المدير المالي قام وقف يزعق:
“يا باشمهندس حسام المبلغ ده ملوش أي إذن صرف عندي في الحسابات!”
مدير المبيعات:
“دي سرقة عيني عينك لحساب المنافسين!”
وش شيرين بقى زي ج/ثة الميت.. وإيديها ماسكة في الترابيزة بأظافرها:
“أنا ما عملتش حاجة.. الحساب ده اتهكر!”
رد حسام بصوت زي الثلج:
“مش أنتِ لسه قايلة إنك مجرد اسم صورِي على الورق؟ بقى حسابك إزاي دلوقتي؟!”
شيرين فتحت بقها وما عرفتش تنطق كلمة!
الحاج فاروق المحروقي حط فنجان الشاي على الطاولة بصوت “تك” عالي.. وقام وقف وظبط جاكيتته:
“باشمهندس حسام.. شركة المحروقي ما بتحبش تتدخل في العك الداخلي بتاع شركات الناس.. العرض بتاع النهاردة متأجل لحد ما تظبط بيتك من جوه.”
وهو ماشي جنب حسام، ووشه مليان قرف من اللي بيحصل، قال له بصوت واطي:
“حسام.. أنا جهزت مكتب سلمى عندي في الشركة خلاص.. هي مش محتاجة تشتغل معاك تاني.. سيبها في حالها تنجح بعيد عن القرف ده.”
وطبطب على كتف حسام وخرج بره القاعة.
ما فضليش في القاعة غير موظفين العقاد وشيرين. حسام بص للمدير المالي وقال ببرود:
“اطلب الشرطة فوراً.”
شيرين قامت وقفت فجأة والكرسي اترمى لورا:
“حسام أنت اتجننت؟! أنت بتسلمني للشرطة؟!”
بصلها حسام بنظرة خالية من أي مشاعر.. نظرة ميتة:
“الخاتم الألماس اللي لبستيه في الحفلة.. سلمى اختارت أصغر حجم عشان توفرلي الفوس.. وأنتِ استكترتيه عليها ولبستيه عشان تتفشخري بيه! اطلعي بره.”
وخرج حسام وسابها.. وهي بتصرخ وتزعق:
“مش هتلاقوا دليل عليا!! مش هتلاقوا حاجة!!”
بس الباب اتأفل في وشها.. والشرطة كانت في الطريق!
الساعة 2 الضهر. جالي اتصال من حسام:
“الشرطة أخدت شيرين.. بتهمة اختلاس 800 ألف جنيه وتلسيب أسرار الشركة.. وهتاخدلها بتاع 3 أو 5 سنين سجن.”
سمعت الكلام عادي جداً.. ولا تشفيت ولارحت ولا جيت.. زي ما أكون بظبط قصة ماليش دعوة بيها.
“سلمى.. عاوز أشوفك.”
“أنا في الكافيه اللي تحت الاستوديو بتاعك.. انزليلي.”
بعد نص ساعة، نزلت لقيت حسام قاعد في الكافيه. شكله يرحم: دقنه طويلة، عينيه غارقة، والكرافته مفكوكة ومبهدلة.
أول ما شافني قف وشال تليفونه:
“سلمى.. أنا حققت في الموضوع.. شيرين استغلت توقيعاتي في السفرية وسرقت العملاء.. وبعض بتوع القانونية أخدوا رشاوي منها.”
شربت بق قهوة وما رديتش.
“أنا طلبت من المحامي يجهز عقد الاستوديو بتاعك.. ومع شركة المحروقي مش هتدخل في شغلك خالص.. اشتغلي مع الحاج فاروق مباشر.” وسكت شوية وقال بصوت مكسور:
“سلمى.. أنا أسف على كل السنين دي.”
حطيت فنجان القهوة وبصيت في عينيه:
“حسام.. أنت عارف إيه اللي وجعني بجد؟”
“مش إنك سبتها تلبس الخاتم.. ولا إن الناس افتكروها مراتك.. ولا إنك سبتني لوحدي في البيت.”
“أنا اتصلت بيك 3 مرات الليلة دي.. وما رديتش عليا!”
اتصدم حسام وبصلي بذهول!
“الساعة 7:20 بالليل اتصلت.. ما رديتش.”
“7:47 اتصلت تاني.. ما رديتش.”
“7:57 بعتلي رسالة بتقولي متجيش الحفلة.. ولما اتصلت بيك بعدها.. لقيتك عامل لي ‘بلوك’!”
