قصص

مراتي والعصابه

حكايات انجي الخطيب

راندا شهقت وضربته في كتفه: ـ يا قليل الأدب! هو إنت هتفضل تفكرني بالموضوع ده لحد إمتى؟ ـ لحد ما تعمليلي الرقصة اللي وعدتيني بيها. ـ يا أخويا روح شوف شغلك! ضحك، لكن ضحكته اختفت لما موبايله رن. بص للشاشة، ولقى اتصال من زميله في إدارة البحث.

ـ أيوه يا كريم. جاله صوت كريم متوتر: ـ أحمد، لازم ترجع الإدارة فورًا. ـ فيه إيه؟ ـ لقينا حاجة في الموبايل اللي كان في العربية. أحمد وقف: ـ حاجة إيه؟ ـ صور ومحادثات بتأكد إن اللي دبّر الواقعة مش مجرد واحد من رجالة العصابة.

أحمد ضيق عينيه: ـ مين؟ كريم سكت لحظة قبل ما يرد: ـ المقدم فؤاد. أحمد حس إن الدم اتسحب من وشه. ـ إنت متأكد من الكلام ده؟ ـ متأكدين إن فيه رقم صادر من مكتبه كان بيتواصل مع زعيم العصابة، وفيه تسجيل صوتي كمان.

أحمد بص لراندا اللي كانت بتراقبه بقلق، وقال: ـ ابعتلي التسجيل، ومتتكلمش مع أي حد في الموضوع ده غيري. قفل المكالمة، وفضل واقف مكانه. راندا قربت منه: ـ في إيه يا أحمد؟ ـ واضح إن الموضوع أكبر مما كنا متخيلين.

ـ مين فؤاد؟ أحمد بص لها: ـ رئيسي المباشر. راندا فتحت عينيها: ـ يعني ظابط؟ هز راسه. ـ والظابط ده هو اللي كان بيساعد العصابة؟ ـ لسه بنتأكد، لكن الأدلة بتشير لكده. راندا حطت إيدها على راسها: ـ أنا مش فاهمة حاجة.

.. هو ليه حد من الشرطة يعمل كده؟ أحمد رد بحزن: ـ مش كل اللي لابس بدلة بيبقى أمين، ومش كل اللي معاه سلطة بيستخدمها في الحق. في اللحظة دي، خرجت ممرضة وقالت إن والد راندا اتنقل للعناية المركزة وإنهم يقدروا يشوفوه لمدة خمس دقايق.

راندا دخلت بسرعة. أول ما شافت أبوها نايم على السرير، والأجهزة حواليه، دموعها انفجرت. قربت منه، ومسكت إيده بحذر. ـ بابا… أنا جيت يا حبيبي. بصت لوشه الشاحب، وفضلت تمسح على إيده. ـ إنت وعدتني إنك هتفضل جنبي، فاكر؟

إنت لسه ما شفتش أحفادك، ولسه ما اتخانقتش مع أحمد على مصاريف البيت، ولسه ما قلتليش إن طبخي ملوش طعم… قوم بقى، أنا زهقت من إني أكلمك وإنت ساكت. أحمد كان واقف عند الباب، وعينيه متعلقة بيها. راندا قربت من ودن أبوها وهمست: ـ وبعدين أنا عايزة أقولك سر.

.. أحمد طلع بيحبني، حتى إنه كان مستعد يدفع فلوس عشان ينقذني، بس متقولوش إني قلتلك. أحمد ابتسم غصب عنه، لكن قلبه كان موجوع من منظرها. بعد دقائق، خرجت من الغرفة، وسندت راسها على صدره. ـ هو هيفوق، صح؟ أحمد باس راسها: ـ بإذن الله هيفوق.

في اللحظة دي، وصل كريم للمستشفى. كان زميل أحمد وصديقه من أيام الكلية، شاب طويل وهادئ، لكن ملامحه كانت متوترة. أحمد استقبله بعيد عن راندا. ـ إيه اللي حصل؟ كريم طلع موبايله وفتح التسجيل. صوت فؤاد كان واضح: ـ أنا مش عايز أي غلطة، البنت لازم تفضل تحت إيدكم لحد ما أحمد يسلم الملف، وبعدها اتصرفوا فيها زي ما تحبوا.

