قصص

حماتي استباحت بيتي ج3

حكايات مني السيد

فهمني يا أحمد. قولي إيه اللي أنا فاهماه غلط في إيصال تحويل بمية وعشرين ألف جنيه لجوز أختك بتاريخ امبارح؟ ولا فهمني إيه الغلط في عقد إيجار شقة جديدة في التجمع باسم مامتك وأختك ومدفوع مقدمها بالكامل؟!

سكت. مقدرش ينطق بكلمة، لأن الورق اللي في إيده كان أصدق من أي كدبة ممكن يألفها في اللحظة دي.

قمت وقفت قصاده، وقلت بصوت واطي لكن كل كلمة فيه كانت بتطلع زي الحقيقة القاطعة: بقالك تلات شهور بتقولي إن الشغل مأخر الحوافز. بقالك تلات شهور بتخليني أدفع إيجار حضانة بنتك من مرتبي. بقالك تلات شهور بتخليني أنزل أشتري أكل البيت ولبس البنت وأدفع الفواتير، وأنا صابرة وساكتة وبقول معلش، جوزي في أزمة ولازم أقف جنبه!

قربت منه خطوة، وكملت وعيني في عينه: النهارده الصبح نزلت دفعت تلات تلاف جنيه من مكافأة شغلي علشان أجيب لحمة تكفينا الأسبوع، ووقفت خمس ساعات على رجلي في المطبخ علشان أعملك أكلة حلوة تفرحك… وإنت في نفس الوقت كنت محول لجوز أختك مية وعشرين ألف جنيه، ومأجر لأمك وأختك شقة جديدة، وكمان بتقول لمنى وهي ماشية أنا هطلبلك أكل دليفري من أحسن مطعم!

أحمد مسح وشه بإيده بعصبية، وانفجر فجأة يحاول يبرر عملته: أيوه! عملت كده علشان مكنش قدامي حل تاني! شريف كان عليه شيكات ومهدد بالمساءلة، ومنى جت تعيطلي هي وأمي وقالتلي بيتي هيتخرب! وأمي قالتلي إن قعدتها هنا بقت تقيلة عليكي، وإنها عايزة شقة تسترها هي وبنتها! كنت عايزاني أعمل إيه؟ أسيب جوز أختي يواجه المشكلة وأمي تتبهدل؟!

بصيتله بتعجب، كأني مش مصدقة مستوى الأنانية والعمى اللي هو فيه: يقوم الحل عندك إنك تسرق بيتك وبنتك ومراتك؟! تاخد قرض من شغلك وتقبض جمعية وتديهم لواحد فاشل مش عارف يشيل مسؤولية بيته، وتيجي على بنتك اللي عندها أربع سنين وتستخسر فيها مصاريف حضانتها؟!

أنا مستخسرتش حاجة في بنتي! إنتِ معاكي مرتبك ومكافآتك والحمد لله مستورة، لكن منى معهاش شغل ومش لاقية!

الكلمة دي نزلت عليا خلتني أحس إني كنت عايشة مع واحد غريب تمامًا!

هزيت راسي بأسف وقلت: يعني علشان أنا ست بشتغل وبتعب وبشيل المسؤولية، بقيت اختبار لنفسي؟! بقيت في نظرك البنك اللي بيصرف على بيتك، علشان حضرتك تاخد فلوسك وتعمل بيها شهم وكريم على أهلك؟!

يا نادية وطي صوتك ماما هتسمع!

خليها تسمع! هي مش شريكة معاك في كل التخطيط ده من الأول؟!

وقبل ما أحمد يرد، باب أوضة سعاد اتفتح. خرجت سعاد وهي لابسة طرحتها ووشها مشدود بتوتر، وبصت لابنها وقالت بصوت عالي: في إيه يا أحمد؟ هي لسه بتزعقلك؟ إنت ساكتلها ليه؟!

