ابويا كتب نص ثروته لابن اخويا، ولما اعترضت هحرمني من كل حاجه، وقتها فكرت غلط ورميته في الميه، بس بعد ست شهور جيه يعزيني في وفاة ابويا واللي عمله وقتها كان مفاجأة. أخويا الوحيد مات وساب وراه ولد اسمه حازم… حازم ده اتولد بظروف صحية صعبة، وعلى كرسي متحرك، وحاولنا معاه في كل حتة وفي كل مستشفى، دكاترة مصر وبره، بس ربنا أراد يفضل كده.
أبويا الله يرحمه كان بيحب الولد ده حب غريب، رباه من بعد موت ابوه وكبره قدام عينه لحد ما بقى عنده عشرين سنة.
لحد يوم ما أبويا تعب، وحس إنه خلاص في الأيام الأخيرة من عمره، جمعنا أنا وحازم، وقال إنه كتب نص ثروته لحازم، والنص التاني ليا.
يومها الدنيا اسوّدت في عيني! نص التعب ده كله، والشغل اللي بنيته مع ابويا إيد بايد، يروح للولد ده؟ حازم نفسه أول ما سمع كده قعد يبكي وقال لجده أنا مش عايز فلوس يا جدي، أنا مش عايز غيرك، ما تسبنيش،
بس أنا مسكتش وقلت له بصوت عالي: عوزت أو معزتِش، مش هتاخد حاجة! ده حقي أنا!
وبصيت لابويا وقولتله بحدة… أنا ابنك وريثك الوحيد، أخويا مات قبلك يا بابا، يعني هو مالوش حق قانوني، يبقى ابنه يورث معايا بالنص ليه؟!
أبويا بص لي بغضب شديد وقال بصوت مرتعش: أنت بتزعقلي ليه؟ أنا حر في مالي! وابن أخوك حالته زي ما انت شايف، ومحتاج الفلوس دي عشان يعيش عيشة كريمة.
بس أنا قلت له بجنون وعصبية: على جثتي! دي فلوسي وحقي لوحدي!
ساعتها أبويا قعد على الكرسي بتاعه، وبص لي بحزم شديد وقال: لا دي فلوسي أنا، وأقدر أحرمك منها كلها وأديها لحازم.. سامع ولا لأ؟ لو مرضتش باللي أنا قررته، مش هتاخد حاجة خالص.
كلمة ونص.. لقيت نفسي هخسر كل حاجة في لحظة، الشغل، الفلوس، كل حاجه. مشيت من قدامه وأنا بفرك في إيدي من الغيظ، ومن غير ما أقول كلمة واحدة.
فضلت قاعد أيام وليالي دماغي بتلف، بفكر إزاي أحل المشكلة دي، لحد ما الشيطان زيّن لي فكرة خاطئة بوظت حياتي.
تاني يوم، دخلت لأبويا وأنا مبتسم، وقلت له إني وافقت على قراره، وإني فكرت كويس ولقيت إن حتى لو الفلوس كلها معايا، مش هسيب ابن أخويا، وإني ندمت وحسيت إن هو عنده حق في كل كلمة قالها.
أبويا ابتسم برضا وحضني وصالحني، وحس إنه ارتاح قبل ما يموت.
وبعد أيام قليلة، كنت مجهز لكل حاجة.. كان عندي شغل ضروري في شرم الشيخ، ورحت عرضت على أبويا بخباثة ودهاء إن حازم يروح معايا يغير جو ويشوف الدنيا والبحر، يمكن نفسه تفك. أبويا الأول اتردد وكان مش عايز حازم يبعد عنه.
بس حازم لما سمع عيونه لمعت بفرحة، وقال: يا ريت يا جدي، نفسي أشوف البحر.
أبويا ابتسم بحنان وقال له: خلاص يا حبيبي، روح مع عمك اتبسط.
وهناك في شرم، اتفقت مع سواق لانش قبضتُه تمن السكوت وطلعنا رحلة جوة البحر بعيد عن الناس. في نص المية، والموج كان عالي، قربت من حازم وبهدوء قلت له: عايزك متزعلش مني يا حازم.. بس الشغل اللي تعبت فيه وكبرته مش من حقك.. هتوحشني.
الولد بص لي بعيون مذهولة وخوف، قبل ما ينطق بكلمة أو يفهم قصدي، مسكته من رجليه ودفعته لقدام.. وقع في المية.
فضل يستغيث ويصرخ وينادي عليا، وأنا.. أنا كنت قاعد بكل قسوة ببص عليه، مستنيه يغرق قدام عيني، والسواق قاعد جنبنا ولا كأن بيحصل حاجة، قابض تمن السكوت وزيادة!
رجعت الشط لوحدي، وبلغت إن الولد اتزحلق من على حافة اللانش وغرق ومقدرتش ألحقه. فرق الإنقاذ فضلت تدور يومين، ولما لقوه، كان جثة هامدة وميت بقاله كتير.
رجعنا بيه لأبويا اللي من كتر الصدمة والحزن بقى طريح الفراش، لا بيقوم ولا بيقعد، روحه كانت بتطلع بالبطيء.
وأنا بنفسي كفنت حازم مع المغسل، ونزلته القبر بإيدي، وساويت التراب عليه وأنا جوة نفسي بقول: خلاص.. ارتحت.. خلصنا، والثروة بقت بتاعتي لوحدي!
أبويا فضل نايم على السرير شهرين كاملين، عيونه كانت دايما تبص لي بغضب مقهور ودموع، كان حاسس ومتاكد إني غدرت بحازم، بس مكنش قادر يثبت حاجة ولا حتي ينطق كلمة من كتر الوجع والحزن.
وبعد شهرين.. أبويا مات. حسيت إن الدنيا كلها بقت في إيدي، وإن خلاص.. مفيش حد يقف في طريقي تاني.
يوم العزا، كنت واقف قدام السرادق بستقبل الناس يعزوني، وفجاة.. حسيت بحركة جنبي. قرب مني شاب واقف على رجليه الاتنين، لابس جاكيت شيك وحاطط الكاب بتاعه على دماغه عشان يداري وشه.. ومد إيده ليا وقال بصوت هادي وثابت: البقاء لله.
رفعت عيني وأنا برد السلام وببص في وشه.. وكانت صدمة عمري اللي جمدت الدم في عروقي وخليت قلبي يقف!
كان.. كان هو هو.. حازم!
الكلمة هربت من زوري، ورجليا مشالتنيش فوقعت على الأرض من شدة الرهبة والذهول.
الشاب بص لي بابتسامة باردة، واللي عمله بعد كده ما كنتش أتخيله في أسوأ كوابيسي!
حازم؟! إنت حازم؟!
صرخت بالكلمتين دول وأنا بترعش، وحسيت إن الأرض بتلف بيا، وإن روحي بتتسحب من جسمي. الشاب اللي واقف قدامي ابتسم ابتسامة هادية، ورفع إيده وخلع الكاب اللي كان مغطي جزء من وشه، وقال بصوت ثابت:
أيوه يا عمي… أنا حازم، ابن أخوك اللي إنت رميته في البحر بإيدك، واللي دفنته بإيدك كمان!
الناس اللي كانوا واقفين حوالينا بصوا لبعض باستغراب، وفيه اللي افتكر إن دي صدمة موت أبويا مأثرة على أعصابي، لكن أنا كنت عارف كويس إن اللي واقف قدامي مش خيال ولا كابوس.
ده حازم… اللي أنا شفته بعيني وهو بيغرق!
