أحمد بصلها ببرود، وبرق عينيه: اه هعمل كده، ووريني هتعملي إيه! هتنزلي المحاكم؟ هتدفعي منين يا ندى؟ هتروحي لأهلك في البلد يشحتوا عليكي عشان توكلي محامي؟ أنا معايا ملايين وضهري حديد، رنا وراها عيلة تبتلعك إنتِ وأهلك في لقمة واحدة! امضي بالذوق، خدي قرشين تروحي بيهم لأختك، وسيبيلي الواد والشقة، بدل ما تطلعي من هنا بجلابية البيت ومتحلميش حتى تشوفي وشه تاني!
مش هتمضي يا أحمد.
الصوت مكنش صوتي، كان صوت الحاجة فاطمة. كانت واقفة عند السفرة، وماسكة موبايلها القديم في إيدها. بصت لأحمد ببرود تابت يخوف، وقالتله: افتح تليفونك.
أحمد بصلها باستغراب واستهزاء: افتح تليفوني ليه؟ هتبعتيلي دعاء الفجر يعني؟
افتح تليفونك وشوف اللي وصلك من رقمي حالا!
أحمد طلع تليفونه بزهق، فتح القفل، وفجأة ملامحه كلها اتجمدت. الشاشة كانت منورة بفيديو… صوت تسجيل واضح جداً، وكاميرا مراقبة جايبة كافيه على النيل. الصوت كان صوت رنا، وهي بتكلم راجل تاني غير أحمد: الواد أحمد ده أهبل وعامل زي الخاتم في صباعي، أول ما يمضي أمه والهانم مراته على التنازل، هناخده ونبيعه لشركة المقاولات بتاعة بابا بالثمن اللي اتفقنا عليه، والقرض بتاعه يفضل متسجل باسمه، يتحاسب بقى يغور في ستين اهية مش مشكلتي، المهم العقود تتسجل باسمي أنا الأول…
التسجيل مكنش بس فيديو.. كان معاه صور لتحويلات بنكية، ورسايل بين رنا دي وواحد تاني متسجل اسمه شريف السمسار.
التليفون وقع من إيد أحمد على السجادة بصوت مكتوم. وشه بقى أبيض زي الجبس، عينيه كانت بتلف في الصالة كأنه مش مستوعب اللي سمعه، ريقه نشف ومبقاش عارف ينطق كلمة واحدة. شفايفه كانت بتتحرك بصدمة: د.. ده.. ده إيه ده؟! ده فيك.. ده متفبرك! رنا بتحبني! رنا حامل في ابني!
ضحكت أنا المرة دي، ضحكة مليانة وجع وسخرية وقهر: حامل في ابنك؟! السونار اللي رمتولي قدام الحضانة كان عليه اسم مستشفى خاصة في المهندسين، لما دخلت دورت الصبح قبل ما حماتي تجيلي، لقيت السونار ده نازل من صفحة دكتورة نساء على الفيس بوك معمول إعلان لبحث طبي ومتاخد سكرين شوت ومعدل بالفوتوشوب! حتى الكدبة بتاعتكم رخيصة وغبية زيكوا!
أحمد نزل على ركبه على الأرض ومسك التليفون، قعد يعيد في الفيديو ويسمع صوت رنا وهي بتبيعه وبتتريق على غبائه وعلى إزاي قدرت تضحك عليه وتخليه يهد بيته ويبيع أمه وابنه عشان ورقة ضغط يخلص بيها نفسه.
لا.. لا.. رنا مستحيل تعمل كده.. رنا وعدتني.. قالتلي إنها مخلصة كل ورق البنك.. قالتلي إن أبوها هيكتبلي نسبة في المشروع الجديد…
حماتي قربت منه، ونزلت لمستواه، ومسكت دقنه بقوة رفعت وشه لفوق عشان يبص في عينيها: رنا دي ثعبان، رمتك في النار وإنت جريت وراها زي الأعمى عشان طمعك وخيبتك! عارفة مين اللي جابلي الفلاشة دي؟ ومين اللي صور التسجيل ده في الكافيه؟
أحمد فضل باصص لها بعيون تايهة، كأنه عيل صغير ضاع في المولد: مين؟ مين يا أمي؟
جوز خالتها! حماتي قالتها بصوت قاطع: المستشار اللي أبوه كان صاحب أبوك الله يرحمه! الراجل لما عرف المصيبة اللي إنت داخل فيها ولقى اسمك محطوط في بلاغات نصب، كلمني، ونزل بنفسه وراها وراقب حركاتها مع الشلة النصابة اللي شغالة معاهم! الست دي شبكة بتصطاد المغفلين اللي زيك، اللي عليهم ديون وغرقانين في الفساد، عشان يلهفوا أملاك عائلاتهم باسم القانون والتوكيلات!
