بصيت له وابتسمت، لكن جوايا كنت بقول: يا سلام! ده إنت بقيت كريم أوي، بس الغريب إن كرمك كله ظهر بعد ما دخلت يسرا البيت!فضلت ساكته عشان اشوف اخرهم وايه وفى نفس الوقت كنت مكنتش متخيلة إن يسرا هتكون بالخبث ده، لكن كل يوم كان بيعدي كانت بتثبتلي إنها مش داخلة البيت عشان تعيش في أمان بعد موت جوزها، دي داخلة وهي عارفة كويس إنها عايزة إيه، والأهم إنها عايزة تثبتلي إنها بقت صاحبة الكلمة في البيت.
في يوم كنت واقفة في المطبخ بجهز الغدا، دخلت عليا يسرا وهي لابسة روب البيت، وبصت للأكل وقالت:* هو إنتِ بتعملي إيه؟* زي ما إنتِ شايفة، بجهز الغدا.* طب كويس، اعملي حسابك إن حسن مش بيحب الأكل اللي فيه ملح كتير، ومن النهارده عايزة الأكل يبقى خفيف، أصل معدته تعباه شوية.
بصيتلها وقلت:* حسن طول عمره بياكل من أكلي ومشتكاش. ضحكت وقالت:* معلش يا سعاد، الناس بتتغير، وبعدين أنا عارفة هو بيحب إيه وبيكره إيه. سكت، وفضلت أكمل شغلي، لكنها قربت مني وفتحت التلاجة وطلعت علبة جبنة غالية كانت لسه شاريها حسن ليها.
* على فكرة، حسن قالي أعمل لنفسي فطار مخصوص، فممكن تعمليلي سندوتشات وأنا خارجة معاه؟* خارجة معاه فين؟* عندنا مشوار، وبعدها هيعزمني على الغدا بره، إنتِ عارفة بقى حسن بيحب يخرجني ويغيرلي جوي. قالت آخر جملة وهي بتضحك، وبعدها خرجت وسابتني واقفة مكاني.
وبعدها بكام يوم بدأت لعبة جديدة. كنت قاعدة في الصالة بتفرج على التلفزيون، دخلت يسرا ومعاها ولادها، وأول ما شافتني قالت:- يا سعاد، هو إنتِ ليه مش بتسألي على الولاد؟ دول بقوا عيالك برضه. بصيتلها وقلت:* دول ولاد عم جوزي، وعلى عيني وراسي، بس أمهم موجودة والحمد لله.
اتغيرت ملامحها وقالت:* يعني إيه؟ هو إنتِ شايفة إني مش عارفة أربي ولادي؟* أنا مقولتش كده.* لا، كلامك معناه كده، بس عمومًا أنا مش هقف عند كل كلمة، كفاية إن حسن شايفني ومقدرني. وفي اللحظة دي دخل حسن، فجرَت عليه وقالت بصوت كله حزن:- أنا مش عارفة يا حسن، كل ما أحاول أقرب من سعاد وأعتبرها أختي، ألاقيها بتفهم كلامي غلط.
حسن بصلي وقال:- إيه يا سعاد؟ هو إنتِ مش قادرة تتقبلي إن يسرا بقت مرات أخويا ومراتي؟ابتسمت وقلت:- لأ يا حسن، أنا بس مش بحب حد يحطني في دور مش دوري. سكت لحظة، وبعدها قال:- خلاص، كل واحد يراعي التاني، ومش عايز أسمع مشاكل تاني.
خرج من الصالة، ويسرا فضلت واقفة قدامي مبتسمة، وبعد ما اتأكدت إنه مش شايفها قالت بصوت واطي:- إنتِ لسه فاكرة إن ليكي كلمة هنا؟بصيتلها وابتسمت:- وإنتِ لسه فاكرة إن كلمتك هي اللي هتمشي؟ابتسامتها اختفت للحظة، لكنها رجعت تضحك وقالت: هنشوف يا سعاد.