عينيها وقعت على الورق اللي في إيد أحمد، فعرفت على طول إن السر انكشف. لحظة ارتباك صغيرة عدت على وشها، لكنها بسرعة قلبت الترابيزة ولبست وش الجبروت والاستحقاق اللي متعودة عليه: أيوه يا نادية! إيه اللي مضايقك في الورق ده؟ ابني حر في فلوسه! شقى عمره وتعب السنين، ومن حق أمه وأخته ياخدوا منه! إنتِ كنتي فاكرة إنك هتستحوذى عليه لوحدك وتمنعيه عن أهله؟!

بصيت لسعاد بهدوء غريب، وقلت: شقى عمره؟! طب يا ماما سعاد، بما إنك فتحتي السيرة، خلينا نحسبها صح. ابنك لما اتجوزني مكنش معاه تمن نص الشقة اللي إحنا واقفين فيها دلوقتي. الشقة دي أنا دافعة فيها نص تمنها من تحويشة عمري ودهبي، والعقد مكتوب باسمي وباسمه بالنص.

سعاد اتفاجأت وبصت لابنها باستنكار: إيه الكلام ده يا أحمد؟!

أحمد وطى راسه في الأرض ومردش، وده كان أكبر اعتراف قدام أمه.

كملت كلامي وأنا باصة لسعاد في عينها: وتلات سنين كاملين حضرتك قاعدة في أوضتي، واخدة راحتك في بيتي، بتاكلي من خيري، وبتاخدي حاجتي تديها لبنتك من ورا ضهري، وعمري ما فتحت بُقي بكلمة واحدة احترامًا لسنك ولجوزي. لكن توصل بيكم الجرأة إنكم تاخدوا فلوس بيتي وتأجروا بيها شقة جديدة، وكمان قبل ما تمشوا تيجوا تسرقوا الأكل من حلتي وتقولوا عليا بخيلة؟!

سعاد وشها احمرّ من الضيق، وزعقت: إحنا مش محتاجين حاجة منك! والحمد لله إن ربنا كرمنا بشقة نضيفة تريحنا من قرفك ومن معايرتك لينا باللقمة! يلا يا أحمد، لم هدومك وتعالى عيش معانا في الشقة الجديدة، وسيبلها الشقة تشبع بيها!

الصالة كلها سكتت للحظة. سعاد كانت باصة لأحمد بثقة، مستنية إنه يمشي وراها زي كل مرة، ويكسرني قدامها.

وأنا بصيت لأحمد… بصيتله نظرة واحدة، مفيهاش لا رجاء ولا دموع ولا خوف. نظرة بتقوله اختار دلوقتي، لأن اللحظة دي ملهاش رجوع.

أحمد بص لأمه، وبعدين بص للورق اللي في إيده، وبعدين بصلي. شريط حياته كله عدا قدام عينه في ثواني. هو عارف كويس أوي إن شريف جوز أخته مجرد طماع، وأول ما المية وعشرين ألف جنيه يخلصوا هيطلب غيرهم، وإن قعدته مع أمه وأخته في شقة واحدة معناها إنه هيتحول لمجرد ماكينة فلوس شغالة ليهم ليل نهار، وهيفقد بيته، ومراته اللي شايلاه، وبنته اللي ملهاش ذنب في أي حاجة.

أحمد بلع ريقه بصعوبة، وبص لأمه وقال بصوت مبحوح: أنا مش ماشي من بيتي يا ماما.

سعاد برقت بعينيها كأنها مسمعتش كويس: إنت بتقول إيه يا أحمد؟! بتختارها هي على أمك وأختك؟!

يا ماما إنتوا شقتكم الجديدة جاهزة ومفروشة، وأنا عملتلكم أكتر من اللي أقدر عليه. لكن أنا ليا بيت وبنت مقدرش أسيبهم.

سعاد بصتله بغل، وخبطت إيدها على صدرها: بقى كده يا أحمد؟! بعد ما وقفت جنبك وربيتك، تبيعني علشان خاطر دي؟! ماشي يا أحمد، بس افتكر كويس إنك لما تحتاجلنا مش هتلاقينا!

لفت سعاد ودخلت أوضتها أغلقت الباب وراها، وبدأت تلم هدومها بعصبية وصوت الشنط وهي بتتفتح وتتقفل مالي الشقة.

تابع المقال

Leave a Reply

Your email address will not be published. Required fields are marked *

Back to top button