قصص

ثمن القناع ج2

حكايات مني السيد

البارت الثاني
الجزء 2 والاخير

صوت تكة الكالون الجديد وهو بيقفل كان عامل زي صوت حاد نزل قطع كل حبل كان رابط طارق بالبيت ده.

طارق فضل متسمر في مكانه لثواني، عقله عاجز يستوعب إنه بره الشقة، في مدخل السلم، بفوطة مبلولة على وسطه وشعره بينقط مية على كتفه السقعان. البرد لسع ضهره، بس لسعة الموقف كانت أشد كتير من برد أمشير.

مد إيده بتردد مسك أوكرة الباب المصفح وهزها بكل عزم ما فيه، الأوكرة كانت حديد ثابت مابتتحركش. بسمة! افتحي يا متهورة! افتحي الباب ده وبطلي هبل، سامعة؟! افتحي بدل ما أكسر الباب ده على رأسك ورأس عيالك!

ما كملش جملته ولقى باب شقة الحج فتحي في الوش، في الدور الرابع، بيوارب بالراحة. الحج فتحي، راجل على المعاش مابيعديش هفوة في العمارة، طلع نضارته من جيب جلابيته الصوف ولبسها، وبص لطارق من فوق لتحت بذهول لا حول ولا قوة إلا بالله.. خير يا باشمهندس طارق؟ إيه اللي موقفك كده بحالتك دي على السلم بعد المغرب؟ هدومك فين يا بني؟!

طارق وشه احمر وبقى شديد الحمرة، سحب حتة من الفوطة يغطي بيها صدره اللي بيترعش، وصوته طلع متهدج ومشروخ لا يا حج فتحي.. مفيش حاجة.. الباب رد عليا بالغلط وأنا بنشر حاجة في البلكونة.. قصدي بطرد قطة.. بسمة جوة نايمة بس ومسمعتش..

باب مين اللي رد يا بني والكراتين دي كلها مرمية على بسطة السلم؟! دي عزال كامل أهو! الشنط دي إيه يا طارق؟

في اللحظة دي بالظبط، تليفون طارق، اللي مرمي في جيب الجاكيت الكحلي فوق واحدة من الكراتين، صاح برنته العالية بنغمة مخصوص عاملها لأمه. الشاشة نورت في العتمة باسم ست الحبايب.

طارق وطى على الكرتونة زي السارق، كتم الموبايل بسرعة في إيده، وبص للحج فتحي وقال بصوت واطي ومخنوع ثواني يا حج بعد إذنك.. مكالمة شغل مهمة.

دخل طارق اتحشر في الزاوية اللي جنب ماسورة الغاز عشان يداري جسمه من عينين الراجل، وفتح الخط بصوت بيترجف أ.. ألو.. أيوة يا ماما. صوت مديحة طلع من السماعة حاد، عالي ومستعجل وفيه نبرة الأمر المعتادة إنت فين يا طارق؟! السواق بتاعي مستني تحت بيتك بقاله نص ساعة! إنت نسيت إن عزومة بكرة دي هيبدأ تجهيزها من الليلة؟ الأجبان لازم تترص واللحمة تتبل! إنت لسه ما نزلتش ليه يا بني بالحاجة؟! الضيوف هيجوا الضهر، عايز تحرجني؟!

طارق بلع ريقه اللي كان ناشف زي الحطب، عينه جت على باب الشقة اللي جوه منه تلاجة متقفلة بالمفتاح فيها شقى عمره وفلوس السلفيات اللي استلفها من معارفه عشان المنظرة يا أمي.. اسمعيني بس.. حصل ظرف كده.. العربية.. العربية عطلت وأنا مروح.. مديحة قاطعته بحزم وصوت عالي هز ودنه عربية إيه وكلام إيه؟! إنت بتهزر؟! أنا قايلة للهوانم إن ابني مهندس كبير وجايب بوفيه مستورد مخصوص لصالون الثقافة! اتصرف، خد تاكسي، أجر عربية نص نقل، المهم الحاجة تكون في تلاجتي قبل ما الساعة تدق عشرة، وإلا لا إنت ابني ولا أعرفك!

الخط قطع في وشه.

طارق حس إن الدنيا بتلف بيه. قعد على كرتونة من الكراتين وهو ماسك راسه بإيديه الاتنين، الفوطة بدأت تفك من على جنبه، والهوا الساقع دخل في عظامه. بص في كرتونة هدومه، شد بنطلون ترنج قديم كان محطوط على الوش، لبسه بالعافية ورجله بتترعش، ولبس تيشرت نص كم، وقعد يخبط على باب شقته تاني بقبضة إيده، بس المرة دي بقلق ورجاء بسمة.. افتحي عشان خاطر العيال.. نتفاهم جوة.. موقفي بقى واضح في العمارة، الحج فتحي واقف يتفرج علينا، افتحي وخدي اللي إنتي عايزاه بس بلاش الشارع!