وفعلًا، بدأت تستغل أي فرصة عشان توقع بيني وبين حسن. مرة كنت تعبانة وعندي صداع شديد، فدخلت أوضتي وتمدّدت شوية. بعد نص ساعة سمعت صوت حسن بينده عليا:\- يا سعاد! يا سعاد!خرجت لقيته واقف متعصب، ويسرا قاعدة على الكنبة وعينيها مليانة دموع. * خير يا حسن؟
* إنتِ سيبتي الولاد لوحدهم ليه؟* هما مع أمهم يا حسن، وأنا كنت تعبانة ودخلت أرتاح شوية. يسرا تدخلت بسرعة: * خلاص يا حسن، متكبرش الموضوع، أنا اللي غلطانة إني طلبت منها تساعدني، واضح إنها مش طايقانا. بصيتلها وقلت: * إنتِ طلبتي مني إيه أصلًا؟
ردت وهي بتبص للأرض: * خلاص يا سعاد، مش لازم نفتح كلام. حسن اتعصب وقال: \- إنتِ هتفضلي تحاسبيها على كل كلمة؟ دي ست أخويا، وأنا مش هقبل إنها تحس إنها غريبة في بيتي. ضحكت من جوايا، لأن البيت بقى بيتها، وأنا اللي بقيت ضيفة فيه.
لكن أكتر موقف استفزني كان يوم الجمعة، لما حسن رجع من السوق ومعاه طلبات كتير، وحطها قدام يسرا وقال: \- شوفي يا ستي، جبتلك كل اللي طلبتيه. فتحت الأكياس وبدأت تطلع منها الحاجات، وبعدها رفعت صوتها وقالت: \- يا حسن، إنت نسيت تجيب الشوكولاتة اللي بحبها!رد عليها: \- معلش، أنزل أجيبهالك دلوقتي.
قالت وهي بتضحك: \- لا خلاص، كفاية إنك تعبت نفسك عشاني. وبعدين لفت ناحيتي وقالت: \- على فكرة يا سعاد، أنا نفسي في محشي النهارده، بس يكون معمول زي ما حسن بيحبه، وإنتِ أكيد عارفة طريقته. بصيتلها وقلت: \- اعمليه إنتِ، ما إنتِ اللي نفسك فيه.
اتغير وشها، وحسن رفع عينه من الموبايل وقال: \- إيه يا سعاد؟ هو طلب صغير صعب عليكي؟* لأ يا حسن، بس أنا مش خدامة عند حد. قام من مكانه وقال بعصبية: * محدش قال إنك خدامة، بس إنتِ طول عمرك بتعملي الأكل، إيه اللي اتغير؟
قبل ما أرد، يسرا قالت: \- خلاص يا حسن، متضغطش عليها، أنا هعمله بنفسي حتى لو طلع مش حلو. وبالفعل دخلت المطبخ، وبعد شوية سمعتها بتنادي: \- يا سعاد، ممكن تيجي تساعديني؟دخلت لقيتها واقفة جنب الحلة، وأول ما قربت قالت: * إنتِ حطيتي الملح هنا؟
* لأ.* غريبة، أصل الأكل طعمه مش مظبوط خالص. وقبل ما أتكلم، خدت الطبق وخرجت لحسن وقالت: \- معلش يا حسن، أنا حاولت أعملك المحشي اللي بتحبه، بس شكلي مش بعرف أعمل حاجة زي سعاد. حسن ضحك وقال: \- ولا يهمك، إنتِ مش مطالبة تعملي حاجة، سعاد تعمل كل حاجة في البيت.
كانت بتبصلي وهي مبتسمة، وكأنها كسبت جولة جديدة. لكن اللي يسرا مكنتش فاهماه إن كل مرة كانت بتحاول تغيظني فيها، كانت بتكشفلي جانب جديد من شخصيتها، وبتخليني أشوف حسن كمان من غير أي رتوش. وفي ليلة، كنت داخلة أوضتي، سمعتها بتتكلم في التليفون، فوقفت لما سمعتها بتقول: \- أيوه يا حبيبتي، متقلقيش، أنا ماشية زي ما أنا عايزة، هو أصلًا بيعمل أي حاجة أطلبها منه.
.. وسعاد دي؟ دي مسألة وقت، يا إما هتزهق وتمشي يا إما هخليها هي اللي تغلط قدامه ويطردها بنفسه. وقفت مكاني وأنا مش مصدقة اللي سمعته، وفضلت مستنية لحد ما قفلت المكالمة، وبعدها دخلت أوضتي من غير ما أحسسها إني سمعتها.
ابتسمت وأنا بقول لنفسي: ـ آه يا يسرا، يعني دي خطتك؟ طب كويس أوي، بس واضح إنك نسيتي إن البيت ده مش جديد عليا، وإنك مهما حاولتي تلعبي من ورا ضهري، أنا كمان بعرف ألعب.
ومن اللحظة دي قررت إني مبقاش مجرد واحدة بتتفرج على اللي بيحصل، لأن يسرا بدأت حرب، وأنا قررت أسيبها تكمل لحد ما تقع في الغلطة اللي مش هتعرف تصلحها. وفى نفس الوقت سبتهم نايمين عشان افوقهم على اكبر كابوس
