سد فتحة الباب بجسمه كله، ووقف وقفة راجل مبيتهزش، حاطط إيده على حلق الباب وعينه في عين الرجالة اللي جايبينهم. صوت حماتي كان عالي لدرجة إن صدى صوتها كان بيرن في بير السلم، وجيران الدور اللي فوق واللي تحت بدأوا يواربوا البيبان ويبصوا باستغراب على الڤضيحة اللي بتحصل عيني عينك في مدخل العمارة.
أحمد قال بصوت واطي بس حاد زي حد السيف حسك عينك تعلي صوتك هنا يا ست أنتي.. بيوت الناس مش زريبة عشان تدخلي تجعرّي وتهوهوي على السلالم كده. اللي ليكي عنده حق يجيلك بالأصول، والرجالة اللي أنتي جايباهم يستقووا بيهم دول عارفين كويس إنهم واقفين في منطقة لو ندهنا على شبابها مش هتعرفوا تخرجوا منها سليمين.
واحد من الرجالة اللي مع حماتي، كان راجل خمسيني باين عليه ابن عمها ولا قريبه ليها، حاول يتدخل ويحط إيده على كتف أحمد عشان يهديه، بس أحمد نتر إيده پعنف متلمسنيش يا عم الحج، وقول للولية اللي سايقاكم وراها دي تلم لسانها، عيب على شيبتكم تمشوا ورا نسوان جاية تقطع أرحام وتهد بيوت!
حماتي شهقت وضړبت كف
على كف، وصوتها رجع يلعلع تاني شوفتوا قلة الأدب؟! شوفتوا ابنها بيرد عليا إزاي؟! شفتوا البلطجة اللي بنعامل بيها؟! بقى إحنا اللي جايبين بلطجية يا صايع؟! إحنا جايين ناخد ابن محمد، الواد ده مش هيبات هنا ليلة واحدة، هاتوا الواد وهاتوا دهب ابني وهدومه اللي في شقتكم، إحنا مش هنشرفكم بنسبكم ده تاني!
أمي طلعت وقفت جنب أحمد، وبصت لحماتي بقرف وهي مربعة إيديها دهب مين وهدوم مين يا حرباية؟! هو أنتي فاكرة نفسك داخلة دكانة بتفاصلي في بضاعة؟ دهب بنتي في بيتها وفي رقبتها، والولد ده في حضڼ أمه، والشرع والقانون حاطينه هنا.. اللي عنده ريحة الرجولة يقف يتكلم، مش يستخبى ورا ضهر أمه وخالاته ويسيبهم يشرشحوا على السلالم!
الكلام ضړب محمد في مقټل. كان واقف وراهم مطبس راسه في الأرض، وشه محروق من الخزي ومن نظرات الجيران اللي بدأت تلم على الصوت. الراجل التاني اللي معاهم شد محمد من دراعه وقاله انطق يا محمد، اتكلم يا ابني، هو إحنا جايين نتفرج عليك ولا إيه؟ ما تقول اللي أنت عايزه للناس دي وتخلصنا من الموال
ده!
محمد رفع عينه، ولقيته بيبصلي من فوق كتف أحمد.. عيونه كانت حمرا من السهر والضغط، باين عليه إنه مش طايق نفسه، كأنه مسحور ومكتف، باصص للبيت كأنه عدوه مش المكان اللي اتجوز فيه وشاف فيه الهنا أنا مش عايز مشاكل يا أحمد.. هاتوا ابني بهدوء، وأنا هسيب هناء في حالها وورقتها هتوصلها.. بس الواد يجي يعيش في بيت أبوه وتحت عين أمي، ده ابني الوحيد وأنا مش هسيبه يتربى بعيد عني!
أنا هنا مقدرتش أقف ساكتة. طلعت من ورا أمي وأحمد، وكنت شايطة، قلبي اللي كان خاېف ومكسور الصبح بقى زي الصوان. وقفت في وش محمد، وبصيت في عينيه مباشرة من غير ما أرمش ابنك؟! لسه فاكر إنه ابنك؟! أنت مفكرتش فيه ليه لما كنت بتخيرني بينك وبين كرامتي وأمي؟! مفكرتش في لبنه ولا في مناعته لما أمتك كانت عايزة تشحطه في الشوارع بنصاص الليالي عشان تثبت للناس إنها ست الكل؟! ابنك ده أنا شيلته في بطني تسع شهور، أنا اللي اتوجعت فيه وأنا اللي رضعته من دمي، وأنت كنت بايع كل ده لمجرد إن أمك اتصلت بيك ټعيط تمثيل!
حماتي قطعتني بزعيق متكذبيش
