لبيت، وأول ما قعدت قدامها، انهرت في العياط.
يوسف طلقني يا ماما… طلقني يوم فرحنا
أمي فضلت باصة ليَّ كأنها مش مصدقة اللي سمعته، وبعدها حضنتني جامد وعيطت معايا.
يا حبيبتي يا بنتي إزاي يعمل فيكي كده؟ ده لسه فرحك النهارده الناس هتقول إيه؟ هتطلع الصبح تلاقي البلد كلها بتتكلم، وكل واحد هيفتي من عنده، واللي هيقول إن العيب فيكي، واللي هيقول أكيد عملتِ حاجة يا وجع قلبي عليكي يا بنتي
مسحت دموعي بإيدي وقلت بصوت مكسور والله ما عملت حاجة يا ماما! أنا مش فاهمة هو عمل كده ليه. كان كويس معايا طول اليوم، وفجأة قلب عليَّ وطردني، حتى مش راضي يقولي السبب
أمي حضنتني تاني، وفضلت تمسح على شعري وهي بتقول أنا مصدقاكي يا حبيبتي، ومش مهم كلام الناس دلوقتي. إنتِ بنتي، وكرامتك من كرامتي، ومش هسيب حد يجرحك بكلمة. بس لازم نفهم إيه اللي حصل، لأن اللي عمله يوسف ده مش طبيعي
حكيتلها عن مكالمته الغريبة، وعن كلامه إنه نفذ اتفاق، وإن فيه ناس ممكن تتعرضلي. كل ما كنت بكرر كلامه، كنت بحس إن الخوف بيزيد جوايا.
أمي بصتلي بقلق وسألتني هو قالك إن حياتك في خطر؟
هزيت راسي وأنا بعيط أيوه يا ماما، قاللي كده، بس لما سألته عن السبب طردني وطلقني
أمي ضمتني لصدرها وقالت خلاص يا بنتي، إنتِ مش هتخرجي من هنا دلوقتي. ارتاحي، وبكرة نشوف هنعمل إيه. ومهما حصل أوعي تلومي نفسك على اللي هو عمله.
عدت الساعات ببطء، وأنا قاعدة مش قادرة أستوعب إزاي حياتي اتقلبت في ساعات قليلة. من شوية كنت عروسة فرحانة، وبعدها بقيت ست مطلقة رجعت بيت أمها بفستان فرحها، وخايفة من بكرة ومن كلام الناس.
لحد ما الساعة بقت عشرة بالليل.
كنت لوحدي في الصالة، لما سمعت خبط على الباب.
مرة واتنين وتلاتة.
قمت وأنا فاكرة إن أمي رجعت، لكن لما بصيت من العين السحرية، جسمي كله اتجمد
كان يوسف
واقف قدام الباب حافي، هدومه متقطعة، ورجله غرقانة دم. وشه شاحب، ونَفَسه متقطع، وفي إيده فستان فرحي الأبيض
رجعت لورا وأنا حاطة إيدي على بقي. إزاي وصل هنا؟ وإزاي جاب الفستان اللي أنا سيبته في شقتنا وإيه اللي حصل له في الساعتين اللي فاتوا
سمعته بيخبط تاني، وصوته طالع بالعافية. مريم… افتحي، أرجوكي. أنا عارف إنك بتسمعيني
قربت من الباب وأنا بعيط، وقلت إنت عايز مني إيه؟ مش إنت اللي طلقتني وطردتني؟ إزاي جايلي دلوقتي
حط إيده على الباب، وسمعته بيقول أنا غلطت لما سبتك تمشي من غير ما أقولك الحقيقة، بس مكنش عندي اختيار. افتحي يا مريم، حياتك في خطر
صرخت فيه حياتي في خطر من مين؟ وإنت عملت إيه؟ وليه رجعت بفستان فرحي
سكت لحظة وبعدها قال بصوت خلاني أحس إن الدم اتجمد في عروقي
الفستان ده هو السبب في كل اللي حصل والناس اللي كانوا في الفرح النهارده مش كلهم جايين يباركولنا
قبل ما أقدر أستوعب كلامه، سمعت صوت خطوات جاية من آخر الطرقة.
يوسف اتلفت بسرعة، وبعدها خبط على الباب بعنف وهو بيقول
مريم، افتحي دلوقتي هما وصلوا
سمعت صوت راجل من آخر الطرقة بيقول
كنت فاكر إنك هتعرف تهرب مني
يوسف قرب وشه من العين السحرية، وبصلي بعينين مليانين خوف وقال بسرعة
مريم، مهما سمعتي بعد كده، أوعي تفتحي الباب لحد غيري
وفجأة النور قطع في العمارة كلها.
سمعت صوت طلقة نارية وبعدها صوت ارتطام قوي بالباب.
رجعت لورا وأنا بصرخ، لكن قبل ما ألحق أتحرك، سمعت صوت المفتاح بيتحرك في الكالون، والباب بدأ يتفتح ببطء…
واللي شفته في اللحظة دي، خلاني أتمنى لو كنت فتحت الباب ليوسف من أول مرة..
الباب بدأ يتفتح ببطء، وأنا واقفة مكاني مش قادرة أتحرك، قلبي بيدق بعنف، وعيني معلقة في الفراغ اللي بيكبر قدامي. كنت مستنية أشوف مين اللي ورا الباب، لكن أول ما اتفتح، لقيت أمي واقفة قدامي، ووراها يوسف اللي كان بيحاول يسند نفسه على الحيطة من شدة الألم، ورجله غرقانة دم، وفي إيده فستان فرحي الأبيض.
أمي شهقت أول ما شافته، وبصتلي برعب وهي بتسأل إيه اللي حصل يا مريم؟ وإيه حكاية الطلقة اللي سمعناها؟ حكايات صابرين
