جوزى جابلى سلفتى البيت وقالى اخويا ما,ت وهى عدتها خلصت وانا هتجوزها عشان اخد بالى من ولادها وولاد أخويا لو مش عاجبك الوضع تقدرى تروحى عند اهلك كده كده فى اللى هتخلى بالها منى وتعملى طلباتى اختارى يا تقعدى فى البيت وترضى بالأمر الواقع يا تاخدى بعضك وتروحى لأهلك وعلى فكره لو روحتى لأهلك انا مابطلقش هتفضلى متعلقه كده لا متجوزه ولا متكلقه ومش ملزم اصرف عليكى عند اهلك إنما لة رضيتى وفضلتى قاعده هنا وقتها هيفضل الوضع زى ماهو ونعيش كلنا مبسوطينخدى وقتك وفكرى وانا هدخل يسرا الاوضه عشان تحط حاجتها قال كلامه وشال شنطها وسابنى فى الصاله ومشى فضلت واقفه مكانى بحاول استوعب كلامه ، والدموع بتنزل من عيني من غير ما أحس.
كنت حاسة إن الأرض بتتسحب من تحت رجلي، وإن كل السنين اللي عشتها مع حسن اتمسحت في لحظة. قمت وفتحت الدولاب وبدأت أطلع هدومي وأحطها في الشنطة. أنا مش هقبل أعيش في بيت فيه واحدة تانية بتشاركني جوزي، حتى لو كانت أرملة أخوه، وحتى لو عندها منه عيال.
أنا مش ضد إنه يساعد ولاد أخوه، ولا ضد إنه يقف جنب يسرا بعد م,وت جوزها، لكن إنه يتجوزها ويحطها في بيتي ويطلب مني أخدمهم كمان؟ لأ، دي حاجة أنا مش هقبلها. كنت قربت أخلص شنطتي لما سمعت صوته من بره:- يا سعاد! إنتِ فين؟
مش بتردي ليه؟ما رديتش، وفضلت مكملة اللي بعمله، لحد ما فتح الباب ودخل، وأول ما شاف الشنطة وقف مكانه.- إيه الشنطة دي؟- زي ما إنت شايف، أنا همشي. بصلي ببرود وقال:- براحتك، أنا قلتلك من الأول إن ده اختيارك.
استغربت رد فعله، وكنت مستنية حتى يحاول يمنعني أو يسألني هروح فين، لكنه رجع يكمل كلامه بمنتهى الهدوء:- بس خلي بالك، أنا مش هطلق، ومش هبعتلك مصاريف وإنتِ قاعدة عند أهلك، عشان تبقي عارفة إنتِ رايحة على إيه.
بصيت له بوجع وقلت:- متقلقش، أنا مش هطلب منك حاجةخرج من الأوضة وسابني، وبعدها سمعت صوت يسرا وهي بتسأله:- هي سعاد هتمشي بجد؟- سيبيها براحتها، يومين وهتهدى وترجع، هي بس عايزة تعمل عليا ضغط. وقفت مكاني وأنا ماسكة هدومي، قعدت على السرير وبصيت للشنطة، وبعد تفكير طويل قررت أرجع هدومي مكانها.
وقلت لنفسي: استني يا سعاد، إنتِ مستعجلة على إيه؟ قبل ما تاخدي قرار وتروحي لأهلك وتدخلي نفسك في مشاكل، خلينا نشوف الأول حسن هيعمل إيه مع مرات أخوه اللي بقت مراته! خليني أتفرج وأتسلى شوية، وأشوف الراجل اللي جابها البيت عشان يرعاها ويرعى عيال أخوه، هيقدر فعلًا يتحمل مسؤوليتها ولا كل اللي كان شاغل باله إنه يضمن وجود واحدة تانية في حياته؟
وبعدين ابتسمت بسخرية وقلت لنفسي:ـ ماشي يا حسن، إنت عايزنا نعيش كلنا مبسوطين؟ طب وريني بقى هتقدر تعملها إزاي!خرجت من الأوضة وأنا مقررة أتعامل بطبيعية، لا هتخانق مع يسرا ولا هعمل نفسي صاحبتها، وفي نفس الوقت مش هتنازل عن حقي في بيتي.
لقيت حسن قاعد معاها في الصالة، وقدامه فنجان القهوة، وأول ما شافني قال:- أهو كده العقل، كنت عارف إنك هتفهمي في الآخر.- طبعًا يا حسن، ما أنا مراتك وعارفة مصلحتك كويس. بصلي باستغراب بسيط، لكنه ابتسم ورجع يكمل كلامه مع يسرا، وأنا دخلت المطبخ وبدأت أجهز العشا.
بس المرة دي مكنتش بعمل ده عشان أرضيه، أنا كنت مستنية أشوف أول يوم من أيام حياتنا الجديدة هيعدي إزاي، من تاني يوم الصبح، بدأت أشوف حسن على حقيقته، أو بالأصح بدأت أشوف هو ناوي يعمل إيه عشان يرضي يسرا.
