ـ وأنا كمان مش عايزة مشاكل، وعشان كده كل واحد يشيل مسؤولية قراراته.
بالليل، كنت قاعدة في الصالة، لقيت ابن مرات أخوه الصغير كبّ العصير على الأرض، وهي بصتلي وقالت:
ـ معلش يا حبيبتي، هاتي الممسحة امسحي المكان عشان الولد مايتزحلقش.
بصيت للأرض، وبعدها بصيتلها وقلت:
ـ الممسحة في المطبخ، وإنتِ أقرب واحدة ليها.
اتغير وشها وقالت:
ـ هو إنتِ بتكلميني كده ليه؟!
ـ بكلمك عادي، بس أنا مش مسؤولة عن تنظيف ورا أطفالك.
قامت جابت الممسحة بنفسها، وفضلت طول الليل متضايقة، لحد ما عمرو دخل الأوضة وقفل الباب وبدأ يكلمني بعصبية:
ـ إنتِ فضحتيني قدام أخويا ومراته! إيه الأسلوب ده؟ دي ضيفة عندنا!
بصيتله وقلت:
ـ ضيفة؟ الضيفة بتقعد يومين وتمشي، إنما دي جاية بشنطها ومخداتها وبتتكلم عن أوضتي كأنها ملكها، وإنت مش شايف إن ليّا حق أرفض؟
رد بانفعال:
ـ إنتِ عايزاني أطلع أخويا ومراته وعياله من بيتي؟
قلتله وأنا ببص في عينيه:
ـ لأ يا عمرو، أنا عايزاك تفهم إنك لما قررت تفتح بيتك لناس تانية، ماكانش من حقك تقرر بالنيابة عني إني أبقى خدامة ليهم!
وسكت شوية، قبل ما أضيف:
ـ وبالمناسبة يا عمرو، من بكرة أنا هروح عند أهلي كام يوم، ولما ترجع تبقى فاضي من مسؤوليات أخوك ومراته، ابقى فكر إن ليك مرات لسه عروسة، كانت مستنياك تعيش معاها حياتها مش تعيشها وسط عيلة كام
