عارفة.”
“يبقى تفهمي كويس إني مش محتاجة أقدم تبرير لحد عشان أعيش في ملكي بالطريقة اللي تريحني.”
لأول مرة من الصبح، نورهان تتلجم وماتلاقيش رد تقوله، ووشها يجيب ألوان ومكسورة العين.
مصطفى رجع بعد ما اتفق مع السواق إنه يرجع العفش للمخزن ويدفع له نقلة زيادة. وشه كان في الأرض ومهموم ومخنوق من المصاريف اللي ادبست على قفاه، بس ما هنتش عليا نفسي إني أعتذر له، هما اللي عملوا كده في نفسهم من ورا ضهري.
أول ما عربية النقل اتحركت ومشيت، مصطفى قعد على درجات السلم وراسه بين إيديه. نورهان راحت وقفت جنب العربية تحت، مكتفة إيديها ومتغاظة من الإحراج. وأنا فضلت واقفة على عتبة بابي، ساندة على الإكرة.
بعد دقيقة سكوت تقيلة، مصطفى رفع عينه وقال بصوت مكسور:
“يا ماما، إحنا كنا بنحاول نلم نفسنا ونبدأ حياتنا.”
“عارفة يا حبيبي.”
“طب ليه متبقيش في ضهري وتساعديني؟”
“ما أنا ساعدتك يا مصطفى.”
بص للشنط المرصوصة بحسرة:
“إنتي عارفة قصدي إيه.”
“أيوة، عارفة، وشايفة.”
سنين وسنين يا مصطفى، من يوم ما وعيت على الدنيا، كانت غريزتي الأولى إني أحل لك مشاكلك قبل ما تشتكي، لما كان يفوتك أوتوبيس المدرسة، أسيب كل اللي في إيدي وأوصلك. لما تنسى كشكول الواجب، أجري وراك في عز الحر للمدرسة عشان المدرس ميزعقلكش. لما كنت تتزنق في مصاريف الكلية ولا مصاريف الجواز، أفك دهبي وأسندك وأنا فرحانة، عملنا كل ده أنا وأبوك عشان بنحبك ومن دمنا. بس إنت اتعودت على العطا، وافتكرت إن كرمنا ده واجب مفروض علينا وحق مكتسب ليك تطلب فوقيه وتدوس على اللي بيديهولك.
فكرته بالراحة:
“أبوك الله يرحمه كان دايمًا يقول لك: الراجل الحقيقي هو اللي يشيل شيلته ويتحمل نتيجة قراراته.”
وطى راسه في الأرض:
“فاكر.”
“طب فكر كده في اللي عملته الصبح، اتفقت إنت ونورهان تطردوني من أوضتي من ورايا، طلبتوا نقل العفش لبيتي من غير إذني، ولما قولت لأ، قولت لي اعقلي وخليكي مرنة عشان أرضي مراتك على حساب كرامتي!”
مصطفى نزل راسه أكتر بصوت مبحوح:
“مكانش المفروض أقولها، حقك عليا.”
“لأ، مكانش المفروض تقولها فعلًا.”
بص لنورهان اللي واقفة تحت، وقال:
“كنا فاكرين إننا هنعرف نظبطها ونتفاهم سوا.”
يت عليه بحكمة السنين:
“كان ممكن نتفاهم في حاجات كتير أوي يا مصطفى لو طلبت بأدب، لكن انتوا ما طلبتوش، انتوا قررتوا ونفذتوا، وكنتوا فاكرين إني مجبرة أطاطي وأقول حاضر ونعم.”
فضل ساكت ثواني بيبص على بلاط السلم، وبعدين قال بنبرة هادية خالص:
“كان لازم نعمل لك حساب ونتكلم معاكي الأول.”
اعتراف صغير، بس كسر جزء من العناد اللي كان فيه.
نورهان طلعت السلم وقربت بتردد، وقالت بنبرة حاولت تخليها هادية:
“طنط ماجدة، إحنا ما كانش قصدنا نضايقك أو نقل راحتك.”
بصيت في عينيها أقرأ اللي جواها:
“أومال لما قولت لأ الصبح، فضلتوا مصرين ومصممين تلوا دراعي ليه؟”
سكتت شوية وقالت بصوت واطي:
“افتكرت إن الترتيب ده هيكون أحسن للكل.”
“أحسن للكل، إلا أنا.”
لفت وشها بعيد وماردتش.
ولأول مرة من بداية اليوم المشحون ده، الصوت بقى واطي، والكلام هدي. فهمتهم بالراحة وبأصول ولاد الناس: هما هيدوروا على مكان يقعدوا فيه بمعرفتهم، وأنا مستعدة أساعد في أي أوراق أو حاجات تخصهم تخص المشوار ده، مش عشان أعاندهم ولا أبهدلهم في الشارع، بس عشان خطوطي الحمرا لازم تتشاف وتتحترم. بيتي مش سبيل، وأنا ليا كرامتي في ملكي.
مصطفى قام، نفض بنطلونه:
“هندور على شقة مفروشة أو أوتيل نقضي فيه الليلة.”
هزيت راسي بهدوء:
“ده عين العقل.”
بص لمدخل الشقة، وسألني بتردد كأنه بيتشعبط في أمل أخير:
“يعني، خلاص يا ماما؟ مفيش رجوع في كلامك؟”
رديت وأنا باصة في عينيه بثبات:
“خلاص يا بني، ربنا ييسر لكم طريقكم.”
أخد نَفَس طويل وتقيل، ونزل على السلم. بدأ يشيل الشنط ويحطها في شنطة العربية الجيب، ونورهان نزلت وراه تساعده وتحط الكراتين، من غير ما تنطق بولا نص كلمة.
لما نزل آخر كرتونة في شنطة العربية، مصطفى لف وقرب مني خطوتين، وشه كان في الأرض:
“حقك عليا يا أمي، أنا آسف إن الأمور وصلت لكده واليوم خلص بالطريقة دي.”
بصيت في عينيه بنظرة كلها حنية موجوعة:
“وأنا كمان زعلانة يا ابني.”
اتردد ثواني، كأنه عيل تايه بيسأل أمه عن الأمان:
“طب، ينفع أكلمك وأطمن عليكي؟ ولا مش عايزة تسمعي صوتي؟”
السؤال خلى الدمعة تقف في عيني بالعافية:
“إنت بتقول إيه يا مصطفى؟ ده إنت ابني وضنايا، تكلمني في أي وقت طبعاً.”