المكان كان ساكت، وموسيقى هادية شغالة في الكافيه.
“أنت فاكر إني ما عرفتش إنك عملتلي بلوك؟”
وقف حسام مذهول، إيديه المترددة بتترعش جنب جسمه.
“وصورة الخاتم والألماس اللي شيرين لبسته؟ أنا ما شفتهاش على الفيس الأول يا حسام.. شيرين بعتتها لي أنا شخصياً على الواتساب قبل الحفلة بكابشن: ‘مدام سلمى ذوقك حلو أوي في الألماس، مرسي [وش بيضحك]’!”
رفع حسام راسه وعينيه مليانة دموع وحمار:
“بعتتهالك أنتِ؟!”
“أيوة.. شيرين كانت عارفة إنك مش هتاخدني، وعارفة إنك هتبلكني، عشان كده كانت بتغيظني.. وأنت كنت مغمض عينيك وماشي وراها!”
قمت من على الطاولة، وحطيت فلوس القهوة:
“الاستوديو بتاعي هيفتتح الأسبوع الجاي.. مش محتاجة منك ورد ولا مباركات يا حسام.. ويا ريت ما تجيش.”
لفيت وشي وجيت أخرج من باب الكافيه.. وفجأة! سمعت صوت “رقعة” جامدة ورايا!
لفيت وشي.. حسام كان ركبتين الاثنين اتخبطوا في بلاط الكافيه وركع قدام الناس كلها! الضيوف في الكافيه اتخضوا، والجرسون وقف بالصينية مبهوت!
حسام موطي راسه للأرض وجسمه بيترعش من العياط:
“سلمى.. أنا غلطان.. حقك عليا أنا آسف!”
وقفت قدام باب الكافيه، الشمس كانت طالعة وضاربة في الزجاج.. بصيت عليه وهو راكع على الأرض لمدة 5 ثواني كاملين.
وبعد الـ 5 ثواني.. زقيت الباب وخرجت للشارع، وما بصيتش ورايا تاني!
بعد شهرين.
الافتتاح الرسمي لـ “استوديو سلمى نصر للتسويق والاستشارات الرقمية”. المكتب في الدور 31 في برج فخم جداً قدام النيل. الشبابيك السيكوريت مخلية منظر النيل والمركب رايحة وجاية زي اللوحة.
اج فاروق المحروقي سلمني تيم مكون من 6 أفراد من أشطر المهندسين والمحللين في مصر. وعملنا خطة التسويق لمشروع العاصمة الإدارية الجديدة.. خطة نجحت نجاح يكسر الدنيا، ومجلس إدارة شركة المحروقي وافق عليها بالإجماع!
في نفس الوقت.. شركة العقاد جروب كانت بتعاني. حسام بيحاول يلم الشغل المكسور بعد سرقة شيرين وفضيحتها، وخططهم واقفة لأن التيم الرقمي بتاعهم ضايع من غيري. سمعت إنه بقاله شهرين بيقعد في مكتبه لحد الفجر بيحاول يصلح اللي اتقطع.. بس خلاص، العجلة دارت وما ترجعش لورا.
وشيرين؟ صدر ضدها حكم بالسجن 3 سنين بتهمة التزوير واختلاس أموال الشركة وتدليس السجل التجاري!
أنا قاعدة في مكتبي دلوقتي، بشرب قهوتي السخنة وببص على النيل من الشباك. السكرتيرة خبطت ودخلت:
“باشمهندسة سلمى.. فيه بوكيه ورد أحمر كبير وصل تحت من غير كارت كالعادة.. أرجعه ولا أدخله؟”
رديت بهدوء من غير ما أرفع راسي من على اللاب توب:
“رجعي بره يا مي.. وشوفي شغلك.”
“حاضر يا فندم.”
قفلت الباب وخرجت.
بصيت للشمس الذهبية وهي بتلمع على مية النيل. في يوم من الأيام، كنت قاعدة بفستان سواريه بيج ذهبي، بتفرج على صور جوزي مع السكرتيرة وببكي في السرير. النهاردة.. أنا سلمى نصر، اللي الحيتان الكبار بيجروا ورا عقلي، واللي ما بقتش محتاجة حد عشان يكملها أو يعرف قيمتها!
مسكت فنجان القهوة، وابتسمت لنفسي ابتسامة ثقة وراحة…
الكاتبه نرمين عادل همام
النهاية.
