السطر التاني كان بيتكلم عن العلاقة الجينية بيني وبين أمي سعاد… النتيجة كانت مكتوبة بخط تقيل وواضح ومحفور في نص الصفحة عدم وجود أي صلة قرابة بيولوجية بين مريم وسعاد نسبة التطابق الجيني 0!
وقفت مسمرة في مكاني. الورقة وقعت من بين إيديا على حرف المكتب. عقلي مش قادر يجمع الكلمات. يعني إيه؟! أنا بنت عثمان… من لحمه ودمه وعظمه، الراجل اللي بيكرهني وبيتهمني بالعار طول 28 سنة هو أبويا الحقيقي! لكن سعاد… الست الحنينة اللي شالتني وسهرت عليا، اللي كانت بتعيط في حضني وبتدافع عني بدموعها، الست الوحيدة اللي حستني بنتها… طلعت مش أمي أصلاً؟! ولا نقطة دم واحدة بتربطني بيها!
أبويا حط إيديه الاتنين على راسه، وبدأ ينهج بصوت عالي، وشه اتحول للون الرمادي وعينيه جحظت بطريقة مرعبة، وبقى يتمتم بكلام مش مفهوم مش ممكن… لا لا.. ده مستحيل.. سعاد؟! إزاي؟! إنتِ بنتي أنا؟ ومين أمك؟! سعاد ولدت في المستشفى قدام عيني.. أنا اللي استلمتك بإيدي!
قام وقف فجأة، الكرسي اتقلب وراه على الأرض بصوت دبة خلت الدكتور يتفزع. أبويا مكانش شايف الدكتور ولا شايفني، كان باصص في الفراغ كأنه بيشوف شياطين، وفجأة صرخ بأعلى صوته في نص العيادة الحية!! الخبيثة!! عملتِ فيا إيه يا سعاد؟!!
خرج يندفع من باب المعمل زي المجنون، بيعرج في مشيته من هول الصدمة، كأن جلطة ماسكة في رجله. أنا جسمي كان متلج، مكنتش قادرة أتحرك، الدكتور مد إيده يديني كباية مية وهو بيقول لي بقلق يا بنتي.. اشربي.. واهدي.. الحقيقة ساعات بتكون قاسية، بس لازم تفهمي وتواجهوا بعض بالعقل.
أخدت نفسي بصعوبة، خطفت التقرير في شنطتي، وجريت ورا أبويا. لقيته واقف قدام الأسانسير، عروق رقبته ناطرة برة جلده، وعينيه حمرة زي الجمر. لما شافني، بص لي بنظرة عمري ما شوفتها فيه، نظرة كانت خليط شديد بين القلق، والذنب، والضياع. مد إيده ناحيتي كأنه عايز يلمسني، كأنه لأول مرة بعد 28 سنة شايفني بنته اللي من صلبه، وقال بصوت متكسر مريم… إنتِ… إنتِ حتة مني بجد؟
رجعت خطوة لورا بقرف ووجع، ونزلت دموعي وأنا بهز راسي وبقول له إوعى تلمسني! دلوقتي بقيت بنتك؟! بعد 28 سنة إهانة وتشكيك وشك؟! بعد ما خليتني أحس إني غلطة في الدنيا وعالة عليك؟! امشي يا عثمان.. امشي عشان البيت ده فيه حساب كبير لازم يتفتح!
نزلنا، ركب العربية وساق بسرعة وتهور عمره ما عمله، كان بيكسر الإشارات ويضغط على البنزين لآخره وهو بيضرب الدريكسيون بإيديه وبيشتم بصوت عالي وبيزعق بشدة. طول السنين دي كان مفكر نفسه هو الضحية والمخدوع، والنهارده اكتشف إنه كان عايش في كدبة هو نفسه مش فاهم أولها من آخرها.
وصلنا العمارة في مصر الجديدة، طلع السلالم جري كأنه شاب عنده عشرين سنة، ومستناش حتى الأسانسير. طلع المفاتيح بإيد بتترعش، فتح الباب ورزعه في الحيطة بقوة هزت الشقة كلها.
البيت كان هادي بشكل مريب… ريحة البخور اللي أمي متعودة تولعه كل جمعة كانت مالية الصالة. كانت قاعدة على الكنبة القديمة، لابسة إسدال الصلاة، وفي إيدها سبحتها. أول ما الباب اترزع، رفعت راسها بهدوء غريب، هدوء ست كانت مستنية اللحظة دي من سنين طويلة وعارفة إنها جاية لا محالة. ملامحها كانت خالية من أي قلق، بس عينيها كانت غرقانة حزن ومرارة.
أبويا اندفع عليها بقوة، مسكها من كتف الإسدال ووقفها وهو بيهزها بقوة انطقييي!! مريم طلعت بنتي أنااا!! بنتي أنا يا ظالمة! بس طلعت مش بنتك إنتِ!! إنتِ مين؟! وديتي بنتي الحقيقية فين؟! ومريم دي جبتيها منين؟ ومين أمهاااا؟!
سعاد ما صرختش، وما حاولت تدافع عن نفسها ولا حتى تشيل إيده، فضلت باصة في عينيه بكل برود، وابتسمت ابتسامة باهتة تقطع القلب، وقالت بصوت هادي زي النبرة أخيرًا يا عثمان؟ أخيرًا ارتحت وعرفت إن شرفك سليم؟
انطقييي يا ولية بدل ما أؤذيك هنا وأتخلص منك مكانك!! صوت أبويا كان بيزلزل حيطان الشقة.
أنا وقفت في نص الصالة، رجلي مش شيلاني، حاسة إني في وضع صعب، صوتي طلع بالعافية بيترجى ماما… علشان خاطري ردي عليه… قولي له إن الورقة دي غلط… قولي لي إنك أمي اللي ولدتني!
سعاد سابت عينيها تيجي في عيني، ودموعها نزلت بصمت وجع، وقالت بنبرة خلت الإحساس يتجمد في عروق أبويا مريم بنتك من صلبك يا عثمان… وأمها مش غريبة عنك ولا عني… بس السؤال اللي لازم تسأله لنفسك مش أنا عملت كده ليه… السؤال هو إنت عملت إيه زمان في البنت الغلبانة اللي كانت شغالة في مكتبك وسافرت فجأة واختفت من 28 سنة؟!
أول ما نطقت الجملة دي، إيد أبويا سابت كتفها وفلتت في الهوا، ورجع لورا خطوتين كأنه اتضرب برصاصة في قلبه، وشه اتقلب أزرق والخرس نزل على لسانه!
يتبع
