والكرسي ده ما اتحركش من مكانه. كنت بحس إن وجوده فيه بيخليني قريبة من ذكرياته.
لكن نورهان ما كانش عندها أي تقدير لكل ده.
من أول يوم دخلت فيه الشقة وهي بتبص على العفش بنظرات مش عاجبها حاجة، لحد ما وقفت قدام الكرسي الهزاز وقالت بمنتهى الاستهانة:
«هو الكرسي القديم ده لسه موجود ليه يا طنط؟! نطلعه البلكونة الكبيرة أو نوديه السطوح، عشان أنا عايزة أحط مكانه دريسنج روم ودولاب جزم.»
بصيت لها باستغراب وقلت:
«ليه يا نورهان؟ ده كرسي كامل الله يرحمه، وكان بيحبه أوي.»
هزت كتفها وقالت:
«يا طنط، ما هو في الآخر كرسي قديم! وبعدين الأوض كلها زي بعضها، شوية حيطان وعفش، مش فاهمة إيه اللي يخليكي متمسكة بيها كده.»
حسيت إن كلامها وجعني، فرديت عليها بهدوء:
«لأ يا بنتي، مش كل الأوض زي بعضها، في حاجات بنعيش فيها عمر كامل، وبتبقى ليها ذكريات مش ممكن تتعوض.»
كان مصطفى واقف جنبها، وباين عليه إنه مش عايز يدخل في الكلام، لكنه في الآخر اتكلم وقال:
«يا ماما، نورهان شغلها كله بقى أونلاين من البيت، ومحتاجة مساحة أكبر وحمام خاص عشان تعرف تشتغل براحتها.»
بصيت له وقلت:
«يا حبيبي، ما إنتوا عندكم الأوضة التانية واسعة ومريحة، وأنا كمان عرضت عليكم تاخدوا أوضة تالتة وتعملوها مكتب مخصوص للشغل. إيه المشكلة؟»
نورهان لوت بوزها وقالت:
«أوضة المكتب دي بعيدة عن المطبخ، يعني لو عايزة أعمل نسكافيه هفضل رايحة جاية، وبعدين أوضة الضيوف دولابها صغير ومش واخد لبسي.»
فضلت باصة لها وأنا مش عارفة أضحك من الاستفزاز ولا أعيط من القهر.
أوضة المكتب بعيدة عن المطبخ؟! الشقة كلها على بعضها مفيهاش المسافة اللي تخلي الواحد يتعب وهو رايح من أوضة للتانية!
والدولاب صغير ومش واخد لبسها؟! أمال هي فاكرة إنها جاية تقعد في فندق ولا إيه؟
المشكلة ما كانتش في المساحة ولا في الدولاب، المشكلة إن البنت دي من أول ما دخلت البيت وهي بتتعامل كأن كل حاجة لازم تتعمل على مزاجها، وكأن وجودي أنا في الشقة مجرد تفصيلة ممكن تتشال من حساباتها وقت ما تحب.
بصيت لمصطفى وسألته:
«مصطفى، إنت موافق على الكلام ده؟»
اتلجلج شوية، وبعدين قال وهو بيبص بعيد عن عيني:
ما هو أنا ونورهان اتكلمنا إمبارح بالليل في الموضوع.»
سألته باستغراب:
«يعني إنتوا اتفقتوا من غير ما تاخدوا رأيي؟»
رد بتوتر:
«كنا عارفين إنك هتزعلي، وإن الموضوع هيعمل حوارات، فقولنا نتفاهم معاكي بعدين.»
ضحكت ضحكة صغيرة من كتر ما أنا موجوعة، وقلت:
«يعني إنتوا اتفقتوا في ضهري، وقررتوا تنقلوني من أوضتي، عشان كنتوا عارفين إني هرفض؟»
ما ردش، وفضل باصص في الأرض، بينما نورهان كانت مشغولة بموبايلها، وفجأة رفعت راسها وقالت بنبرة ناشفة:
«على فكرة، الناس بتوع نقل العفش هيوصلوا قبل حداشر، وإحنا مش فاضيين نقضي اليوم كله في مناهدة.»
برقت لها وقلت:
«نقل عفش؟! عفش إيه؟!»
مصطفى حك راسه وقال:
«جبنا باقي عفش أوضة نومنا اللي كنا سايبينه عند حماتي في مدينة نصر، وهننقله النهاردة.»
اتسمرت مكاني.
يعني إيه جابوا العفش؟! وإمتى اتفقوا على ده؟!
من تلات أيام بس، لما دخلوا بيتي، كانوا معاهم شنطتين هدوم وشوية كراتين، وقالوا لي إنهم هيقعدوا معايا كام شهر، لحد ما يدبروا قرشين مقدم شقة تمليك، وإن صاحب الشقة اللي كانوا مأجرينها غلّى الإيجار ورفض يجدد لهم العقد.
وأنا اللي قلبي رقّ ليهم، وقلت بدل ما يتبهدلوا في الإيجارات والنقل، ييجوا يعيشوا معايا لحد ما ربنا يفرجها عليهم.
دلوقتي اكتشفت إنهم مش بس قرروا ينقلوا عفشهم، لأ، دول كمان متفقين مع عربية نقل، ومحدش فيهم فكر حتى يستأذنني!
سألت وأنا بحاول أسيطر على صوتي:
«طب وعفش أوضتي هتعملوا فيه إيه؟»
نورهان ردت بكل بساطة:
«نبقى نشوف له تصريفة يا طنط، المهم دلوقتي نفضّي الأوضة.»
بصيت لها، وبعدها بصيت لمصطفى:
«وكرسي أبوك يا مصطفى؟ هتعملوا فيه إيه؟»
ردت نورهان بدل منه:
«يا طنط ما إحنا قولنا نطلعه السطوح أو نحطه في البلكونة، هو يعني الكرسي ده أغلى من الدنيا؟»
كنت مستنية مصطفى يتكلم، يعترض، حتى يقول لها إن ده كرسي أبوه، وإن أمه مش من حق حد يطلب منها تسيب أوضتها.
لكن ابني اللي كنت مستنية منه كلمة واحدة تطيب خاطري، نفخ بضيق وقال:
«ماما، بالله عليكي بلاش تصعبي الأمور، خلينا نخلص من الحوار ده!»
الكلمة دي كانت أصعب عليا من كل اللي قالته نورهان.
أربعة وستين سنة عشتها، وأربعة وتلاتين سنة من عمري وأنا أم، تعبت وشقيت وربيت وسندت ابني، وكنت دايمًا أحاول أسهّل عليه حياته حتى لو على حساب راحتي، وفي الآخر بقيت أنا اللي بعطّل حياته، لمجرد إني مش عايزة أتنازل عن أوضتي وذكرياتي!
