حُب على مفيش للكاتبه نرمين عادل همام
قعدت في الصالة وقفلت اللاب توب.. تليفوني نور برسالة سكرين شوت من حسام. الشئون القانونية جهزت عقد العمل بتاعي: المسمى الوظيفي: رئيس قطاع التحول الرقمي. المرتب السنوي: 800 ألف جنيه!
وجنبها رسالة منه:
“العقد جاهز للتوقيع يوم الإثنين.. وبالنسبة لشيرين، نقلتها قسم الإدارة العادية لحد ما تشوف شغل تاني.”
بصيت للرقم.. من صفر جنيه لـ 800 ألف جنيه في سنة! كل اللي احتاجته تعسيلة نومة وسيستم يقع!
رديت عليه: “تمام.”
بعت تاني:
“أنتِ في البيت؟ أنا راجع نتعشى سوا.. عاوز أكلمك في موضوع.”
ما رديتش.
الساعة 7 بالليل.. حسام دخل البيت ومعه شنطة هدايا من ماركة شهيرة. حطها على جزامة المدخل وقال:
“جبتلك الشنطة دي..”
بصيت للشنطة وما فتحتهاش:
“شكراً.”
قلع جزمته ودخل وقف في نص الصالة يطالعني.. وإحنا متجوزين بقالنا 3 سنين، نادر لما يبصلي بالتركيز ده. كان باين عليه التعب والهالات تحت عينيه.
“سلمى.. اللي حصل إمبارح أنا غلطان فيه.”
سكت وما رديتش.
“ما كانش ينفع أسيبها تلبس الخاتم.. ولا تسند عليا.. ولا تسكت لما الناس افتكروها مراتي.” وكمل بصوت واطي:
“أنا بس ما كنتش عاوز الناس تقول إني كبرت بشركتي عشان شغلك معايا..”
قلتله ببرود:
“بس أنت نسيت إن أنا عمري ما نافستك على كرسيك.”
وقف حسام مش عارف يقول إيه.. طلعت تليفوني وفتحت صورة ووريتهالها. صورة شيرين كانت نزلتها من أسبوع.. كارت عمل وإشعار رسمي بتغيير السجل التجاري لشركة فرعية تابعة لـ “العقاد جروب”.
اسم المالك الجديد: شيرين عبد الفتاح! نسبة الملكية: 100%!
وش حسام اتخطف والدم هرب منه:
“إيه ده؟! ده حصل إمتى؟!”
“من 3 شهور.. وأنت في سفرية دبي.. ضمن أوراق الشغل اللي وقعت عليها وأنت مش دريان، كان فيه ورقة تنازل عن أسهم الشركة الفرعية دي ليها!”
قبض حسام على التليفون وعروق إيده برزت من الصدمة.
كملت كلامي:
“شيرين هي اللي تختارلك الخاتم الألماس اللي يعجبها.. وهي اللي بتسقيك وتظبطك في العزومات لحد ما تلغي عقلك وتوقع على أي حاجة! تفتكر سكرتيرة شاطرة تعمل كده لله وللوطن؟”
سكت حسام مصدوم.. وسألني بصوت مكسور:
“أنتِ تعرفي باسورد الشركة الفرعية دي؟”
. بس شيرين كانت عارفة إمبارح إنك مش هتاخدني الحفلة، وعارفة إني هقفل تليفوني ونمت!”
قمت من مكاني وقلتله:
“راجع أوراقك يا حسام.. وشوف مين في الشئون القانونية تبعها وبيساعدها في السرقة دي.”
قعد حسام على الكنبة زي الفراخ الدائخة، مش قادر يتحرك والشاشة في إيده منورة على اسم شيرين والورق المزور!
الساعة 8:30 الصبح يوم الإثنين. قدام قاعة الاجتماعات في شركة العقاد جروب.
حسام واقف في آخر الممر ماسك تليفونه بذهول.. تقرير المحامي وصله الساعة 3 الفجر: الشركة الفرعية اللي شيرين سجلتها باسمها، نقلت داتا العملاء الكبار لشركة “ميديا ميكس”.. المنافس الأول لشركة العقاد!
ظبط كرافتته، وفتح باب قاعة الاجتماعات.
القاعة كانت مليانة: الحاج فاروق المحروقي قاعد على رأس الترابيزة. كل مديري الأقسام حاضرين. وشيرين قاعد في آخر الترابيزة، لابسة بدلة بيضاء وميك أب خفيف، وأول ما شافت حسام ابتسمت بثقة:
“صباح الخير يا باشمهندس حسام.”
حسام ما بصش في وشها.. وصل اللاب توب بالشاشة الكبيرة وفتح ملف PDF:
“عندنا نقطتين النهاردة في الاجتماع.. الأولانية: عرض مشروع العاصمة الإدارية.. والثانية: حالة اختلاس وسرقة تجارية جوة الشركة.”
القاعة كلها سكتت وتهامسوا! ابتسامة شيرين اتجمدت ثانية، وبعدين شربت بق مية بثبات.
فتح حسام الصفحة الثانية.. ظهر سجل الأسهم على الشاشة:
“شركة ‘الرواد للتسويق’ التابعة لـ العقاد جروب.. المالك الحالي: شيرين عبد الفتاح بنسبة 100%!”
الناس في القاعة شهقوا!
شيرين حطت كوباية المية وقالت بثقة:
“يا باشمهندس حسام أنت اللي طلبت مني أسجل الشركة دي باسمي مؤقتاً عشان التوسع! والورق كله متوافق عليه من الشئون القانونية!”
بصلها حسام ببرود:
“بجد؟ طب فسرلي ليه بعد التنسيق ده بـ 3 شهور، أكبر 3 عملاء عندنا بدأوا ينقلوا شغلهم لشركة ‘ميديا ميكس’ المنافسة؟!”
قلب الشاشة، وظهرت إيميلات محولة من أكونت شيرين لشركة المنافسين!
وش شيرين جاب ألوان وشفايفها اتقفلت تماماً:
“أنا ما بعتش الإيميلات دي.. ده توقيع مزور!”
“مزور؟” قلب حسام الصفحة اللي بعدها:
“طب وإيه كشف الحساب البنكي ده؟ تحويل 800 ألف جنيه لحساب ‘ميديا ميكس’ ليلة حفلة رأس السنة بالظبط!”