صوت زعيم العصابة رد: ـ والراجل الكبير؟ فؤاد ضحك: ـ خلوه عبرة ليه، عشان يعرف إن اللعب معانا تمنه غالي. أحمد قبض إيده لدرجة إن مفاصلها ابيضت. ـ ده كان عارف إن والدها هيتأذى! كريم حط إيده على كتفه: ـ اهدى، لازم نتحرك بالقانون.

أحمد بصله: ـ فين التسجيل الأصلي؟ ـ على جهاز المراقبة اللي ضبطناه في مخزن العصابة، بس فيه مشكلة. ـ إيه؟ ـ فؤاد اختفى من مكتبه من ساعة ما عرف إن العصابة اتقبض عليها. أحمد ضيق عينيه: ـ يعني هرب؟ ـ غالبًا، والأخطر إنه عارف إننا وصلنا له.

أحمد بص ناحية راندا، اللي كانت قاعدة قدام غرفة العناية، وبعدين رجع بص لكريم: ـ لازم نوفر لها حماية. كريم هز راسه: ـ أنا هرتب قوة سرية تكون معاها. لكن أحمد رفض فورًا: ـ لأ، أنا مش هسيبها لوحدها.

كريم بصله باستغراب: ـ أحمد، إنت مش هتقدر تعمل كل حاجة بنفسك. ـ مش هسيبها. كريم قرب منه وقال بجدية: ـ اسمعني، إحنا محتاجينك في القضية دي، ولو فؤاد هرب ومعاه حد يساعده، ممكن يضيع كل اللي جمعناه.

أحمد سكت، وبعدين بص لصاحبه: ـ طيب، بس محدش يقرب منها غير وأنا عارف. كريم ابتسم: ـ حاضر يا سيدي، هنعمل اللي حضرتك عايزه. رجع أحمد لراندا، ولقى إنها كانت بتتكلم في الموبايل. أول ما شافته قفلت المكالمة. ـ مين كان بيكلمك؟ راندا ردت: ـ رقم غريب.

أحمد مد إيده: ـ وريني. ناولته الموبايل، فلقى رسالة وصلت بعدها بثواني. «خلي جوزك يسلم الملف، وإلا المرة الجاية مش هنسيب أبوكي يعيش». أحمد حس بغضب شديد، لكن حاول ما يبينش. راندا لاحظت وشه. ـ فيه إيه؟ أحمد قفل الشاشة وقال: ـ مفيش، مجرد رسالة سخيفة.

راندا ضيقت عينيها: ـ أحمد، أنا مش طفلة، ومش هتخبى عليا حاجة. أحمد بص لها، وبعدها قرر يقول الحقيقة. ـ فؤاد اللي ورا كل ده، وهرب، والظاهر إنه بعتلك ضغط. راندا وشها اصفر: ـ يعني لسه الموضوع مخلصش؟ ـ لأ، بس المرة دي إحنا اللي هنخلصه.

راندا قامت من مكانها: ـ أنا مش هخاف منهم. أحمد مسك إيدها: ـ أنا مش عايزك تعملي أي تصرف من غير ما تبلغيني. ـ حاضر. ـ ووعد؟ ـ وعد. بصلها بشك: ـ راندا… ابتسمت ببراءة: ـ نعم يا عيون راندا؟

ـ أنا عارف النظرة دي. ـ أنهي نظرة؟ ـ نظرة واحدة ناوية تعمل مصيبة. راندا حطت إيدها على صدرها: ـ أنا؟! حرام عليك، ده أنا ملاك. أحمد ضحك رغم قلقه: ـ ملاك؟! ده إنتِ لو دخلتي الجنة هتعملي مشكلة مع الحور العين عشان مين اللي بيرقص أحسن!

ضربته على دراعه: ـ قليل الأدب! لكن في اللحظة دي، ظهر دكتور العناية وقال إن حالة والدها بدأت تستقر، وإنه ممكن يفوق خلال الساعات الجاية. راندا حمدت ربنا، وأحمد قرر ياخدها ترتاح شوية في البيت بعد ما اتأكد إن فيه حراسة حوالين المستشفى.

قبل ما يمشوا، وقف قدام غرفة العناية، وبص لوالدها من الزجاج. ـ خلي بالك من بنتك يا عمي، أنا هحافظ عليها، بس إنت كمان لازم تقوم عشان أنا مش ناقص محاكمات منك. راندا ابتسمت ومسكت إيده. ـ يلا يا سيادة الظابط. خرجوا من المستشفى، وركبوا العربية.

تابع المقال

Leave a Reply

Your email address will not be published. Required fields are marked *

Back to top button