أحمد سند ضهره على حرف الكنبة وخبى وشه بين إيديه وبدأ يعيط بهستيريا. عياط راجل اكتشف إنه خسر كل حاجة في لحظة: خسر شرفه، وخسر أمه، وخسر ابنه، وخسر حتى الوهم اللي كان بيجري وراه.
أعمل إيه.. أعمل إيه يا أمي؟ كان بيبكي بصوت واطي وذليل: البنك باعتلي إنذار نهائي، لو مجبتش خمسة مليون جنيه يوم الأحد الصبح، أمر الضبط والإحضار هيتنفذ.. هدخل المساءلة يا أمي! هدخل المساءلة وهتتدمر حياتي!
كنت واقفة ببص عليه، ومحستش بذرة شفقة واحدة ناحيته. الراجل اللي من خمس دقايق كان بيخطط إنه يحرمني من ابني وياخده مني ويرميني في الشارع، دلوقتي قاعد عند رجلينا بيشحت النجاة!
ياسين كان صوته في الأوضة هدي شوية وبدأ ينده: ماما.. ماما.. مشيت خطوتين ناحية الأوضة، بس وقفت لما سمعت صوت خبط خفيف على باب الشقة برة.
خبط مش طبيعي.. خبط رتيب، مرتين ويسكت، وبعدين تلات مرات.
كلنا اتجمدنا في أماكننا. أحمد رفع راسه بخوف، وبص للباب: مين ده؟! الساعة اتنين بالليل!
حماتي شاورتلي أسكت، وغمزتلي بعينها عشان أدخل أوضة ياسين. دخلت بسرعة، قفلت الباب وسيبت حتة صغيرة مواربة عشان أسمع وأشوف. ضمت ياسين لحضني بقوة، كان وشه سخن من كتر العياط، طبطبت عليه وحطيت صباعي على شفايفي عشان يسكت، وعيني كانت معلقة على الصالة برة.
أحمد قام على حيله وهو بيترعش، مشي ناحية الباب وبص من العين السحرية. شهق ورجع خطوة لورا: دي رنا! رنا واقفة برة ومعاها اتنين رجالة كبار في السن.. شكلهم يخوف!
حماتي وقفت في نص الصالة، وشها اتحول لحجر، ملامحها اتشدت بطريقة متوقعتهاش أبداً من ست عادية. قالت له بصوت واطي وحاسم: متفتحش الباب يا أحمد.
لكن أحمد كان خلاص عقله طار، الفزع عماه تماماً. افتكر إنها جاية تنقذه، أو خاف إنها تعمل مشكلة في العمارة وتلم عليه الجيران والبوليس. مد إيده للمفتاح، ولفه وفتح الباب على آخره.
دخلت رنا. لابسة نفس الطقم الأوف وايت، بس المرة دي مكنش على وشها الابتسامة الباردة؛ كان وشها شاحب، وعينيها بتطق شرار، ووراها راجلين ضخام لابسين بدل سودا ونظراتهم باردة زي الموت.
اتأخرت ليه يا أحمد؟ رنا قالتها وهي بتبص في الصالة بقرف، ودخلت من غير استئذان كأنها صاحبة المكان: بقالي ساعة مستنياك تحت في العربية، قولتلك الورق ده يتمضي بالليل عشان السجل الصبح!
أحمد وقف قصادها وصوته بيترعش: ورق إيه يا رنا؟ الورق اللي هتاخدي بيه الشقة وتبيعيني لشركة أبوكي وتدبسيني في القرض لوحدي؟! أنا عرفت كل حاجة.. التسجيل معايا! الفيديو بتاع الكافيه معايا!
رنا وقفت مكانها، عينيها اتحركت ببطء من أحمد للحاجة فاطمة اللي كانت واقفة تبصلها بثبات، وبعدين بصت ناحية أوضة ياسين اللي أنا مستخبية ورا بابها. ضحكت ضحكة عالية، رنانة ووقحة، هزت الشقة وعرفت.. وايه يعني إنك عرفت يا حيلتها؟
شاورت للراجلين اللي وراها، واحد منهم طلع ورقة رسمية عليها ختم نسر أحمر وحطها قدام وش أحمد.
رنا كملت ببرود يرعب: ده أمر تمكين وتشميع للشقة دي بالكامل صادر من المحكمة النهاردة الضهر، بناءً على الشيكات اللي إنت ماضيها لأبويا بضمان السكن ده كأصل من أصولك! الفيديو اللي معاك بله واشرب مېته، القانون مبيعترفش بتسجيلات من غير إذن نيابة، لكن بيعترف بالورق اللي إنت ماضيه بإيدك وبصمتك يا مغفل!
أحمد اتسمر، وحماتي خطت خطوة لقدام وقالت: الشقة دي مش بتاعته يا شاطرة، الشقة دي وقف وملك لحفيدي، وأمر التمكين بتاعك ده غير صحيح زيك ومش هيمشي علينا!