كنت قاعدة في الصالة لما خرج من أوضته ومعاه ظرف فلوس، نادى على يسرا وادهولها وقال:- اتفضلي يا يسرا، ده مصروف البيت، شوفي إنتِ محتاجة إيه، ولو عايزة حاجة لنفسك متتردديش تطلبيها. يسرا بصت للفلوس بتردد مصطنع وقالت:- كل ده يا حسن؟
طب وسعاد؟ مش هي اللي كانت ماسكة مصروف البيت؟رد عليها وهو بيبصلي:- عشان ما تحسيش إنك غريبة، إنتِ بقيتي ومراتي، ومن حقك تمسكي مصروف البيت، وسعاد مسكته كتير، خليني أشوف طريقتك إنتِ كمان. يسرا ابتسمت ابتسامة صغيرة وهي بتبصلي وقالت:- ربنا يخليك ليا، أنا بس مكنتش عايزة أضايق سعاد أو أحسسها إني أخدت مكانها.
ابتسمت بسخرية وقلت:- لا يا حبيبتي، خدي راحتك، محدش واخد مكان حد. حسن بصلي بضيق وقال:- إيه يا سعاد؟ هو لازم كل كلمة يبقى وراها تعليق؟ما رديتش عليه، وقمت دخلت المطبخ أكمل شغلي. بعد شوية ناديت على يسرا وقلت لها:- الفطار جاهز، تعالي ساعديني نحط الأكل على السفرة.
– معلش يا سعاد، أنا لسه مش متعودة على شغل البيت هنا، وبعدين أنا تعبانة شوية، حطي إنتِ الأكل وأنا هخرج اكل :- سيبيها يا سعاد، هي لسه جاية ومحتاجة ترتاح، اعملي إنتِ اللي كنتِ بتعمليه قبل وجودها. بصيت له وقلت:- يعني إيه؟
هي هتقعد هانم وأنا هعمل كل حاجة؟ – يا سعاد بلاش نبدأ مشاكل، دي لسه خارجة من ظروف صعبة.- وولادها يا حسن؟ البيت بقى مكركب من الصبح، على الأقل تخليها تروق وراهم. رد بعصبية:- معلش تعالي على نفسك، دول عيال صغيرة، وبعدين أخويا الله يرحمه مكنش مخليها محتاجة حاجة، عايزاني أبقى أقل منه في نظرها؟
وقبل ما أرد، ظهرت يسرا عند باب المطبخ وقالت بدلع:- خلاص يا حسن، متزعلش سعاد عشاني، أنا ممكن أعمل أي حاجة، بس أصل إنت عارف إني مكنتش متعودة أتعب نفسي في البيت، أخوك الله يرحمه كان موفرلي كل حاجة.
قالت جملتها وهي بتبصلي، وبعدها ابتسمت وأضافت:- بس الحمد لله، ربنا عوضني بيك، وإنت كمان مش مقصر معايا. حسن ابتسم بفخر وقال:ـ إنتِ بس اطلبي، وأنا أعملك اللي إنتِ عايزاه ومش عايزك تمدى ايدك فى حاجة أما أنا فكنت واقفة ببصلها، وفهمت إنها مش ست مكسورة ولا داخلة البيت مكسوفة من وجودي، دي عارفة كويس هي بتعمل إيه.
ومع الأيام بدأت تتعمد تستفزني أكتر. تصحى متأخر، وتسيب ولادها يبعثروا لعبهم في الصالة، ولما أطلب منها تلم حاجتهم ترد بمنتهى البرود:- معلش يا سعاد، أصل أنا مش متعودة على النظام ده، وبعدين حسن موجود، أكيد مش هيحب يشوفني تعبانة.
وكان حسن بالفعل طول الوقت في صفها. مرة رجع من الشغل ومعاه شنط كتير، فيها لبس جديد ليها ودهب وموبايل، ولما شافني واقفة في المطبخ قال:- سعاد، حطي الأكل بسرعة، يسرا نفسها مفتوحة النهارده وعايزين نتعشى سوا.
خرجت يسرا من الأوضة، وشافت الشنط، فشهقت بفرحة مصطنعة:- إيه كل ده يا حسن؟ هو أنا طلبت منك حاجة؟- لأ، بس عايز أفرحك، ومش عايزك تحسي إنك خسرتي حاجة بعد موت أخويا. مسكت واحدة من الشنط وطلعت منها فستان، ولفت ناحيتي وقالت:- إيه رأيك يا سعاد؟
حلو؟ حسن هو اللي اختارهولي، ذوقه جميل أوي، مش كده؟بصيت للفستان وقلت:- مبروك. وبعدها قالت بخبث عشان تعرفنى إنه مش فاكر غيرها ـ كده يا حسن تنسى تجيب لسعاد ممكن تبصلى فى حاجتى حسن ضحك وقال:ـ سعاد مش ناقصها حاجة، دي عايشة معايا من سنين وعارفة إني مش ببخل عليها.
