— أما انتي بقى، خطتي معاكي اتبدلت… لسه هستنى لما تعملي زي بنتي؟ خليها بالمرة، والأمر لله، هتصرف معاكي بشكل حاسم، هوديكي لاخوكي، متكيسة في أكياس.
سهر بقت تبكي جامد بخوف، وراضي بص لها وقال:
— أنا جنبك، مش هسيبك، متخافيش… وبص لثريا وقال بدموع: ثريا هانم، انت أكتر واحدة جربتي يعني ايه واحدة بريئة تتأذي في موضوع ملهاش أي دخل فيه… أرجوكي متعمليش كده في واحدة تانية، أرجوكي… هي ما لهاش ذنب.
ثريا نزلت دموعها وقالت بغضب:
— لو كان هو قال زيك كده “هي ما لهاش ذنب وما دخلها في اللعبة من الأول”، لو كان عرف قيمتها وعرف إن هي ملهاش دخل، كان زمان بنتي معايا، وأخته مش أغلى من بنتي عندي.
ودخلت الدوريه من الشرطة وأخذت نجيب ورجالة ثريا، والشاب بص لثريا وقال:
— ايه يا ثريا هانم؟ من زمان مدوخانا وراكي، معقولة اللي بندور عليه يطلع هو كمان بيدور علينا؟
ثريا بصت له بحقد شديد وقالت:
— مش هعدي لك اللي عملته في بنتي يا عزمي، مش هعديه أبداً.
عزمي اتنهد بحزن وقال:
— بنتك ما راحتش ضحية أنا بس، راحت ضحية أمها وشغلها القذر، لو كنتي مربياها بالحلال ما كنتيش وصلتي لهنا، ما كانش حد عرف ياذيكي فيها… خدوها.
الضباط أخدوها وهيه بتزعق وبتتوعد له.
عزمي جري على أخته وقال:
— سهر حبيبتي، أنا بدور عليكي من أسبوع يا سهر، كنت هتجنن عليكي.
سهر قالت بدموع:
— مكنتش بترد على تليفونك ليه؟
ابتسم بحزن وقال:
— معلش يا قلبي، والله مكانش معايا أصلاً، وكنت مشغول بموضوعك ما خدتش بالي. وبص لراضي اللي وقف جنبها وقال: ده راضي اللي قلت لي عنه في التليفون؟
راضي بص لها باستغراب وقال:
— انتي كلمتيه في التليفون؟
سهر ابتسمت بدموع وقالت:
— أمال جه ازاي؟ أنا كنت نازلة أقول لك إنه أخيراً رد.
راضي مد إيده سلم عليه وقال:
— الحمد لله إن أختك رجعت لك بالسلامة.
عزمي ابتسم ومسك سهر من إيدها وقال:
— الحمد لله إني كنت قريب من المكان… على العموم شكراً قوي، وفي أي وقت أي حاجة تطلبها رقمي معاك، وأكيد هيبقى لك مكافأة كبيرة مني.
راضي بص لها والدموع في عيونه وقال:
— أنا مش عايز أي حاجة، أنا خدت مكافآت كتير في الوقت ده… خلي بالك منها.
سهر ابتسمتلو بدموع وطلعت مع أخوها وهيه بتبص لراضي بدموع.
عزمي ابتسم أول ما طلع وبصلها وقال:
— هو في ايه بالظبط؟ ايه حكايتك مع الشاب ده؟ أنا وداخل لقيته جري قدامك، ولولا وصولي كان زمانه اتصاب بدالك… ده غير اللي حكيتيهولي في التليفون.
سهر نزلت عيونها بكسوف وقالت:
— راضي شخص محترم جداً ووقف جنبي و…
عزمي ابتسم وكتف إيديه وقال:
— و ايه كمان؟
سهر ابتسمت بكسوف، وعزمي رفع وشها ليه وقال:
— قبل سنة عدت، لو كان حصل الموقف ده كنت هرفض الشخص ده لأنه مش قد المقام، اديك شايفه المكان اللي قاعدين فيه… بس بعد اللي حصل معايا بقيت بتمنى إن أي قلبين يدقوا لبعض يتلاقوا… خليه يجيبك على البيت… وقولي له إنى هستناه يجي يشرب معايا القهوة.
سهر اتفاجأت وسعاده وهيه بتقول:
— بجد؟ شكراً شكراً يا أبيه.
عزمي فرح لفرحتها وقال:
— حبيبتي يا سهر، ربنا يسعدك… يلا حبيبتي، هستناكي في البيت ما تتأخريش ها.
وركب العربية بتاعته ومشي.
أما راضي بص لنوجا بوجع وقال:
— مش عايزة أعرفك تاني.
وطلع على أوضته بغضب.
نوجا لسه هتطلع وراه، دخلت سهر وطلعت جري وراه.
نوجا اتنهدت وشافت ما فيش فايدة ومشيت من المكان بهدوء.
بس حس بأيها قريبة منه وقالت:
— كده تسيبني أمشي من غير ما تقول ولا كلمة؟ حتى ما قلتليش خليكي.
راضي اتسعت عينيه بذهول والتفت لها، ابتسم لما لقاها قدامه وقال بذهول:
— انتي ازاي رجعتي؟
سهر قالت بابتسامة:
— ولا حاجة، قلت لأخويا إني بحب الولد اللي جوه ده ومش هقدر أمشي من غيره… قال لي ارجعي له، هو مش قد كده وانت أحلى منه بكتير، بس معلش.
راضي ضحك بسعادة وهو مش مصدق نفسه وقال:
— أنا… أنا مش مصدق إنك قدامي، كنت فكرت خلاص مش هقدر أشوفك تاني.
سهر قاطعته وقالت:
— أخويا هيستناك عشان تشرب معاه القهوة، إجباري مش اختياري على فكرة.
راضي ابتسم بسعادة أكبر وقال:
— هتوافقي تتجوزيني؟ أنا ما عنديش غير شقة صغيرة واللوكندا دي.
سهر ابتسمت بسعادة وقالت:
— ده كتير جداً، وانت أكثر، وكفاية قوي… بحبك يا راضي.
راضي ابتسم وهو هيطير من جواه وقال:
— أنا بجد حاسس إني بحلم.
ابتسمت وقالت:
— ومين قالك هسمحلك تنام علشان تحلم؟ انت ناسي إن اسمي سهر ولا ايه؟
راضي ضحك وقال:
— ويا ريت كل السهر حلو كده… أنا بعشقك… بعشقك أوي.
وباشكر ربنا ألف مرة إنه جمعنا… راضي أخيراً بقى راضي… راضي بالسهر.
كنتم مع راضي بالسهر بقلم… زهرة الربيع، زهرتكم تحيكم ودمتم.
في أمان الله مع من تحبون.
