نَفَسها كان مظبوط ورايق.. كتفها بيطلع وينزل ببطء. جاله إحساس غريب أوي… شكلها نايمة بعمق وتلذذ أكتر بكثير من الأيام اللي كان بينام فيها جنبها في البيت!
تقلب على الجنب التاني وقال لنفسه:
“كبر دماغك.. بكره كل حاجة هتتحل.”
الساعة 2 بعد نص الليل. في أوضة النبطشية بتاعة الـ IT في شركة “العقاد جروب”.
المتدرب “أحمد” قاعد يبص لشاشة السيرفر وعينيه دموع من كتر الصدمة!
السنة اللي فاتت، الشركة عملت سيستم كامل وجديد لإدارة المشاريع والحسابات. السيستم ده مفيش زيّه في السوق، ومين اللي بني أكواد البنية التحتية بتاعته من الألف للياء؟ سلمى! مرات حسام العقاد.
هي يعتبر الـ CTO والقلب النابض بتاع تكنولوجيا المعلومات في الشركة كلها، بس في السر! كومبارس مجهول مالوش حتى اسم في كشوفات الموظفين، ولا رقم وظيفي، ولا مركب، ولا عقد! مجرد “مدام الباشمهندس حسام”.
أوقات لما السيستم يكرش، كانت بتنزل تساعدهم وتصلح العك.. ولحد ما سلمت لهم شبكة رقمية متقفلة بالدبة والمفتاح.
أحمد المتدرب بقاله 3 شهور في الشركة، شغلته الوحيدة لما تقف قدامه حاجة: يكلم مدام سلمى!
وفجأة في الفجر، المصيبة وقعت. السيستم أدا بوج ومسح قاعدة البيانات، ومنصة المشاريع كلها اتشفطت! كل أوراق المشاريع طارت، وكل الموافقات اتجمدت، وحسابات 3 شركات فرعية اتفصلت عن بعض.
أحمد جرب كل حاجة يتعلمها: راستر السيرفر.. تشيك على الشبكة.. فتح دليل الطوارئ.
آخر صفحة في دليل الطوارئ مكتوب فيها بخط واضح:”في حالة الانهيار الكامل، اتصل فوراً بـ سلمى نصر: 010xxxxxxxx”
طلب الرقم…
“عفواً، الرقم الذي طلبته قد يكون مغلق.”
اتصل تاني وثالث ورابع… مغلق!
أحمد اترمى على الكرسي بقلة حيلة، واللمبة الحمرا في السيرفر عمالة تطلق إنذار! سحب تليفون المكتب واتصل بحسام العقاد مباشر.
تتت… تتت… رد حسام بصوت تقيل من النوم:
“أيوة.. مين؟”
أحمد بسرعة ورعب:
“يا باشمهندس حسام الحقنا! سيستم الشركة كله وقع، ومش عارفين ندخل على أي ملف!”
النوم طار من عين حسام النص:
“إيه اللي حصل بالضبط؟!”
أحمد:
“مش عارف والله يا فندم! قاعدة البيانات اتنسحت، وشغل الصبح كله طار، وفي عروض مشاريع بكره الصبح مش عارفين نوصل لها!”
حسام:
“كلم شركة الصيانة الخارجية بسرعة!”
أحمد:
“ما هو مدام سلمى هي اللي ماسكة التيم الخارجي ومعاها كل الداتا والدخول، وأنا معاييش أرقامهم!”
حسام فرك مناخيره بغضب:
“أومال فين الباسورد والأكواد الرئيسية؟!”
أحمد:
“مدام سلمى هي اللي بانية السيستم بنفسها، وقالت إن معاها نسخة احتياطية ومفتاح تشفير.. بس ما حدش غيرها يعرف الباسورد!”
بص حسام جنبه.. سلمى نايمة في سابع نومة، ونَفَسها هادي.
حسام بنرفزة:
“خلاص خلاص.. هخليها تقوم تظبط الزفت ده الصبح.”
وقفل السكة وتقلب على الجنب التاني عشان ينام. اللي ما يعلموش حسام… إنه بعد 3 ساعات بس، الشركة هتتحول من “عطل فني” لـ “خراب ديار كامل”! وتليفونه من الفجر مش هيسكت من مكالمات كبار الموظفين ورجال الأعمال!
الساعة 5 الصبح. البيوت اتقلبت والأزمة كبرت.
السيستم وقع.. بعدين السيستم بتاع العملاء وقفل.. وبعده الموقع الرسمي بتاع الشركة اتقفل خالص! الموردين بتوع شركة “المحروقي” بعتوا أكتر من 12 إيميل يستفسروا السيستم هيرجع إمتى.
أحمد المتدرب كان هيعيط في أوضة السيرفرات، وقاعد قدام النوت بوك بتاع الطوارئ اللي مكتوب في كل صفحة فيه اسم واحد بس: سلمى نصر. سلمى نصر.
اتصل بيها فوق الـ 20 مرة.. التليفون مقفول!
دخل على جروب الواتساب بتاع الشركة، لقاه مشتعل: المدير المالي بعت فويسات بيزعق إن سيستم الدفع واقف. مدير المبيعات بيصرخ إن داتا العملاء راحت. تيم التسويق بيقول إن عندهم بريزنتيشن مع عميل كبير الساعة 9 الصبح والشغل محبوس جوة السيستم!
جروب الواتساب كُله عمال يكتب سلمى وما حدش بيرد!
أحمد بعتلها رسالة على الواتساب الشخصي:
“يا مدام سلمى الحقيني السيستم وقع والشركة بتتخرب!!”
مافيش رد.
بعت تاني:
“يا مدام سلمى أرجوكي ردي! كل حاجة واقفة!”
بعت تالت:
“يا أبلة سلمى ردي عليا وحياة عيالك أنا هترفد…”
وقفل التليفون وحطه على الطاولة وغمض عينيه.. سلمى عمرها ما سابتهم كده، يبقا فيه حاجة كبيرة حصلت!
الساعة 6:30 الصبح. الشمس طلعت.
سحبت التليفون من تحت المخدة، وفتحت الباور.
أول ما الشاشة نورت.. اتصدمت من المنظر! 127 مكالمة فائتة! أكتر من 300 رسالة على الواتساب! التليفون هنج لمدة 10 ثواني من كتر الإشعارات!
