايزه أتقل عليكم
تتقلي إيه! ده بيتك إنتي كمان.
أنا مش متعودة ينقال لي تعالي اباتي في بيت عيلة.
ردت ريتال بحنية: اباتي كضيفة مش بصفة واحدة من عيلة حسني، ولا كصاحبة وقف اباتي بصفتك نيرة بس.
عينين نيرة دمعت وقالت: تمام الليلة دي بس.
أمها ماجدة جابت ملايات جديدة ونظيفة من الأوضة اللي فوق.
بينما نيرة بتظبط نفسها، وقفت ريتال لوحدها في أوضة المكتب صورة الحاجة إلهام كانت على المكتب، البنت الصغيرة شكلها جد بس مش خايفة.
لمست ريتال طرف الصورة وهمست: هحاول يا تيتة
ما كانتش متأكدة هي بتحاول في القضايا والمحاكم، ولا المؤسسة، ولا التسامح، ولا شغل الأمومة اللي جيلها عشان تربي بنتها إن الحب عمره ما كان الغاء للشخصية والكرامة!
تاني يوم الصبح وصل قاسم بيت رأس البر!
وما جاش لوحده كان معاه المحامي بتاعه رفعت راضي واقف جنب العربية، وقاسم واقف على أول البراندة ووشه أصفر وكأنه ما نامش طول الليل. بدلته الفخمة اتبدلت ببالطو إسود، بس الغرور والتكبر كان لسه باين في طريقة وقفته!
شافته ريتال من الشباك
أول إحساس جيلها ما كانش الخوف ولا الرعب كان خيبة الأمل!
كانت بتتخيل اللحظة دي مواجهة وعياط وصريخ بس حسّت بتعب وزهد.
قاسم بص لفوق وشافها
وفجأة، اتغيرت ملامحه لما شاف نيرة طالعة من الأوضة وواقفة ورا ريتال !
ولأول مرة من يوم ما عرفته، قاسم ظهر عليه الذهول والجمود التام!
نطق بصوت مرعوش: نيرة ?!
وقف نيرة مكانها
ريتال بصت لها: عايزاني أقوله يمشي يا نيرة ؟
نيرة بصت لقاسم من ورا الإزاز وقالت بثبات: لأ.
مش لازم تشوفيه لو مش عايزه.
عارفة.
فتحت نيرة الباب وطلعت البراندة.
هواء الصباح البارد دخل الصالة
قاسم فضل واقف مكان على السلم برة، ونيرة واقفة برة الباب.
بصوا لبعض عبر العتبة
قال قاسم بصوت مكسور: إنتي إنتي عايشة?!
وش نيرة كان هادي جداً: أيوه عايشة يا قاسم .
بص لـ ريتال : إنتي كنتي تعرفي؟
عرفت وقابلتها.
فك قاسم اتشد وقال بغضب: الحاجة إلهام كدبت علينا واختلقت أوهام!
ردت نيرة بصرامة: هي سكتت وحمتني بس أبوك كدب كدب صريح ومسح وجودي!
قاسم رجع خطوة لورا: أنا ما كنتش اعرف إنتي فين!
بس كنت عارف إن أنا عايشة!
كنت فاكر دي إشاعات بيزنس
وكانت بتجيلك جوابات ورسائل مني!
قاسم دور وشه بعيد
ريتال كانت بتبص عليه بحرص؛ كان شكله أكبر من سنه بالبارحة، الغرور والتأكد اتسحبوا منه فوراً.
قال قاسم بصوت واطي: أنا كنت عيل صغير لما مشيتي يا نيرة
صوت نيرة هدي: عارفة.
ما كنتش فاهم حاجة.
عارفة ده كمان.
أمال بتعامليني كأني عملت فيكي حاجة ليه؟!
عشان كبرت وبقيت راجل وكملت في السكوت والكدب واستغليت غيابي!
قاسم ما كانش عنده أي رد!
والسكون بينهم كان محمل بسنين طويلة من الضياع.
قربت ريتال ووقفت جنب نيرة : جاي ليه يا قاسم ؟
بص قاسم لـ ريتال : عشان أوضحلك
توضحلي الإيميل والتزوير؟
اتغير وشه: إنتي لقيتي الإيميل?!
أيوه.
ريتال الموضوع مش زي ما إنتي فاهمة خالص!
أمال إيه الحقيقة؟ احكيلي.
بص قاسم للمحامي رفعت راضي اللي واقف جنب العربية، ووطى صوته: الشركة والجروب في أزمة ومصيبة سوداء! أبوي أخد قرارات غلط وأنا كنت بحاول أنقذ البيزنس وألم الموضوع!
عن طريق إنك تنقل ديون الشركة القذرة والتزوير باسمي؟
عشان نكسب وقت! مجلس الإدارة كان هيشفي الشركة ويفلسنا!
وتوقيعي المزّور؟
أنا ما كنتش ناوي أستخدمه من غير ما أقولك وأقنعك!
إنتي كتبت لأبوك: هنعمل إيه لو رفضت؟! وكتبتله: سيبها لي هي بتثق فيّ أعمى!
قاسم بص للأرض
ريتال حست بالغريزة القديمة جواها؛ الرغبة في إنها تسهل عليه الكلام وتريحه وتقول إني فاهمة الضغط اللي عليك بس سابت الغريزة دي تروح وما تسيطرش عليها.
قالت بصلابة: إنت كنت ببتخطط لتغفيل النصب عليّ.
كنت ببتخطط أحمي بيتنا ومستقبلنا!
كنت ببتخطط تحمي نفسك وبيزنس أبوه وبس!
رفع عينيه: الكلام ده مش عدل يا ريتال !
ردت ريتال بصوت هادي وقتّال: واللي إنت عملته فيّ وفضحتي وبست حبيبتك قدام مصر كلها كان عدل يا قاسم بيه؟!
قرب خطوة وقف: ريتال أنا عارف إني جرحتك في الحفلة
دي مش السبب الوحيد إني سبتك وعملت كده.
أنا بحبك!
الكلمة نزلت من بؤه باهتة ومفيهاش أي تأثير زي زمان.
ريتال كانت عارفة إنه يمكن يقصدها على طريقته ودي كانت المأساة!
قالتله: أنا كمان كنت بحبك بس الحب مش كارت بلانش تداري بيه كوارثك، ولا بيعطيك الحق تلغي وجودي وتحدد إيه اللي اعرفه وإيه اللي ما اعرفوش.
وش قاسم اتشنج: أنا أقدر أشرحلك نقل الأصول
تقدر تشرح ده للأستاذة فريدة فهمي المحامية.
دي مش محاميتك!
قت محاميتي من النهاردة.
بص للبيت بغضب: إنتي بتدخلي أغراب في بيزنس وعيلة حسني الجروب!
إنت اللي دخلتني في قذارتك من غير ما تقولي ولا تاخد رأيي.
ما كانش عنده إجابة
ومن وراه، المحامي رفعت راضي بدأ يتكلم في الموبايل بتوتر.
بص قاسم لـ ريتال : إنتي عايزه إيه دلوقتي يا ريتال ؟
السؤال ده فاجأها لسنين كان فاكر إنه عارف هي عايزه إيه؛ بيت أكبر، فساتين، عيل، وست تقف جنبه في الحفلات تسقفله! عمره ما سألها هي عايزه إيه بجد.
