وده اللي كان مخلي الحقيقة صعبة وتقيلة على القلب؛ الحقيقة ما مسحتش الذكريات الحلوة، بس أجبرت ريتال تشوفها على أصلها وبأمانة.
قاسم كان ممكن يكون بيحبها بس بيستغلها!
وكان ممكن يكون عايز الطفل بس شايفه أصل مالي ووريث للبيزنس مش أكتر!
وكان فاكر إن مسؤول عنها وهو في الحقيقة بيلغي وجودها وحريتها!
بصت نيرة لوش ريتال : مش لازم تقرري إنتي حاسة بإيه ناحيته الليلة دي يا ريتال .
عارفة
أنا قضيت سنين فاكرة إن لازم اختار بين إني أحب عيلتي، وبين إني أعترف باللي عملوه فيّ وأخدت وقت طويل عشان أفهم إن الموقفيين ممكن يكونوا صح في نفس الوقت.
طبقت ريتال الإيميل بحرص: إنتي سامحتي الحاجة إلهام يا نيرة ؟
نيرة بصت للبحر وقالت: سامحتها طبعاً.
سامحتيها إزاي؟
سامحت الست اللي دورت عليّ وحاولت تنجدني وبعدين سامحت الست اللي سكتت زمان وبعد كده بطلت أحاول أعمل منها شخصية مثالية.
سألتها ريتال : وسامحتي أبوكي توفيق؟
وش نيرة اتشد: أنا ما أعرفوش كفاية عشان أسامحه بس بطلت أسامح اختياراته إنه يحدد أنا مين وشخصيتي إيه.
الإجابة علقت في عقل ريتال .
فكرت في ورقة الطلاق اللي سابتها على مكتب قاسم هي وقعت ومشيت بخطوة حاسمة، بس خروجها من الجوازة ما كانش معناه إنها تحررت فوراً من أثرها، لسه فيه حسابات وقضايا، وأملاك، ومستقبل طفل، والكلام اللي عيلة حسني هتقوله عنها في المجتمع والميديا.
الهروب والمشي كان بداية مش النهاية!
مدت نيرة إيدها بظرف تاني: ده من الأستاذ كمال خليل، محامي الجروب الخاص بالحاجة إلهام فيه بيانات الأوصياء والوقف، وإثبات إن قاسم ولا أبوه يملكوا قرش واحد جوة الوقف ده.
أخدته ريتال : وليه الحاجة إلهام ما سابتش الفلوس لينا على طول بره الوقف؟
عشان الفلوس كانت ممكن تبقى وسيلة ضغط وسيطرة تانية من العيلة كانت عايزة ضمانات قانونية لحمايتنا.
ابتسمت ريتال : كانت بتفكر في كل حاجة الله يرحمها.
كانت خايفة علينا.
سألتها ريتال : خايفة من إيه؟
خايفة لو من غير ما نعرف الحقيقة، أبوي وقاسم يمسحوا كل حاجة وكانت خايفة لو أنا رجعت بسرعة، العيلة تحولني للعبة في إيدهم بدل ما يتعاملوا معايا كبني آدمة
صت لها ريتال : وإنتي عايزة إيه دلوقتي يا نيرة ؟
بصت نيرة ناحية البحر وقالت: عايزة يبقى عندي فرصة أعرفك وأعيش معاكي من غير ما أكون مسؤولة عن تصليح البلاوي بتاعة العيلة دي.
ومحدش هيحملك المسئولية دي.
ومش عايزة الوقف يحولنا لشريكات بيزنس بتتكلم عن طريق المحامين بس!
ولا أنا عايزة كده.
ابتسمت نيرة ابتسامة دافية: يبقى نبدأ بفنجان قهوة الصبح؟
ابتسمت ريتال : ده طلب مقدور عليه جداً!
مشوا الاتنين سوا ناحية العربية.
أمها فتحت باب العربية اللي ورا قبل ما ريتال تقرب. بصت ماجدة في وش ريتال والظرف اللي في إيدها وفهمت إن فيه حاجات كبار وضخمة اتكشفت.
إنتي بخير يا بنتي؟
قعدت ريتال بحرص: يعني يا أمي الحمد لله.
أبوها لف وشّه من كرسي السواق: نكلم المحامي في القاهرة وإسكندرية دلوقتي؟
أيوه يا بابا فوراً.
هز رأسه: تمام، هكلمه حالا.
بصت ريتال لـ نيرة : تعالي معانا يا نيرة .
اترددت نيرة
قالت ريتال : أهلي عارفين عنك كل حاجة ومش هيطلبوا منك تشرحي حياتك وتبرري موقِفك الليلة دي.
أمها ماجدة ابتسمت لـ نيرة بحنية: تعالي يا بنتي معانا في دفا عيلتنا إنتي ضيفتنا وعلى رأسنا من فوق.
بصت نيرة للبحر واللوكاندا وبعدين ركبت العربية معاهم.
رجعوا بيت رأس البر لأنه كان هادي ومقفول وعزلة تامّة. أبوها اتصل بـ الأستاذة فريدة فهمي، محامية كبيرة في القاهرة ومن الأوصياء المستقلين للجدة إلهام، وأمها دخلت تعمل شاي وسحلب دافي في المطبخ.
دخلت الأستاذة فريدة معاهم فيديو كول من مكتبها؛ ست في الأربعينات، كلامها حاسم وصبور وراقي.
سمعت لـ ريتال وهي بتشرح موضوع الإيميل وشافت صور الأوراق والإنذارات.
لما خلصت ريتال ، قالت الأستاذة فريدة: يا ريتال هانم إوعي تتكلمي مع قاسم لوحدك! إوعي توقيعي على أي ورقة! وما تحوليش قرش واحد من أي حساب مشترك لحد ما نراجع الموقف القانوني بالكامل.
هزت ريتال رأسها وموافقة.
هو نقل الملكية والأسهم تم رسمياً؟
ردت فريدة: هنفحص في الشهر العقاري والسجل التجاري فوراً بس التوقيع المزّور أو غير المصرح به ما بيبقاش قانوني لمجرد إنهم قدموا الورق!
والقروض والضمانات البنكية؟
هنطالب بفحص جنائي وتزوير فوراً وموقفك قوي جداً لأن الإيميل بيثبت النية الجنائية وشروعهم في التزوير والنصب!