من ورا الباب المصفح، صوت بسمة طلع هادي، مستقر، ومفهوش ذرة تردد الشارع ده اللي إنت كنت عايز ترمي فيه كرامتي وكرامة ولادك لما قولت ياكلوا رز وعدس عشان أمي متدخلش بإيدها فاضية. مفاتيحك وحاجتك كلها عندك، انزل خد تاكسي وروح لست الحبايب، قولها ابنك جه وإيده فاضية عشان هو أصلاً معندوش حاجة يملى بيها إيده غير على حساب عياله.

والفلوس اللي دفعتها في الأكل ده كله؟! دي محوشة الشهر وسلفيات على مرتبي! هتروح عليا كده؟! الأكل ده دخل تلاجة ولادك يا طارق.. اعتبره نفقة المتعة والمؤخر اللي مش هتشوف منهم مليم، وأهو برضه عيالك أولى بلحم أبوهم من نسوان النادي بتوع مامتك.

صوت رجلين طالعة على السلم خلا طارق يسكت تماماً. كان البواب، عم شعبان، طالع وفي إيده مقشة وجردل، ووراه ابن الحج فتحي الصغير. عم شعبان وقف مبرق يا فتاح يا عليم يا رزاق يا كريم.. إيه ده يا باشمهندس طارق؟! هو حضرتك بتعزل في نص الليل كده ليه؟! والحاجة دي كلها معطلة السلم، السكان مش عارفين يعدوا!

طارق حس إن كرامته بتتداس بأحذية كل اللي في العمارة. الراجل اللي كان بينزل يرمي المفاتيح للبواب من البلكونة ويقوله اغسل العربية يا واد، واقف قدامه بهدوم قديمة ووشه أصفر من القهرة.

مفيش يا عم شعبان.. بنضف الشقة بس.. شيل الشنط دي نزلها تحت على الرصيف لحد ما أطلب أوبر. عم شعبان هز راسه بشك طب والست والعيال مش معاك؟ نزل الحاجة وإنت ساكت يا عم شعبان!

نزل طارق السلم ورا الشنط خطوة بخطوة، كل درجة كان بينزلها كانت بتحسسه إنه بيهبط لسابع أرض. لما طلع للشارع، الهوا لطش وشه، وقعد على كرتونة من كراتينه على الرصيف مستني العربية، والناس اللي رايحة وجاية من صلاة العشا في الجامع اللي في أول الشارع بتبص عليه باستغراب.

جوة الشقة، الدنيا كانت في ملكوت تاني خالص.

بسمة سندت ضهرها على الباب بعد ما سمعت خطواته وهي بتبعد وصوته وهو يغادر من العمارة. أخدت نفس طويل، نفس كان محبوس جوة صدرها بقاله ست سنين كاملة. حست إن الشقة اللي كانت ضيقة وخانقة فجأة بقت واسعة، والسقف اللي كان هابط على رأسها بقى عالي ونضيف.

راحت على أوضة الأطفال، لقت مازن صحي وقاعد على السرير يفرك في عينيه ماما.. هو مين اللي كان بيخبط جامد كده؟ بابا جه؟ بسمة قعدت جنبه، مسكت وشه بين إيديها وباست جبينه ده الهوا يا حبيبي.. الباب رزع بس من الهوا.. نام إنت وارتاح. هو بكرة في موز يا ماما في اللانش بوكس؟ بسمة ابتسمت بدموع خفيفة مسحتها بسرعة قبل ما يشوفها بكرة في موز، وتفاح أحمر من الكبير، وجبنة رومي بتشد، وفي بانيه ولحمة محمرة.. بكرة هناكل كل اللي نفسك فيه يا قلب أمك.

الولد ابتسم ونام وهو مطمن، ومريم جنبه كانت بتتنفس بهدوء الأطفال الهادي.

بسمة قامت دخلت المطبخ. ولعت النور، وبصت للتلاجة الكبيرة. فتحت القفل الصغير بالمفتاح اللي في جيبها، وفتحت البابين على وسعهم. الرفوف كانت مليانة خير أطباق اللحمة البلدي الفاخرة المغلفة، الجبن المستوردة اللي كان طارق بيجيبها بالاسم لأمه، الشوكولاتات، علب العصير، حتى المكسرات والفاكهة.

مدت إيدها، طلعت تفاحة حمرا كبيرة، غسلتها وأكلت منها قطمة. طعم السكر كان حقيقي، مش مسروق، ولا جاي من حد.

السابق1 من 2
تابع المقال

Leave a Reply

Your email address will not be published. Required fields are marked *

Back to top button