غالبًا هيتعملي حظر دخول من بوابة الشركة نفسها!
أستاذ طارق، مدير القسم، بدأ يتكلم بنبرة جدية احنا قرأنا ال CV بتاعك يا يارا، وواضح إنك اشتغلتي في أماكن كتير وكنتي بتدرسي في نفس الوقت. بس وظيفة منسقة إدارية للمشروعات عندنا محتاجة شخص منظم جدًا، بيعرف يدير الأزمات تحت ضغط، ويهتم بأدق التفاصيل.
اول ما قال يهتم بأدق التفاصيل، سمعت صوت كحة خفيفة طالعة من ناحية جاسر! بصيتله بطرف عيني، لقيته حاطط إيده على بقه وبيكتم ضحكته وهو بيبص في التابلت بتاعه! يا برودك يا أخي! ده بيتعمد يوترني!
أخدت نفس عميق وقررت إني مش هستسلم للإحراج. لو هخسر الوظيفة دي، على الأقل أخسرها وأنا مرفوعة الراس، مش وأنا مکسورة ومرتبكة.
عدلت قعدتي، وفردت ضهري، وبصيت لأستاذ طارق بثقة وقلت أنا فاهمة ده كويس جدًا يا فندم. فكرة إني اشتغلت شغلانتين في وقت واحد وأنا بدرس في الجامعة علمتني إزاي أرتب أولوياتي تحت أصعب الظروف، وإزاي أتعامل مع أي مفاجأة تحصل في الشغل من غير ما أتهز أو أفقد تركيزي.
نهى هزت راسها بإعجاب خفيف، وقالت جميل. طيب قولي لي، لو عندك مشروعين كبار تسليمهم في نفس اليوم، وحصلت مشكلة
مفاجئة في واحد منهم قبل التسليم بساعة، هتتصرفي إزاي؟
بدأت أجاوبها بهدوء وتفصيل، ونسيت للحظة وجود جاسر في الأوضة. اتكلمت عن خبرتي العملية، وعن المواقف الصعبة اللي عديت بيها في شغلي القديم، وإزاي كنت بحل المشاكل بأقل إمكانيات. حسيت إن طارق ونهى مقتنعين بكلامي، وده اداني دفعة أمل صغيرة.
لكن فجأة… الصوت العميق الهادي قطع حبل أفكاري كلام نظري ممتاز يا أستاذة يارا.
اتجمدت تاني. كان هو اللي بيتكلم. رفع عينه من التابلت، وسند ضهره لورا على الكرسي الجلد الفخم بتاعه، وشبك صوابعه قدامه وبصلي مباشرة. نظرته كانت حادة لدرجة حسيت إنها بتخترقني.
كمل كلامه بنبرة فيها تحدي واضح بس في الواقع، الأزمات الحقيقية مابتجيش بترتيب، ومابتديكيش فرصة تستعدي لها. أحيانًا بتلاقي نفسك في موقف محرج جدًا، أو غلطة صغيرة غير مقصودة بتحطك في وش المدفع… ساعتها اللي بيفرق الشخص المحترف من الهاوي هو قدرته على السيطرة على انفعالاته، وإنه مايخليش الإحراج يضيع تركيزه.
كان الكلام ظاهرًا عن الشغل، لكن كل كلمة فيه كانت موجهة ليا أنا شخصيًا! كان بيفكرني باللي حصل تحت في الشارع، وبيختبرني يشوفني
هتهز ولا لأ.
بصيتله في عينه مباشرة، وقررت أرد عليه بنفس طريقته… كلام عن الشغل، لكن المعنى ليه هو لوحده! ابتسمت ابتسامة هادية وواثقة وقلت عندك حق تمامًا يا بشمهندس. المواقف المحرجة والمفاجئة بتحصل لأي حد، حتى لو كان عامل حسابه لكل حاجة. بس الشخص الذكي هو اللي بيعرف يتعامل مع الموقف بمرونة، يتعلم من غلطته بسرعة، ويكمل طريقه كأن مفيش حاجة حصلت… والأهم، إنه مايسمحش لأي حد يستغل الموقف ده ضده!
سكتت الأوضة تمامًا لثواني! نهى وطارق بصوا لبعض باستغراب، مش فاهمين إيه التوتر الخفي والرسايل المتبادلة بيني وبين رئيس مجلس الإدارة. أما جاسر… ففضل باصصلي ثواني طويلة، وفجأة، طرف شفايفه اترفع بابتسامة جانبية صغيرة جدًا، تكاد متتشفش، وهز راسه ببطء كأنه بيقولي برافو عليكي… رد حلو!
بعدها قفل التابلت بتاعه وحطه على الترابيزة، وقال بنبرة رسمية حاسمة عمومًا، احنا قدامنا كذا مرشح النهاردة. أستاذة نهى وأستاذ طارق هيكملوا معاكي باقي الأسئلة الفنية، وهنبلغك بالنتيجة خلال يومين.
قام وقف وعدل جاكيت بدلته الرمادي الغامق، وقبل ما يخرج من باب أوضة الاجتماعات، وقف ثانية واحدة،
لف نص لفة
