لما الام تقول كفاية للكاتبة نرمين عادل همام
مش كل أم بتسكت تبقى ضعيفة، ولا كل أم بتسامح تبقى خايفة
دي الأم لو قالت كفاية، تقف الدنيا قدامها وتبقى هي الحكاية
كرامتها تاج فوق راسها، وعزيمتها أقوى من أي نهاية، ولما تقرر تسترد حقها، يبقى انتصارها ألف بداية
بعد ما فتحت بيتي لابني ومراته، لقيت مراته بعد تلات أيام بس واقفة في مطبخي وبتأمرني أفضّي أوضة نومي قبل الظهر! والأسوأ من بجاحتها إن ابني نفسه وقف جنبها، وطلب مني أكون عاقلة ومرنة وأسيب لهم الأوضة اللي عشت فيها مع أبوه أكتر من تلاتين سنة. بس هما ما كانوش يعرفوا إن الست اللي ساكتة قدامهم دي مش ناوية تسيب حقها، وإن اللي هيحصل بعد رجوعهم للشقة هيخليهم يقفوا مكتومين ومش عارفين ينطقوا بكلمة واحدة!
وقفت نورهان في مطبخي، ماسكة كوباية قهوة ساقعة، وبتحرّك التلج اللي جواها بمعلقة صغيرة، وبكل برود قالت لي:
«عايزين أوضتك تكون فاضية قبل الساعة حداشر يا طنط ماجدة، عشان أنا ومصطفى هننقل حاجتنا فيها النهاردة.»
فضلت باصة لها كام ثانية، مش مصدقة اللي سمعته. كنت مستنية تضحك وتقول إنها بتهزر، أو حتى تبتسم وتوضح إنها بتتكلم عن حاجة تانية، لكن ملامحها كانت ثابتة، وكأنها بتطلب مني أزحزح كرسي من مكانه، مش أسيب أوضتي وبيتي!
رديت عليها وأنا بحاول أتمالك أعصابي:
«إنتِ بتقولي إيه يا نورهان؟ دي أوضتي أنا، وده بيتي!»
رفعت عينيها للسقف بضيق، وقالت:
«عارفة يا طنط إن الشقة باسمك، ومحدش قال غير كده، بس إحنا محتاجين أوضة أكبر وحمام لوحدنا. إنتِ ممكن تنقلي حاجتك في أوضة الضيوف اللي جوه، وهي كده كده فاضية.»
وقبل ما أرد عليها، دخل ابني مصطفى المطبخ، وبدل ما يستغرب كلام مراته أو حتى يسألها إزاي تقول لي الكلام ده، بص لي وقال بنبرة ضايقتني أكتر من طلبها:
«يا ماما، ما تبقي عاقلة ومرنة شوية بقى!»
بصيت له وأنا مش مصدقة إن ده ابني اللي ربيته وكبرته، وقلت لنفسي: هو أنا سامعة صح؟!
بقالهم تلات أيام بس قاعدين في بيتي، لا بيدفعوا إيجار، ولا بيشاركوا في فواتير، ولا حتى بيشيلوا مسؤولية نفسهم، ودلوقتي عايزين يخرجوني من أوضتي اللي عشت فيها مع أبوهم الله يرحمه أكتر من تلاتين سنة؟!
دخلتش معاهم في جدال، ولا رفعت صوتي، ولا حتى حاولت أقنعهم إن اللي بيعملوه غلط.
سكتّ، وفضلت باصة لهم لحد ما نورهان خلصت قهوتها، ومصطفى أخد مفاتيحه، ونزلوا يقضوا مشاويرهم.
أول ما باب الشقة اتقفل وراهم، بصيت على الساعة اللي معلقة في الصالة.
كانت تسعة وربع الصبح.
عايزين الأوضة تفضى قبل حداشر؟
ماشي يا نورهان، هفضّي لكم أوضة فعلًا، بس مش الأوضة اللي في دماغك!
وقبل ما أحكيلكم أنا عملت إيه، خلوني أعرفكم بنفسي.
اسمي ماجدة، عندي أربعة وستين سنة، وأعيش في شقة كبيرة في مصر الجديدة، في عمارة قديمة وواسعة، في الدور التالت. الشقة أربع أوض وصالة، اشتريتها أنا وجوزي كامل من أكتر من تلاتين سنة، وكانت كل حتة فيها شاهدة على تعبنا وشقانا وأيامنا الحلوة والمرة.
إحنا اللي اخترنا كل حاجة فيها بإيدينا، من لون الحيطان لحد آخر قطعة عفش. كنا ننزل دمياط ونلف بالساعات عشان نختار العفش اللي يعجبنا، ونرجع نفضل نتناقش نحط كل قطعة فين. وحتى زرع البلكونة كنا بنهتم بيه سوا، كل ربيع نجيب شتلات جديدة ونزرعها ونستنى لما تكبر وتملأ المكان ريحة حلوة.
الشقة دي ما كانتش مجرد أربع أوض وصالة بالنسبالي، دي كانت عمري كله.
كامل مات من ست سنين، ومن يومها وأنا شايلة مسؤولية البيت لوحدي. أتابع السباكة والكهربا، وأدفع فواتير المية والغاز، ومصاريف البواب وصيانة الأسانسير، وكل حاجة تخص الشقة.
عمري ما اشتكيت، ولا حسيت إن ده حمل تقيل عليا، بالعكس، كنت بحب أهتم بكل ركن فيها، لأن كل حاجة كانت بتفكرني بكامل، وبتحسسني إنه لسه موجود معايا.
وأكتر مكان كنت بحبه في الشقة كلها كان أوضة نومنا.
السرير الخشب الزان اللي اخترناه سوا، والمفرش الكروشيه الكحلي اللي كنت محافظة عليه من سنين، والتسريحة القديمة، والكومودينو اللي عليه شوية كتب كنت بحب أقراها قبل النوم.
وكان فيه كرسي هزاز من الخيزران، حاطينه جنب شباك البلكونة.
الكُرسي ده بالذات كان له مكانة خاصة عندي، لأن كامل كان بيحبه أوي. كل يوم جمعة بعد الصلاة، كان يقعد عليه، ويحط نضارته على عينه، ويفتح جورنال الأهرام، وكل شوية يناديني:
«تعالي يا ماجدة، شوفي الخبر ده!»
وأروح أقف جنبه وأقعد أسمع تعليقاته، وأحيانًا كنا نختلف على خبر ونفضل نناقش بعض لحد ما ننسى إحنا كنا بنتكلم في إيه.
